Bwebwenato in me Solomon ear kwal̦o̦ke ej juon waanjoñak ñan kaalikkar ta eo emaroñ wal̦o̦k ñan jabdewõt iaan ri-karejar ro an Jeova. Juon emaroñ oktak im kõm̦m̦an juon jerawiwi el̦ap innem tokãlik l̦õmn̦ak bwe aolep men ko rar wal̦o̦k ilo m̦õkaj. Ak emaroñ ba, “Il̦ak ilbõk, ekajju wal̦o̦k.” Meñe ãindein, ak el̦aññe enaaj l̦õmn̦ak kõn ta ko rar lukkuun wal̦o̦k, enaaj kile bwe ear bõk jet buñtõn ne ko rejjab em̦m̦an me rar tõll̦o̦ke ñan an jerawiwi. Bõlen ear kããlõt ro m̦õttan me rejjab yokwe Jeova. Ak bõlen jet iaan menin kam̦õn̦õn̦õ ko an, weepjait ko ej lali, ak jikin ko ear etal ñani rejjab em̦m̦an ñan Kũrjin ro. Bõlen ear bõjrak jãn an jar, riiti Baibõl̦ eo, pãd ilo iien kweilo̦k ko, ak bõk kun̦aan ilo kwal̦o̦k naan. Ãinwõt likao eo ilo bokin Jabõn Kõnnaan, jokãlõt ko renana ear kõm̦m̦ani rar tõll̦o̦ke ñan an jerawiwi, kõn men in jemaroñ ba bwe aolep men remaroñ kar jab wal̦o̦k ilo m̦õkaj. Ta eo jej katak? Jejjab aikuj jum̦ae wõt ad kõm̦m̦an jerawiwi ak jej aikuj bar jum̦ae buñtõn ne ko me rej tõll̦o̦k kõj ñan jerawiwi. Solomon ej lukkuun kaalikkare boin in ãlikin an kar kõnono kõn bwebwenato in.—Matu 5:​29, 30. w24.07 16 pãr. 10-11

M̦weiuk ta in eaorõk? Ej jerbalin lo̦mo̦o̦r eo ñan kwal̦o̦k kõn ennaan eo kõn Aelõñ eo. (2 Kor. 4:1) Ak jãpe ta ko kõm̦m̦an jãn kũl̦e? Eokwe, jãpe kein rej jutak kõn ri-karejar ro an Anij me rej kwal̦o̦k kõn ennaan eo em̦m̦an ñan ro jet. Ilo tõre ko an Paul, ro rar jerbalin peejnej rar kõjerbali jãpe ko kõm̦m̦an jãn kũl̦e ñan bõkto-bõktak m̦weiuk ko raorõk ãinwõt m̦õñã, wain, im jããn. Ejja ãindeinl̦o̦k wõt, Jeova ej letok eddo eo ñan kõj bwe jen kwal̦o̦k kõn ennaan eo em̦m̦an me el̦ap an aorõk. Ikijjeen jipañ eo jãn Jeova, jemaroñ bõk kajoor eo jej aikuji ñan ad kwal̦o̦k kõn ennaan eo em̦m̦an ilo tiljek. Jet iien, jemaroñ mijak armej ak mijak bwe reban roñjake kõj. Ewi wãween ad maroñ anjo̦ ioon eñjake kein? L̦õmn̦ak kõn jar eo an rijjilõk ro ke kar jiroñ er bwe ren jab kwal̦o̦k naan. Ijello̦kun aer mijak, rar kajjitõk ippãn Jeova bwe en jipañ er ñan kõnnaan kõn ennaan eo ilo peran. Jeova ear kajju uwaake jar eo aer. (Jrb. 4:​18, 29, 31) Innem el̦aññe jet iien kwõj bar mijak armej ñe kwõj kwal̦o̦k naan, kajjitõk ippãn Jeova ñan jipañ eok bwe yokwe eo am̦ ñan armej en anjo̦ ioon am̦ mijak armej. w24.04 16 pãr. 8-9

Yokwe eo ad ñan Jeova ej kõm̦akũt kõj ñan kokkwõjarjar etan. Jekõn̦aan kwal̦o̦k ñan ro jet bwe men ko renana Setan ear ba kõn Jeova rejjab m̦ool ñan jidik. (Jen. 3:​1-5; Job 2:4; Jon 8:44) Ilo jerbalin kwal̦o̦k naan, jelukkuun kõn̦aan kwal̦o̦k ñan aolep ro rej m̦õn̦õn̦õ in roñjake kõn wõn Jeova im kain Anij rot e. Jekõn̦aan bwe aolep ren jel̦ã bwe kadkad eo el̦aptata an Anij ej yokwe, bwe wãween an irooj im tõl ejim̦we im ewãnõk, im bwe m̦õttan jidik Aelõñ eo an enaaj kõjem̦l̦o̦k aolep eñtaan im kõm̦m̦an an armej ro ijin ioon lal̦ lo m̦õn̦õn̦õ im aenõm̦m̦an. (Sam 37:​10, 11, 29; 1 Jon 4:8) Ñe jej jojomare Jeova im kwal̦o̦k kõn men kein ilo jerbalin kwal̦o̦k naan, jej kokkwõjarjar ãt eo etan. Jej bareinwõt m̦õn̦õn̦õ kõnke jej kõm̦m̦ani men ko jej aikuj kõm̦m̦ani ãinwõt Ri-Kõnnaan ro an Jeova. w24.05 18 pãr. 12