SISERA

(Sisèra).

1. Lehiben’ny tafik’i Jabina mpanjaka kananita. Nisongadina kokoa i Sisera, raha noharina tamin’i Jabina Mpanjaka. Nonina tany Haroseta izy fa tsy tany Hazora tanànan’i Jabina. Nampahory ny Israelita nandritra ny 20 taona i Sisera sy Jabina. Efa avy nanafaka an’ireo Israelita ireo teo an-tanan’ny Moabita i Ehoda Mpitsara, taloha kelin’izay.​—Mpts 4:1-3; 1Sa 12:9.

Rehefa ren’i Sisera fa nangonin’i Debora sy Baraka ny tafika israelita, dia mba nangoniny teo amin’ny lohasaha falehan-driakan’i Kisona koa ny tafiny niaraka tamin’ny kalesin’ady 900 nisy lelan’antsy. Nataon’i Jehovah nifanaritaka anefa ny tafik’i Sisera, ka resy tanteraka.​—Mpts 4:7, 12-16, 23; 5:20, 21; Sl 83:9.

Nihitsoka ireo kalesy (ampit. Mpts 5:21), ka nihazakazaka nandositra i Sisera, ary tonga tao an-tranolain’i Jaela, vadin’i Hebera Kenita, izay tsara fihavanana tamin’i Jabina. Nampandroso azy i Jaela. Vizana noho ny ady sy ny hazakazaka i Sisera, ka nanapa-kevitra ny hatory satria natoky izy fa tsy nisy natahorana tao an-tranolain’i Jaela. Nasainy niambina ny fidirana i Jaela, rehefa avy nanome azy ronono hosotroina. Rehefa renoky ny torimaso izy, dia nitsaitsaika nankeo aminy i Jaela ary natsatony teo amin’ny fihirifany ny fantsika be fanenjanan-day, ka nataony niboroaka tamin’ny tany. Rehefa tonga i Baraka, dia nasehon’i Jaela azy ilay fahavalo efa maty. (Mpts 4:9, 17-22; 5:25-27) Sasa-niandry an’i Sisera hiverina hitondra babo be dia be ny reniny sy ny ankohonany.​—Mpts 5:28-30.

2. Razamben’ny fianakaviana iray anisan’ny Netinima. Anisan’ireo niverina tany Jerosalema niaraka tamin’i Zerobabela io fianakaviana io, tamin’ny 537 T.K. (Ezr 2:1, 2, 43, 53; Ne 7:55) Marina fa mety ho lasa Netinima nanompo tao amin’ny tempoly ny babo an’ady sasany, anisan’izany ireo tamin’ny andron’i Sisera (No. 1), kanefa azo antoka hoe tsy taranak’ilay Sisera tamin’ny andron’i Baraka ireo Netinima niverina avy tany Babylona ireo.