Nanan-janaka Ihany Tamin’ny Farany!

Efa mpivady efa ela be i Abrahama sy Saraha tamin’izay. Rehefa niala tao amin’ilay trano tsara be nipetrahany tany Ora ry zareo, dia lasa nipetraka tao anaty tranolay. Tsy nitaraina anefa i Saraha, satria natoky an’i Jehovah.

Te hanan-janaka mafy i Saraha, dia hoy izy tamin’i Abrahama: ‘Alaivo ho vady i Hagara mpiasako. Dia raha manan-janaka izy, dia ho hoatran’ny hoe zanako ihany ny zanakareo.’ Niteraka lahikely i Hagara tatỳ aoriana. Ismaela no anarany.

Nisy lehilahy anankitelo tonga nitsidika an-dry Abrahama, taona maromaro taorian’izay. Efa 99 taona i Abrahama, ary 89 taona i Saraha. Nasain’i Abrahama nipetrapetraka teo ambanin’izay hazo iray izay izy telo lahy, ary nomeny sakafo. Fantatrao ve hoe iza ireo vahininy ireo? Anjely! Hoy ry zareo tamin’i Abrahama: ‘Hanan-janakalahy ianareo mivady, amin’ny herintaona hoatr’izao.’ Tao anaty tranolay i Saraha tamin’izay nihaino resaka. Nihomehy izy sady nieritreritra hoe: ‘Izaho efa antitra be ity koa ve dia mbola hiteraka?’

Niteraka lahikely tokoa i Saraha, herintaona taorian’izay, araka ny tenin’ilay anjelin’i Jehovah. Nataon’i Abrahama hoe Isaka ny anarany. “Fihomehezana” no dikan’ilay hoe Isaka.

Hitan’i Saraha nanambanimbany an’i Isaka foana i Ismaela, tamin’i Isaka dimy taona teo ho eo. Te hiaro ny zanany i Saraha, dia nasainy noroahin’i Abrahama i Hagara sy Ismaela. Tsy nety i Abrahama tamin’ny voalohany. Te hiaro an’i Isaka koa anefa i Jehovah, dia hoy izy: ‘Ataovy izay asain’i Saraha ataonao. Ao fa hokarakaraiko i Ismaela. I Isaka anefa no hofidiko rehefa hanatanteraka an’izay noteneniko taminao aho.’