GAMALIELA

(Gamalièla) [mety hidika hoe Valisoa (Nahazo ny Sahaza) avy Amin’Andriamanitra].

1. Zanakalahin’i Pedazora, avy amin’ny fokon’i Manase. Mpiadidy teo amin’ny fokony izy. (No 1:10, 16) Izy no iray tamin’ireo mpiadidy 12 nirahin’i Jehovah hanampy an’i Mosesy sy Arona mba hanisa ny zanak’Israely, izay 20 taona no ho miakatra ka afaka niantafika. (No 1:1-4, 10) I Gamaliela no mpifehy ny tafiky ny fokon’i Manase, izay iray tamin’ireo foko telo tao amin’ny fizarana nisy ny tobin’i Efraima. (No 2:18, 20; 10:23) Nanao fanatitra ireo mpiadidy, rehefa voatsangana ny tranolay masina. Nasain’i Jehovah nanaovana fanompoana tao amin’ny tranolay fihaonana ireny fanatitra ireny. Nitondra fanatitra koa i Gamaliela tamin’ny andro fahavalo nitokanana ny alitara.​—No 7:1-5, 10, 11, 54-59.

2. Fariseo sy mpampiana-dalàna anisan’ny Fitsarana Avo Jiosy. Teo an-tongony ny apostoly Paoly no nobeazina araka ny fampianarana hentitra momba ny Lalàn’ny razamben’izy ireo. (As 5:34; 22:3) Maro no mihevitra an’i Gamaliela ho i Gamaliela Zokiny. Nohajain’ny rehetra i Gamaliela satria izy no voalohany nomena anaram-boninahitra hoe “Rabàna”, izay ambony kokoa noho ny hoe “Raby.” Hoy ny Mishnah (Sôta 9:15) momba azy: “Tsy nisy hasiny intsony ny Lalàna, ary foana hatreo ny fahadiovana sy ny fifadiana, rehefa maty ny Rabàna Gamaliela Zokiny.” (Nadikan’i H. Danby) Azo inoana hoe olona nalala-tsaina i Gamaliela ary tsy nafana fo tafahoatra. Ahitana izany ny torohevitra nomeny, rehefa nentina teo anatrehan’ny Fitsarana Avo i Petera sy ny apostoly hafa. Nanonona zava-nitranga fahiny izy mba hanaporofoana fa fahendrena ny tsy misakana ny asan’ireo apostoly. Hoy izy, avy eo: “Raha avy amin’olombelona mantsy izao fikasana na asa izao, dia ho rava, fa raha avy amin’Andriamanitra kosa izao, dia tsy ho vitanareo ny handrava azy​—sao dia ho lasa mpiady amin’Andriamanitra ianareo.”​—As 5:34-39.