SAFANA

(Safàna) [Bitrom-bato].

Zanakalahin’i Azalia, sady mpitan-tsoratry ny mpanjaka. Nirahin’i Josia Mpanjaka ho any amin’i Hilkia Mpisoronabe i Safana sy ny tandapa roa, tamin’ny 642 T.K. mba hanome toromarika momba ny fanamboarana ny simba tamin’ny tempoly. Nahita “ny boky misy ny lalàna” i Hilkia tamin’izay, ary nomeny an’i Safana izy io. Mety ho ilay boky tamin’ny andron’i Mosesy mihitsy izy io. Novakin’i Safana tamin’i Josia ilay Lalàna. Raha vao namaky kelikely anefa izy, dia nirahin’i Josia izy sy Ahikama zanany ary olon-kafa maromaro, mba hanontany momba izay kasain’i Jehovah hatao ho an’ny fanjakan’ny Joda. Nankany amin’i Holda mpaminanivavy ireo iraka, ary nitondra ny tatitra nankany amin’ny mpanjaka. Nolazain’izy ireo tamin’ny mpanjaka ilay faminanian’i Jehovah hoe ho avy ny fandringanana, saingy tsy amin’ny andro anjakan’i Josia.​—2Mp 22:3-20; 2Ta 34:8-28.

Tsy nitovy ireo zanakalahin’i Safana: Toa nanaraka ny fivavahana marina i Ahikama (Je 26:24) sy Elasa (Je 29:1-3) ary Gemaria (Je 36:10-12, 25), fa tsy mba toy izany i Jazania. (Ezk 8:10, 11) I Gedalia zafikelin’i Safana indray, dia olona natahotra an’Andriamanitra. Voatendry ho governora izy io rehefa resy i Jerosalema.​—2Mp 25:22; Je 39:14.