Bann Zanfan Zot “enn Leritaz Zeova”

KAN to tann mo “leritaz,” ki kitsoz sa fer twa panse? Kitfwa to pans kas, enn terin, ouswa enn lot kitsoz ki ena boukou valer, ki enn manb to fami inn donn twa. Alor, enn leritaz se enn kitsoz ki ena boukou valer, ek sirman to pou pran swin sa kitsoz-la.

Labib dir ki bann zanfan zot “enn leritaz Zeova.” (Ps. 127:3) Alor, bann paran ki kontan Zeova, zot konsider zot zanfan kouma enn kado ki ena boukou valer, ki Zeova inn donn zot. Ek zot fer tou seki zot kapav pou donn zot zanfan seki zot bizin pou ki zot kapav viv bien, zot ena enn bon lasante, zot ere, ek ki zot ena enn bon lamitie ar Zeova.

Malerezman, sertin paran azordi pa konsider zot zanfan kouma enn kado ki Bondie inn donn zot. (Iza. 49:15; 2 Tim. 3:1-3) Ena bann paran ki vremem anvi pran swin zot zanfan, selman zot gagn boukou difikilte pou fer sa. Ki bann difikilte sertin paran kapav gagne? Ki kitsoz Zeova anvi ki bann paran fer pou zot zanfan? Ek kouma bann paran kapav elve zot zanfan pou ki zot vinn bann adilt ki ere?

BANN DIFIKILTE

Bann presion ar zot fami ek zot kominote. Dan sertin pei, kan bann paran ena boukou zanfan, bann dimounn plis respekte zot. Akoz sa, sertin koup gagn boukou presion ar zot fami ek ar zot bann vwazin, pou ki zot gagn boukou zanfan, mem si kitfwa zot pa pou kapav pran swin sa kantite zanfan-la.
Zot trakase konsernan zot lavenir. Dan sertin pei, boukou zanfan mor zenn parski pena ase manze, pena ase dokter, ek ena boukou maladi. Akoz sa, sertin paran gagn boukou zanfan. Koumsa, mem si sertin parmi zot bann zanfan mor, leres pou reisi vinn bann adilt. Ena bann koup ki gagn boukou zanfan osi pou ki bann-la kapav pran zot swin kan zot vinn vie. Sa arive sirtou dan bann pei kot bann gouvernman pa donn okenn led bann vie dimounn.
Bann metod pou anpes bann madam tom ansint. Dan sertin pei, pena boukou opsion pou anpes bann madam tom ansint. Ek dan lezot pei, ena sertin opsion, par exanp bann konprime. Selman, bann konprime-la fay kalite ek bann madam per pou pran zot tansion zot tom malad ar sa. Ena bann pei kot ena bann opsion pou bann madam pa tom ansint, selman zot kout bien ser ek boukou dimounn pa kapav pey sa.a

KI KITSOZ ZEOVA ANVI KI BANN PARAN FER?

Enn fami dan enn park ek zot pe pas bann bon moman ansam. Papa-la pe ekout bien so tifi ki enn adolesan, ek mama-la pe zwe boul ar so ti garson. — Pas letan ar sak zanfan ki to ena

Donn zot zanfan seki li bizin. Zeova inn donn bann paran responsabilite pou pran swin zot zanfan ki miner. Li anvi ki bann paran travay dir pou zot donn zot zanfan manze, linz, ek enn plas pou reste. Li anvi osi ki bann paran fer ledikasion zot zanfan. Alor, bann paran Kretien bizin reflesi bien avan ki zot avoy zot zanfan fer so letid lwin ar zot. Olie sa, zot pou fer sir ki zot zanfan res kot zot ziska ki li vinn gran. Koumsa, zot pou kapav ansegn zot zanfan bann kitsoz ki pou ed li dan so lavi. Bann paran bizin osi pas letan ar sak zanfan ki zot ena. Koumsa, sak zanfan pou santi ki so paran interese ar li, kontan li, ek anvi protez li. Zeova pa demann bann paran pou vinn ris. Avredir, bann paran ki Zeova ti swazir pou elve so Garson Zezi, pa ti bann dimounn ris. Selman, zot ti travay dir pou ki zot kapav donn li seki li bizin.—Mat. 13:55, 56; Lik 2:24.

Prinsip Labib: “Avredir, si enn kikenn pa pran swin so prop fami, ek sirtou bann manb so prop lakaz, li’nn renie lafwa ek li pli pir ki enn dimounn ki pena lafwa.”—1 Tim. 5:8.

Zeova konpran ki bann paran kitfwa pou bizin ki enn kikenn ed zot kan zot vinn vie. Avredir, enn fason ki bann zanfan donn loner zot paran, se kan zot fer sir ki zot paran gagn led ki zot bizin kan zot vinn vie. (Ex. 20:12; 1 Tim. 5:4) Selman, pou zot fer Zeova plezir, bann paran bizin pans sirtou lor kouma zot pou pran swin zot zanfan, olie ki zot pans lor kouma zot zanfan pou pran zot swin.—2 Kor. 12:14.

