Ny Lelan’ny Kôlibria

Nieritreritra ny mpahay siansa taloha hoe trohin’ny kôlibria amin’ny lelany ny mamimbony. Hita tamin’ny fikarohana natao tatỳ aoriana anefa fa be pitsiny kokoa ny fomba hakan’io vorona io mamimbony, fandrihany ilay izy.

Diniho izao: Rehefa mikasika amin’ny mamimbony ny lelan’ny kôlibria, dia lasa misampana roa. Misy zavatra mety misokatra amin’ny sampany tsirairay. Mihidy foana izy io, fa raha vao mikasika mamimbony nefa ilay sampana, dia tonga dia misokatra ilay izy dia manangona mamimbony. Mifanohitra amin’izany no mitranga raha vao tsy mikasika intsony an’ilay mamimbony ny lelan’ilay vorona. Mihidy ilay zavatra mety misokatra eo amin’ilay sampany, dia hoatran’ny hoe voafandrika ao ilay mamimbony. Alain’ilay vorona amin’ny lelany izany ilay mamimbony fa tsy hoe trohiny akory.

Latsaky ny ampahafolon’ny segondra no itrangan’izany, sady averimberin’ilay vorona rehefa maka mamimbony izy, hoy ireto manam-pahaizana ireto: Alejandro Rico-Guevara, Tai-Hsi Fan ary Margaret Rubega. Milaza koa ry zareo fa fitaovana tena mandaitra hahazoan’ny kôlibria mamimbony ny lelany. Miova endrika haingana be ilay izy raha vao mikasika ranon-javatra na miala amin’ilay izy.

Ankoatra an’izay, dia tsy mampiasa hery mihitsy ilay vorona rehefa manao an’izany. Hery avy any ivelany tsinona no mahatonga an’ilay zavatra eo amin’ny sampany amin’ny lelan’ilay vorona hihidy na hisokatra rehefa mikasika amin’ny ranon-javatra izy na miala amin’ilay izy.

Faran’izay mahay maka ranon-javatra ny lelan’ny kôlibria, dia tian’ny manam-pahaizana alaina tahaka izany amin’ny resaka fitsaboana, fanamboarana robot na zavatra hafa. Mety hanampy koa aza izany amin’ny fanamboarana fitaovana fanadiovana ranon-javatra na menaka miparitaka.

Ahoana ny Hevitrao? Tongatonga ho azy ve ny fahaizan’ny lelan’ny kôlibria, sa nisy namorona?