Ilyasi lwakwe Solomoni likalangilila ivingacitika na kuli kapepa wakwe Yeova ali wensi. Angacita uluyembu ulwipisye nupya pa cisila angelenganya ukuti ataamanyile ukuti angayembuka. Nanti limwi angalanda ukuti, “Ntamanyile ukuti vingacitika.” Nomba ndi cakuti welenganya pa vyacitike, angiluka ukuti wacisilepo vimwi ivitali ningo ivyalenzile ukuti ayembuke. Limwi ivyalenzile acite vii, apa mulandu ni vyuza iviipe, ukukanasoolola ningo ivyakuizanzya, kukanaomvya ningo intaneti nanti ukuzanwa uku ncende zino zitalinga ku Ina Klistu. Nanti limwi watiile ukupepa, kuisambilizya Baibo, kuta ukuzanwa umu kulongana, nanti kuta ukusimikila. Wakwe vino cali ku mulumendo uwalumbulwa umwi buku lya Mapinda, limwi icalenzile ukuti ayembuke a pa mulandu ni vintu vino wapingwilepo ukucita ivitali ningo. I vyani vino tukusambililako? Tutalinzile sile ukutaluka uku luyembu lelo tulinzile nu kutaluka uku vintu ivingalenga tucite uluyembu. Vikwene ali vino Solomoni walanzile pa cisila ca kulanda pa vyacitikile umulumendo alino nu mwanaci cizelele.—Mate. 5:​29, 30.

Icuma cii? U mulimo wa kusimikila apa Wene wakwe Leza ulalenga antu ukupusuka. (2 Kol. 4:1) Uzye Inyungu ali cani? Inyungu ikaimililako aomvi yakwe Leza, akanenako yauze api lyasi lisuma. Umu manda yakwe Paulo, aakazyanga ivintu yaomvyanga inyungu pa kusenda ivintu ivicindame, wakwe ivyakulya, waini, alino ni impiya. Naswe kwene Yeova watupeela ivyeo ivicindame kuli kuti ilyasi lisuma. Pa mulandu wakuti Yeova akatwazwa, twakwata amaka akunena anji api lyasi lisuma. Insita zimwi tungatiina antu nanti ukutiina ukuti yamakana ukuvwa. Nomba tungacita uli pakuti tute ukwelenganya vii? Elenganyini api pepo lino mutumwa Paulo wapefile lino ya yakanyizye ukusimikila. Yene yatuvwile intete lelo yapefile kuli Yeova ukuti ayaazwe ‘yatwalilile ukulanda nu kusipa.’ Nupya Yeova waswike ipepo lyao papo kwene sile. (Mili. 4:​18, 29, 31) Naswe kwene ndi cakuti twatandika ukutiina antu, mwalenga Yeova ukuti amwazwe ukutemwa sana antu pakuti mutatiina ukuyasimikila. w24.04 16 ¶8-9

Ukutemwa Yeova kukalenga twacindika izina lyakwe. Tukalenga izina lyakwe Leza ukuya ilya muzilo lino tukunena antu ukuti vino Satana akalanda pali Leza ivya ufi. (Utan. 3:​1-5; Yobo 2:4; Yoa. 8:44) Lino tukuomba umulimo wa kusimikila tukaombesya ukunena antu akalonda ukuvwa icumi icikalanda pali Yeova. Tukalonda antu yonsi ukumanya ukuti Yeova waya sana nu kutemwa nupya akateeka umulungami nupya uwaya nu mulinganya, nupya uwene wakwe wasya usisyepo ukucula nu kulenga kuye umutende nu luzango. (Masa. 37:​10, 11, 29; 1 Yoa. 4:8) Ndi cakuti tukunena antu ivintu vii tukacindika izina lyakwe Leza. Twaya nu luzango pa mulandu wakuti vino tukacita vyalingana ni zina lyakuti ya Nte Yakwe Yeova. w24.05 18 ¶12