Ed to zanfan pou aprann konn Zeova. Bann paran Kretien ena responsabilite osi pou ansegn zot zanfan pou kontan Zeova ek pou ador Li. Pou Zeova, samem kitsoz pli inportan ki bann paran bizin ansegn zot zanfan.—Det. 6:6, 7.

Prinsip Labib: “Kontign elve zot [bann zanfan] dan disiplinn ek dan bann lavertisman Zeova.”—Efe. 6:4.

ZEOVA ANVI ED TWA

Enn koup pe koze ansam dan zot lakaz. Lor latab devan zot, ena enn Labib ki ouver. — Koze ansam pou zot deside komie zanfan zot kapav gagne

Reflesi komie zanfan to pou gagne. Si to anvi gagn plizir zanfan, reflesi lor to sitiasion. Par exanp, eski to pou kapav nouri, abiy, ek ansegn plizir zanfan? Si to pa pou kapav, koz ar to konzwin pou zot deside komie zanfan zot kapav gagne. Ek pa bliye osi ki, ninport ki kantite zanfan zot desid pou gagne, zot pou bizin pran swin tou zot bann zanfan dan fason ki Zeova demann zot pou fer. Biensir, Zeova kone ki dan lavi, pa tou kitsoz pou pas kouma zot inn deside. (Ekle. 9:11) Selman, Li pou beni tou bann zefor ki zot fer pou zot vinn bann bon paran.

Prinsip Labib: “Bann plan enn kikenn ki travay dir vremem pou reisi, me tou bann ki tro prese pou azir vremem pou tom dan lamizer.”—Prov. 21:5.

“Si enn parmi zot anvi aranz enn latour, eski li pa pou asize avan ek kalkile komie sa pou kout li pou gete si li pou ena tou seki bizin pou fini sa?”—Lik 14:28.

Ed to fami pou met Zeova an premie dan zot lavi. To bizin fer sir ki servi Zeova, samem kitsoz pli inportan pou to fami. Si to deza ena bann zanfan, pran letan pou ed sakenn parmi zot pou kontan Zeova. Ed zot pou swiv bann renion ek pou met an pratik seki zot pe aprann. Fer to ladorasion an fami toule semenn. Montre to zanfan kouma pou prese. Pa demann to bann zanfan ki pli gran, to fami, ouswa enn lot dimounn pou fer sa bann kitsoz-la dan to plas. To zot paran, alor se to responsabilite pou fer sa. Li vre ki to pou bizin fer boukou zefor pou to ed to zanfan pou kontan Zeova, ek sa kapav pran boukou letan osi. Selman, kan to pou trouv to bann zanfan pe servi Zeova dan lazwa, sa pou rann twa ere.

Prinsip Labib: “Nanye pa kapav fer mwa plis kontan ki sa: ki mo tann dir ki mo bann zanfan pe kontign mars dan laverite.”—3 Zan 4.b

Fer Zeova konfians. Si to pe pans pou gagn bann zanfan, ouswa si to deza ena bann zanfan, to bizin ena konfians dan bann prinsip Zeova. Pou twa, bann prinsip Zeova bizin pli inportan ki bann koutim, bann tradision, ouswa seki bann dimounn dan to pei ek dan to kominote abitie fer.

Zimaz: 1. Enn mama ek enn papa pe asiz akote zot garson. Garson-la pe lev so lame pou donn enn repons. 2. Enn fami pe prese ansam dan teritwar. Papa-la pe prese ansam ar so tifi ki enn adolesan ek mama-la pe prese ansam ar so de lezot zanfan. — To bizin pran letan ek fer zefor pou ed to bann zanfan pou kontan Zeova

Si to desid pou pa gagn boukou zanfan, to kapav sir ki Zeova pou pran twa swin ek ki Li pou fer sir ki to gagn seki to bizin kan to vinn vie. Fode pa ki to konsider to zanfan kouma “enn plan retret,” mem si li normal ki bann dimounn dan to pei pans koumsa. Fode pa to panse ki to pa pou ena personn pou pran twa swin kan to pou vinn vie. Zeova inn promet ki Li pou pran twa swin, ek Li touletan tini so bann promes.—Zozwe 23:14.

Prinsip Labib: “Fer Zeova konfians avek tou to leker, ek pa kont lor to prop lintelizans. Dan tou seki to fer, mazinn li, ek li pou fer to bann sime vinn drwat.”—Prov. 3:5, 6.

“Mo ti enn zenom ek aster-la mo’nn vinn vie, me mo pa finn trouv enn dimounn zis ki’nn abandone, ni so bann zanfan ki pe rod dipin.”—Ps. 37:25.

“Alor, kontign met Rwayom Bondie ek so lazistis an premie, ek li pou donn zot tou sa bann lezot kitsoz-la.”—Mat. 6:33.

