Nanamboatra ny Lanitra sy ny Tany Andriamanitra

I Jehovah Andriamanitra no Mpamorona antsika. Izy no nanao ny zavatra rehetra, na ireny hitantsika ireny, na ny tsy hitantsika. Nanamboatra anjely be dia be aloha izy vao nanao an’ireny zavatra hitantsika ireny. Fantatrao ve hoe inona ny anjely? Zavaboary tsy hita maso hoatran’i Jehovah ry zareo. Ilay anjely noforonin’i Jehovah voalohany no nanampy azy, tamin’izy nanamboatra ny kintana, ny planeta, ary ny zavatra hafa. Anisan’ny planeta nataony ity tany tsara tarehy ipetrahantsika ity.

Nomanin’i Jehovah ny tany mba hipetrahan’ny biby sy ny olona. Nataony nanazava ny tany koa ny masoandro, dia avy eo izy nanao tendrombohitra sy ranomasina ary renirano.

Dia hoy i Jehovah taorian’izay: ‘Andeha hasiako bozaka maitso sy zavamaniry ary hazo eny ambonin’ny tany.’ Dia nisy voankazo sy legioma ary voninkazo isan-karazany nanomboka naniry tetỳ. Nanao biby be dia be izy avy eo. Tao ny nanidina, nilomano, nandady, ary nikisaka. Tao koa ny kelikely, ohatra hoe bitro, ary tao ny ngezabe, ohatra hoe elefanta. Inona no biby tianao indrindra?

Niteny tamin’ilay anjely voalohany noforoniny i Jehovah avy eo hoe: ‘Andao isika hanamboatra olona.’ Tsy hitovy amin’ny biby ny olombelona, satria hahavita hamorona zavatra, sady ho afaka hiteny sy hihomehy ary hivavaka. Hikarakara ny tany sy ny biby ry zareo. Iza àry ny olona noforonina voalohany? Fantatrao ve?