Umwene Devedi wamanyile Yeova nupya wamutaile. Lino Umwene Saulo alino na yauze yalondanga ukukoma Devedi, wapefile kuli Yeova pakuti amwazwe. Lino Yeova waswike ipepo lyakwe Devedi nu kumupususya, watiile: “Yawe umumi.” (Masa. 18:46) Lino Devedi walanzile amazwi yaa atalozyanga sile umu kuti Leza akuno waya. Lupapulo lwa kulondelezyamo ivyeo lumwi lwalangilila ukuti amazwi yano Devedi walanzile yakalangilila ukuti wataile ukuti Yeova “a Leza wa umi akaazwa antu yakwe.” Devedi wamanyile ukuti Leza walolanga ivyamucitikilanga nupya walondesyanga ukumwazwa. Ukumanya vii kwalenzile atwalilile ukumuombela nu kumulumbanya. (Masa. 18:​28, 29, 49) Ukumanya ukuti Yeova a Leza wa umi kungalenga twaombesya sana. Tulakwata amaka akutwazwa ukuzizimizya mezyo nupya tulalonda ukuombesya umu mulimo wakwe Leza. Tulalonda ukupalama sana kuli Yeova. w24.06 20-21 ¶3-4

I vyani vino tungasambilila ku mazwi yano umutumwa Paulo walembiile Aina Tesalonika? Ndi cakuti tuvwa malyasi yamwi aasikuvwana ni cumi cino twasambilila muli Baibo nanti limwi tuvwa vimwi ivyakuti vyatupezya na mano, tulinzile ukwiluka. Mu uteeko wa Soviet Union, alwani itu yapeezile aina kalata uwalolekanga kwati wafumile ku maofesi yakalamba yakwe ya Nte. Muli kalata, yakomelizye aina ukuipatula, nu kupanga kaungwe. Kalata iya yalolekanga kwati i yacumi. Lelo Aina Klistu ali na ucisinka yatabefilwe. Ilwike ukuti ivyali muli kalata wiya vyapusine na vino yasambiliziwe. Ndakai, antu apata icumi insita zimwi yakaomvya intaneti pakuti yatuvulunganye nu kulenga tupatukane. Ukucila ukuvulunganyiziwa “nanti ukubepwa,” tungaicingilila nga twelenganyapo sana ndi cakuti vino ituvwa vikuvwana ni cumi cino twasambilila.—2 Tesa. 2:2; 1 Yoa. 4:1. w24.07 12 ¶14-15

Lelo icintu icicindame sana cino mungapingulapo ukucita, u kuipeela kuli Yeova alino nu kulamupepa pamwi na ina na ya nkazi. Vikwene ali vino Yeova akalonda ukuti yonsi yacita. U mulandu ci? Akalonda ukuti yaipakizya ucuza na aliwe alino nu kwikala amanda pe. (Malan. 30:​19, 20; Gala. 6:​7, 8) Nanti ciye vivyo, Yeova asipatikizya umuntu aliwensi ukuti amuombela. Lelo cila muntu alinzile ukuisoolwela vino alinzile ukucita. Nga ndi cakuti Umwina Klistu umubatiziwe watama isunde lyakwe Leza, nu kucita uluyembu ulwipisye? Ndi cakuti atalapiile, alinzile ukufumiziwa umu cilongano. (1 Kol. 5:13) Nanti ciye vivyo, Yeova akalonda sana ukuti umuntu wiyo alapile nu kuya cuza wakwe nupya. Nupya u kwene ali mulandu uno Yeova wapeezile ilambo pakuti aelela imembu zya yantu aakalapila. Yeova a Leza uwaya nu kutemwa nupya akakomelezya yayo aakacita imembu zipisye ukuti yalapile.—Zaka. 1:3; Loma 2:4; Yako. 4:8. w24.08 14 ¶1-2