Bann zanfan zot bann kado ki ena boukou valer ki Zeova inn donn bann paran. Ek Zeova bien kontan kan Li trouv bann paran pran swin zot zanfan dan fason ki Li’nn demann zot pou fer. Alor paran, reflesi bien lor komie zanfan to pou gagne, fer bann prinsip Zeova pas avan bann koutim ek bann tradision, ek donn to zanfan seki li bizin pou ki li kapav viv bien, li ena enn bon lasante, li ere, ek ki li ena enn bon lamitie ar Zeova. Si to fer sa, to pou montre ki to bien kontan to zanfan ek ki to konsider li kouma “enn leritaz Zeova.”

Zot Pa Regret Desizion ki Zot Inn Pran

“Eski nou pou gagn plis difikilte si nou desid pou pa gagn boukou zanfan?” Boukou paran, ki res dan bann pei pov, poz zotmem sa kestion-la. Anou gete seki sertin papa ki res dan sa bann pei-la inn dir lor la.

Eski to’nn gagn presion ar lezot pou ki to gagn boukou zanfan?

“Wi, mem ar sertin frer ek ser dan lasanble. Enn koup ti dir nou, ‘Kifer to ena enn sel garson? Dan Lafrik, si to ena enn sel garson, se koumadir to pena zanfan. Ek si to ena de, se koumadir to ena enn sel.’ Mem apre nesans nou deziem zanfan, lezot ti kontign met presion lor nou.”—Jeremias

Eski to’nn gagn bann difikilte dan to lavi parski to pena boukou zanfan?

“Non. Okontrer, mo madam ek mwa nou’nn kapav okip pli bien nou bann zanfan lor plan materyel ek spiritiel. Nou’nn reisi fer sa parski nou pena boukou zanfan. Mwa, mo’nn grandi dan enn fami kot ti ena boukou zanfan, ek mo’nn trouve ki kantite difikilte mo papa ek mo mama inn gagne pou zot avoy nou lekol ek pou zot donn nou seki nou bizin.”—Jeremias

Ki to bann zanfan panse lor zot desizion pou pa gagn boukou zanfan?

“Nou de zanfan bien kontan. Zot inn trouve kouma bann zanfan ki viv dan bann fami kot ena boukou zanfan, gagn boukou difikilte parski zot bann paran pa’nn kapav donn zot seki zot bizin. Nou bann zanfan pa’nn gagn sa bann difikilte-la.”—Filipe

“Nou bann zanfan ti ere. Zot ti santi ki nou kontan zot ek ki nou ti pran zot swin. Souvan nou ti invit bann frer ek ser ki bien kontan Zeova, ek zot bon lexanp ti ankouraz nou pou fer plis pou Zeova. Ek azordi, nou pe trouv nou bann zanfan swiv zot lexanp.”—Carlos

Ki bienfe zot inn gagne parski zot pena boukou zanfan?

“Nou’nn kapav okip nou fami pli bien lor plan materyel. Mo ti pe fer enn travay ki ti pe pey bien, me sa fer trwa-z-an depi ki mo’nn perdi sa travay-la. Travay ki mo fer aster-la pa pey sa kantite la, me parski nou pena boukou zanfan, nou pa’nn gagn sa kantite difikilte-la pou nou pran nou fami swin.”—Jeremias

“Nou’nn kapav okip nou fami pli bien lor plan materyel ek spiritiel. Nou’nn kapav osi al servi dan bann landrwa kot ti bizin plis proklamater. Ek parski nou pa ti ena boukou zanfan, li ti pli fasil pou nou pas letan ar sak zanfan ek ki nou donn zot seki zot bizin. Tou nou bann zanfan pe servi Zeova ek zot ena bann bon lobzektif spiritiel.”—Lenadi

Eski ena kitsoz ki to ti pou kontan dir bann lezot paran?

“Mo’nn trouv Psom 34:10b realize. Sa verse-la dir: ‘Bann ki rod Zeova pa pou mank nanye ki bon.’ Ek Zeova inn vremem fer an-sort ki mo fami ek mwa nou gagn tou seki nou bizin.”—Rafael

a Se sak koup ki bizin deside si zot pou servi bann metod pou ki madam-la pa tom ansint, ek osi ki metod zot pou servi. Zot bizin osi deside komie zanfan zot pou gagne ek kan eski zot pou gagn bann zanfan. Kan enn mari ek so fam pran bann desizion koumsa, zot bizin rapel konsey ki ena dan 1 Korintien 7:3-5. Anplis, personn pena drwa ziz bann desizion ki zot pran. (Rom. 14:4, 10-13) Biensir, si madam-la fini tom ansint, fode pa ki li pran bann konprime ouswa ki li servi bann lezot metod pou touy anbriyon-la, parski si li fer sa, se enn lavortman ki li pe fer.

b Dan sa verse-la, kan Zan pe servi mo “zanfan,” li pe koz lor bann dimounn ar ki li’nn ansegn laverite ek ki’nn vinn bann disip Zezi. Bann paran Kretien ena mem santiman ki Zan anver zot bann zanfan ki servi Zeova.