Kumans Bann Letid Avek Brosir Ki Bondye Pe Demann Nu?
1 Bann rapor ki sorti dan lemond antye montre ki brosir Ki Bondye Pe Demann Nu? li enn bon zuti pu anseyn dimunn laverite. Sak semenn bann milye letid Labib pe kumanse avek sa brosir la. Eski u pe gayn bon rezilta kan u kumans letid uswa kan u fer letid avek brosir Ki Bondye Pe Demann Nu?
2 Alor ki buku proklamater truv li fasil pu plas sa brosir la, sertin truv li difisil pu kumans enn letid. Ki metod ki donn bon rezilta lezot finn servi pu kumans bann letid Labib avek brosir Ki Bondye Pe Demann Nu? Ala detrwa sigzesyon ki kapav ed nu.
3 Montre Kuma enn Letid Derule: Li bon avantu ki nu les dimunn la swazire dan ki lang li ti pu kontan etidye. Pu bann ki gayn difikilte avek Franse, nu kapav fer letid dan brosir an Kreol. Sertin lir Franse byin, me zot konpran plis zot letid si fer li dan brosir Kreol. Kan nu zwenn dimunn la premye fwa, uswa dan enn vizit, olye ki nu zis propoz li letid, anu montre li kuma enn letid Labib derule. Kumsa, sa pu anlev sa mister uswa ezitasyon ki bann dimunn ena kan zot tann sa mo “letid” la. Enn fwa ki nu finn aprann fer sa, nu pu truve ki avek enn sinp lintrodiksyon, nu kapav kumans enn letid.
4 Preparasyon Byin Inportan: Nu lantuzyas pu kumans bann letid depann lor preparasyon ki nu finn fer. Si nu byin prepare an avans, nu pa pu ezite pu diriz bann letid. Si nu repet nu prezantasyon plizir fwa, nu pu gayn fasilite parol, ek nu pu pli kapav koz dan nu prop mo ek dan enn fason natirel. Nu pa pu santi presyon lor nu, ek dimunn la usi pu santi li alez.
5 Kan u pe repete kot u, li bon u not komye letan u pran pu ki u fer dimunn la kone komye letan sa demonstrasyon la pu dire. Apre ki enn frer finn prezant li mem, li dir: “Mo ti pu kontan montre u kuma nu fer letid gratis avek bann dimunn. Eski mo kapav gayn detrwa minit ar u?” Zisteman, si nu servi Leson 1 dan brosir Ki Bondye Pe Demann Nu?, sa pu pran nu selman detrwa minit. Byinsir, u kapav lir zis bann verse ki u finn swazire. Me, si u fini premye leson la dan zis detrwa minit, dimunn la pu reysi fer lexperyans so premye letid. Apre sa, u kapav fer li kone ki u pu egzaminn Leson 2 kan u returne ek sa pu pran apepre 15 minit.
6 Sa prezantasyon la finn donn bann bon rezilta:
◼ “Mo ti pu kontan donn u enn demonstrasyon sinp, me rapid kuma fer enn letid Labib avek brosir Ki Bondye Pe Demann Nu? Buku finn truve ki pandan 16 semenn—15 minit par semenn—zot kapav gayn bann repons baze lor Labib pu bann kestyon inportan.” Montre dimun la bann leson ki ena dan brosir la. Montre Leson 1, ek dir: “Si u donn mwa detrwa minit, mo ti pu kontan montre u kuma fer sa. Tem Leson 1 li, ‘Kuma U Kapav Kone Ki Bondye Pe Demande.’” Apre sa, lir sa trwa kestyon la, ek explik bann nimero ki ena dan braket. Lir paragraf 1, ek montre dimunn la kuma truv repons la. U kapav invit dimunn la pu lir paragraf 2. Apre, u kapav dir: “Dapre seki u finn lir, kuma u pu reponn sa kestyon la? [Lir kestyon la ankor enn fwa, ek les dimunn la reponn.] U pu truve ki dan sak paragraf ena bann verse Labib. Sa bann verse la atir nu latansyon lor repons ki Labib done pu sa bann kestyon la. Par egzanp, anu lir 2 Timote 3:16. 17 ek anu gete kuma li apiy sa repons ki u finn done konsernan sa kikenn ki finn fer ekrir Labib.” Apre ki u finn fini lir paragraf 3, poz kestyon, ek lir Zan 17:3. Apre sa, reget avek dimunn la bann kitsoz ki li finn aprann dan Leson 1. Lerla, u kapav turn paz kot ena Leson 2. Lir dernye kestyon, “Par ki de fason nu kapav konn Bondye?” Demann dimunn la: “Kan eski u pu gayn detrwa minit pu nu egzaminn Leson 2 ek truv repons sa kestyon la?”
7 Li inportan ki u gard enn konversasyon sinp ek u felisit dimunn la otan ki posib. Kan u propoz dimunn la enn lot vizit, olye ki u demande sipa li ti pu kontan kontinye, ankuraz li plito pu fer parey pu prosin leson. Fer li kone ki u pu revini. Sertin proklamater finn mem propoz pu fer Leson 2 lor telefonn si pa kapav zwenn dimunn la. U kapav usi ankuraz li pu gard byin so brosir pu ki lot ku li kapav gayn li pu etidye.
8 U Bizin Byin Determine: Mem si preparasyon li inportan, ek mem si nu pe bizin fer letid dan brosir Kreol, nu bizin usi byin determine pu kontiyn letid la. Li pa tuzur fasil pu fer enn leson dan detrwa minit. Alor fer u enn devwar pu pratike otan ki u kapav pu ki kumsa u ena laparol fasil kan u pe fer demonstrasyon ar dimunn la.
9 Si u met sa bann sigzesyon la an pratik, u’si, u pu kapav gayn privilez pu ed enn kikenn pu mars lor simin lavi, kan u pu fer letid avek li dan brosir Ki Bondye Pe Demann Nu?—Matye 7:14.