BEDANA

(Bedàna).

1. Lehilahy nanafaka ny Israely tamin’ny fahavalo, ka tanisaina miaraka amin’i Gideona (Jerobala) sy Jefta ary Samoela. (1Sa 12:11) Tsy misy andinin-teny hafa anefa miresaka an’io Bedana io, sady tsy misy tantara miresaka momba azy koa. Hoy i C. Keil sy F. Delitzsch momba an’io andinin-teny io: “Tsy azo inoana mihitsy hoe hilaza anarana mpitsara iray i Samoela eo, nefa tsy ho voaresaka ao amin’ny bokin’ny Mpitsara mihitsy ilay olona satria fotsiny hoe tsy dia nisongadina.”​—Fanazavana ny Testamenta Taloha, 1973, Boky II, 1 Samoela, p. 118.

Misy milaza an’i Bedana ho i Baraka. Miresaka fanafahana lehibe mantsy ny andinin-teny manodidina ny 1 Samoela 12:11 sady mampahatsiahy ny fangejana nampiharin’i Sisera sy ny fanafahana taorian’izay, dia ilay fanafahana nampiasan’i Jehovah an’i Baraka. Tononina miaraka amin’i Gideona sy Jefta i Baraka ao amin’ny Hebreo 11:32. “Baraka” no ao amin’ny 1 Samoela 12:11 ao amin’ny Fandikan-teny Grikan’ny Fitopolo sy ao amin’ny Peshitta syriàka. Misy indray mihevitra an’i Bedana ho i Abdona Mpitsara.​—Jereo BARAKA.

2. Taranak’i Manase.​—1Ta 7:17.