HELKATA

(Helkàta) [Toerana Marina Tsara].

Tanàna teo amin’ny sisin-tanin’ny fokon’i Asera. (Js 19:24, 25, 31) Nomena ny Gersonita izy io tatỳ aoriana, ka lasa tanànan’ny Levita. (Js 21:27, 30, 31) Hokoka no iantsoan’ny 1 Tantara 6:75 azy io. Mbola iadiana hevitra ny tena toerana nisy an’i Helkata. Misy mihevitra azy io ho i Kirbet el-Harbaja (Tel Regev), 18 km any atsimon’i Ako, ary akaikin’ny fototry ny Tandavan-tendrombohitra Karmela. Milaza anefa Ny Diksionera Ara-baiboly Misy Sary, nataon’i J. Douglas (1980, Boky Faha-2, p. 634), fa “aleo aza angamba mifidy an’i Tell el-Kasis” tokotokony ho 9 km any atsimon’i Kirbet el-Harbaja, toerana eo amin’ny fidirana mankao amin’ny Lohasahan’i Jezirela. Tanisain’ny Josoa 19:24-26 aorian’i Helkata mantsy i Haly sy Batena, izay voalaza fa tany amin’ny faritra atsimo amin’ny Lemak’i Ako. Raha i Tell el-Kasis (Tel Kashish) àry i Helkata dia tokony ho teo amin’ny fiandohan’ny zorony atsimoatsinanana amin’ny sisin’ny Lemak’i Ako izy io, fa tsy nanomboka avy tany avaratra nankany atsimo. Ilaina fantarina anefa ny tena toerana nisy ny tanàna hafa tononina miaraka amin’i Helkata mba ho azo antoka io filazana io.