Nuvo Program Lasanble Rezyonal
Nu kapav defini lakrint kuma “enn profon respe” sirtu anver Bondye. Li enn bon lakrint ek dapre Labib, sa mem “kumansman lasazes.” (Psom 111:10) Par kont, ena enn lot kalite lakrint ki reyne dan lemond Satan ki otur nu. Kuma eski nu kapav evit sa move lakrint la ek an mem tan devlop enn lakrint ranpli ar respe pu Zeova? Nuvo program lasanble rezyonal pu lane servis 2002 tret sa kestyon la. Tem sa lasanble la, “Ena Lakrint Pu Bondye ek Donn Li Laglwar.” (Revelasyon 14:7) Nu pu konpran dan ki diferan fason lakrint pu Zeova kapav fer sakenn parmi nu tir profi personelman ek usi antan ki manb lorganizasyon.
Lakrint vedir usi gayn traka, perdi kuraz ek ezite pu fer fas avek bann difikilte. Purtan, Labib dir: “Ere seki ena lakrint pu Zeova.” (Psom 128:1) Sa program lasanble la pu montre nu kuma nu kapav fer fas ar bann sityason difisil ki nu gayne akoz vre ladorasyon. Nu pu truve kuma pu ed bann nuvo pu devlop enn bon kalite lakrint pu Bondye, pu ki an retur sa pus zot pu ena dezir pu servi Li avek tu zot leker, tu zot nam, tu zot lespri, ek tu zot lafors. (Mark 12:30) Program premye zur pu fini avek diskur sirveyan distrik. Tem diskur la li, “Vinn Pli Pros ar Bann Ki U Kontan.” Li pu explik nu ki manyer nu kapav reziste kont bann zefor ki Satan pe fer pu deturn nu ar Zeova, ar nu fami, ek ar nu bann frer Kretyin.
“Ena Lakrint pu Zeova, Pa pu Bann Dimunn,” sa li tem enn diskur an kat parti ki pu fer dezyem zur. Li pu explike kifer ek kuma nu bizin sirmont tu lakrint ki kapav anpes nu akonpli net nu minister, uswa ki kapav anpes nu res fidel ek gard enn bon konsyans dan lekol ek dan travay. Diskur piblik, “Ena Lakrint Pu Bondye ek Gard So Bann Komannman” li baze lor plizir levennman ki arive enn apre lot, ki dekrir dan Revelasyon sapit 14. Nu lasanble rezyonal pu fini avek enn lankurazman pu “Kontiyn Mars dan Lakrint Zeova.”
Lekol Minister Teokratik, enn Reynion Servis model, diskur batem, ek rezime Letid La Tour de Garde, tusala zot bann parti inportan sa program la ek ki sirman u pa pu anvi rate. Invit u bann letid pu asiste lasanble ansam avek u. Tu seki anvi batize bizin dir sirveyan prezidan plito posib. Nu tu, nu pu anvi montre nu lakrint pu Zeova ek donn Li laglwar. Alor pu sa, nu pu bizin pa rat okenn parti sa program interesan la.