Mwene Davidi aanancuwela Yehova sana-saana ni aanankhuluvela. Ukati waalupatthiyaawe naawanannyaawe ni hataa nimwene Sawuli, Davidi ahonlompa Yehova ni ahonlepela wiira ankavihere. Ukati Yehova waakhunlyaawe ulompa wa Davidi ni wankavihenryaawe, Davidi aheera co: “Yehova khanle nkumi!” (Isaa. 18:46) Isiyani Davidi yaapheelaawe uhimya? Ilivuru imoca yaanamasoma ihohimya wiira, nno nipuronno, Davidi aapheela uhimya wiira aanaakhuluvela wiira Yehova phiri Nluku eekhweeli ni uyo nawaakavihera atthu anonswalela khula ukati. Davidi ahooneeha mwaaneennyaawe wiira khula ukati wakhalaawe ni masakha, Yehova aari wakhiviru wiira ankavihere. Iyo phi itthu yankavihenre Davidi uhihiya unswalela ni unttottopela Yehova. (Isaa. 18:28, 29, 49) Ukhuluvela wiira Yehova khanle Nluku nkumi unaahala unikavihera unswalela unitteelaka nrima. Ni unswalela unitteelaka nrima phinhala unikavihera uvilela khula masakha ni uhihiya wiikurumica unswalela. Ciicammo, napankaka commo phinhaleehu uhihiya ukhalana upatthani womaana nuuyova. w24.06 ipaag. 20-21 iparaag. 3-4

Isiyani ineetthuceehu niitthu apostolu Paulu aahimenryaawe makristau o Tesalonika? Neewaka itthu ihinvaranaca niitthu niitthucileehu mbiibiliyani awula nacuwelaka ihantisi yooninyonnyiha, nihaana ukhala ocuwelaca. Ikwaha imoca, União Soviética okhalayi, awananiihu yahaavaha iwarakha mayamunna yaakhala khampa inkhuma mapuro anhooleliya miteko cihu. Iyo iwarakheeyo, yaakurumica mayamunna akhwaawe umpanka mphwinkwaaya ahihooleliyaka nintthu. Ni iyo iwarakheeyo yakhala toko yaari yootthenkaciya nipuro nihooleliyaaya miteko cihu, masi mayamunna akhwaawe yaari ookhuluvelya, khayaathepyaciye niiyo iwarakheeyo. Ayo yahocuwela wiira moolumo yaari nwarakhannyaayo khayaavaranaca ni citthu ceetthucilyaaya. Mahukwaala, mananna mamocaaru, ale cinaarusa ikhweeli co mbiibiliyani, anaavarelaka nteko interneti awula ile ineehaniya redes sociais wiira amananihe unikukuvaniha ni unikawaniha. Uhiya uviriha ukati noonaka nnyo citthunnyo, ninlamuliya uwehaweha awula wuupuwela saana wakhala wiira itthu neewileehu awula isomileehu inaavarihana niitthu niitthucileehu mbiibiliyani.—2 Atesal. 2:2; 1 Jo. 4:1. w24.07 ipaag. 12 iparaag. 14-15

Nyuuva nnaavarela nteko iyo itthuvweeyo khula nihuku ukati nnolakeleenyu itthu yoohala upanka. Itthu yofayita cinene khula ntthu inlamuliyaawe ulakela, ukhanle wiivaherera wa Yehova ni upanka mphantte waamucyaawe. Yehova noopheela wiira otheene nilakele upanka iyo. Kontha isiyani? Uyo noopheela wiira akhalane upatthani nuuyo ni akhale mpaka. (Deut. 30:19, 20; Akalas. 6:7, 8) Phimaana, Yehova khanonkhanyereriha ntthu wiira answalele. Uyo nanhiya khula ntthu ulakela uthanla itthu yoohala upanka. Vano wakhalaka wiira nkristau oopattisiya naavara itampi yuulupale? Wakhalaka wiira uyo khanttharuwa naakumihiya wanlokoni. (1 Akor. 5:13) Masi, hataa ukhalaka commo, Yehova naaweherera wiira uyo ntthuuyo anturuwele. Khweeliini, iyo phiitthu yofayita cinene imwiirihile unvaherera mwanawe wiira atthu oottheka anttharuwa aleveleliye. Nlukwiihu onifento nawaakurumica ale avanre itampi wiira attharuwe.—Zakar. 1:3; Aroo. 2:4; Tiya. 4:8. w24.08 ipaag. 14 iparaag. 1-2