LADANOMA

(ladanòma).

Ditin’ny ravina sy sampan’ny karazana hazo Cistus, na raozim-bato. Malemy io dity io, mainty na volontsôkôlà, mangidy nefa manitra, ary atao amin’ny ranomanitra. Nisy fotoana koa natao fanafody izy io. Hoy i Hérodote (III, 112), Grika mpahay tantara fahiny: “Alaina eo amin’ny volombavan’ny osilahy ilay dity, satria miraikitra eo rehefa avy niraoka ahitra tany anaty kirihitra ireo osy. Atao amin’ny menaka fanosorana isan-karazany izy io, ary emboka manitra fandoron’ny Arabo.”​—Nadikan’i G. Rawlinson.

Nekôʼt (heb.) izy io, ary entana nentin’ny Ismaelita maromaro nividy an’i Josefa, sady anisan’ny vokatra tsara nasain’i Jakoba nentin’ny zanany ho fanomezana ho an’ilay mpitondra tany Ejipta. (Ge 37:25; 43:11) Nadika hoe “nekota” (Prot.), “astragala” (Kat.), “zava-manitra” (JM) izy io, na koa “ladanoma” (TV) araka ny famaritan’i Koehler sy Baumgartner.​—Lexicon in Veteris Testamenti Libros, Leyde, 1958, p. 615.