Question Ki’nn Soulevé
◼ Eski bann Témoins de Jéhovah bizin distribué bann enregistrement ou-soit copie bann discours?
Bann discours basé lor la Bible fortifié nou ek encourage nou. (Actes 15:32) Alors li normal, ki nou envie partage sa avek bann dimoune ki pa ti present dan reunion. Zordi, grace a bann l’appareil moderne, li bien facile pou enregistré enn discours ek partage sa avek lezot dan zis deux-trois minute. Certain ena enn collection discours ki’nn enregistré, mem bann discours ki finn donné ena bien longtemps. Avek bann bon l’intention zot prete sa bann discours-la ou-soit zot copié sa pou zot bann camarade. Lezot finn mette sa bann discours-la lor bann site Internet kot n’importe kisannla kapav gagne sa pou lire.
Naturellement, li pa mauvais ki nou enregistré bann discours pou nou personnellement ou-soit pou bann membre nou famille. En plus, bann ancien kapav prend disposition pou enregistré bann discours pou bann membre la congregation ki zot la santé pa permette zot vinn reunion. Selman, ena bann bon raison kifer fodé pa distribué bann enregistrement ou-soit copie bann discours.
Souvent bann orateur faire bann discours dapré bann besoin local. A cause sa, nou kapav facilement mal interprete bann point dan enn discours ki finn enregistré parski nou pa koné dan ki circonstance li finn faire sa discours-la. En plus, li pou difficile pou nou pou verifié kisannla ti donne enn discours ek kan, pou ki nou kapav ena confiance ki seki pé dire li a jour ek li exact. (Luc 1:1-4) Si nou distribué bann copie ou-soit bann enregistrement bann discours, sa kapav tente certain pou donne trop l’importance ou-soit l’honneur enn orateur, ek orateur-la li aussi li kapav tenté pou accepté sa.—1 Cor. 3:5-7.
L’esclave fidele ek avisé travail dur pou donne nou “portion” nourriture spirituel ki nou bizin ek “dan ler ki bizin.” (Luc 12:42) Li prend bann disposition pou nou gagne bann discours dan nou congregation local ek pou nou kapav gagne bann enregistrement audio lor site Internet officiel jw.org. Nou kapav sur ki l’esclave fidele ek avisé ek so College central pou donne nou seki nou bizin pou nou reste fort dan la foi.—Actes 16:4, 5.