BITYNIA

(Bitynìa).

Faritany romanina tany amin’ny ilany avaratr’i Azia Minora, tany amin’ny faritra avaratrandrefan’i Torkia ankehitriny. Nanomboka teo Istanbul izy io no niantsinanana nanaraka ny morony atsimon’ny Ranomasina Mainty. Niezaka nankany Bitynia i Paoly sy Silasy ary Timoty tamin’ny dia misionera faharoa, saingy “tsy navelan’ny fanahin’i Jesosy.” (As 16:7) Tao Lystra i Timoty tamin’izay vao niaraka tamin’izy ireo. Tsy voalaza hoe nisy apostoly nitory tany Bitynia. Tena nisy Kristianina anefa tany, rehefa jerena ny taratasy voalohany nosoratan’i Petera tamin’ny taona 62-64 tany ho any. (1Pe 1:1) Nanoratra ho an’i Trajan mpanjaka romanina i Pline Zandriny, izay namita iraka manokana tany Bitynia. Nilaza izy fa maro ny Kristianina tao amin’ilay faritany, tany am-piandohan’ny taonjato faharoa, ka tsy tany an-tanàn-dehibe ihany no nisy ny Fivavahana Kristianina, fa tany amin’ireo “tanàna kely sy tany ambanivohitra koa.”​—Ireo Taratasy Nosoratan’i Pline, X, XCVI, 9.