La source le mal demaské!

DAN premier siecle, beaucoup Juif ti pé attann Messie ki Bondié ti’nn promette. (Jean 6:14) Kan Jésus ti vini, li ti amenn reconfort ek li ti aide bann dimoune pou comprend pli bien Parole Bondié. Li ti gueri bann malade, li ti donne mangé bann dimoune ki ti faim, li ti ena control lor bann condition le temps, li ti mem releve bann dimoune mort. (Matthieu 8:26; 14:14-21; 15:30, 31; Marc 5:38-43) Li ti aussi koz lor seki Jéhovah inn dire ek li ti faire konn promesse la vie eternel. (Jean 3:34) Par seki li ti faire ek seki li ti dire, Jésus ti montré bien ki li-mem Messie, sa kikenn ki ti pou libere bann dimoune ar peché ek tou so bann mauvais consequence-la.

Li ti logik pou attann ki bann chef religieux juif, zot ti pou parmi bann premier ki ti pou accueillir Jésus, ti pou ecoute li ek ti pou content pou accepté so direction. Mais, c’est pa sa ki zot ti faire. Au contraire, zot ti ena la haine pou li, zot ti persecute li, ek zot ti comploté pou touye li!—Marc 14:1; 15:1-3, 10-15.

Jésus ti ena raison pou condamne zot; c’est sa-mem ki zot ti merité. (Matthieu 23:33-35) Mais, li ti reconette ki ti ena enn lot kikenn ki ti responsable pou le mal ki ti ena dan zot leker. Li ti dire zot: “C’est Satan le Diable ki zot papa, ek zot oulé faire seki li envie. Kan li ti commencé, li ti enn criminel. Li pa’nn tini ferme dan la verité parski la verité pa dan li. Kan li koz menti, li koz dapré so prop tendance, parski li enn menteur ek li-mem ki ti commence koz menti en premier.” (Jean 8:44) Mem si Jésus ti reconette ki bann dimoune kapav faire bann mauvais kitsoz, li ti montré ki c’est Satan le Diable, li-mem ki la source le mal.

Kan li ti dire ki Satan “pa’nn tini ferme dan la verité,” Jésus ti faire koné ki sa creature spirituel-la ti’nn deja enn serviteur fidel Bondié mais li ti abandonne sa bon chemin-la. Kifer Satan ti rebellé kont Jéhovah? Parski li ti pensé ki li ti trop important ek sa ti amenn li ziska envié l’adoration ki zis Bondié tousel merité.a—Matthieu 4:8, 9.

Rebellion Satan ti manifesté dan jardin Éden kan li ti trompe Ève ek li ti dire li mange sa fruit ki Jéhovah ti defann-la. Kan li ti koz premier mensonge ek li ti gate reputation Jéhovah, Satan ti faire li-mem vinn sa kikenn ‘ki ti commence koz menti en premier-la.’ En plus kan li ti tente Adam ek Ève pou desobeir Bondié, li ti faire ki peché domine zot ek cause zot la-mort ek la mort zot bann descendant. C’est coumsa ki Satan inn faire li-mem vinn aussi “enn criminel”—oui, pli grand criminel ki jamais finn ena!—Genèse 3:1-6; Romains 5:12.

Satan finn ena enn mauvais l’influence mem dan le ciel, kot li’nn pousse bann lezot ange pou joinde ensam avek li pou revolté kont Jéhovah. (2 Pierre 2:4) Pareil couma Satan, sa bann mauvais l’esprit-la ti interesse-zot dan enn fason ki pa bon ar bann dimoune lor la terre. Mais sa bann mauvais l’esprit-la, zot, zot inn developpe enn l’interet sexuel ki kont nature ek ki’nn ena bann mauvais consequence.

Le mal rempli la terre

La Bible dire nou: “Kan bann dimoune ti commence augmenté . . . ek ki zot ti gagne bann tifi, lerla bann garson vrai Bondié ti remark sa bann tifi-la ek ti trouve zot bien joli; ek zot ti commence prend bann femme pou zot, setadir tou seki zot ti choisiré.” (Genèse 6:1, 2) Kisannla sa ‘bann garson vrai Bondié-la’? Zot ti bann creature spirituel, pa bann dimoune. (Job 1:6; 2:1) Couma nou koné? D’abord sa faire apepré 1,500 an ki bann dimoune ti pé marié entre zot ek pa ti ena okenn raison pou mentionne mariage ici coumadir li ti enn kitsoz special. Alors kan la Bible attire l’attention lor sa l’union sexuel-la—“bann garson vrai Bondié” ki ti prend lekor dimoune ek ki ti marié ar “bann tifi” lor la terre—li pé koz lor enn kitsoz ki pa normal ek ki jamais pa ti’nn arrivé avant.

Bann zenfant ki ti né apré sa bann mariage-la montré bien ki sa pa ti enn mariage normal. Ti appel sa bann zenfant-la bann Nephilim ek zot ti vinn bann geant letan zot ti grandi. Zot ti aussi bann mauvais brite. Avredir, “Nephilim” vedir “bann ki faire lezot tombé.” La Bible dire ki zot ti “bann zom fort dan lepok longtemps, bann zom ki tou dimoune ti koné.”—Genèse 6:4.

Bann Nephilim ek zot bann papa ti vinn bien mauvais—jamais pa ti’nn ena mauvais dimoune coumsa avant. Genèse 6:11 dire: “Vrai Bondié ti trouvé ki la terre ti pé gaté ek ki li ti rempli ar violence.” Oui, bann dimoune ti adopté bann maniere vive ki sa bann ki ti’nn fek vinn parmi zot-la ti ena; zot ti vinn violent ek immoral.

Couma eski bann Nephilim ek zot bann papa ti ena enn grand l’influence coumsa lor bann dimoune? Zot ti servi tendance ek desir ki bann dimoune ena pou faire peché. Resultat? “Tou dimoune ti’nn gate zot maniere vive lor la terre.” Finalement, Jéhovah ti detruire sa lé-monde-la dan enn grand deluge ek Li ti sap zis Noé ki ti enn dimoune droite, ensam avek so famille. (Genèse 6:5, 12-22) Bann ange ki ti’nn prend lekor dimoune, zot, zot ti retourne dan le ciel mais zot ti nepli ena faveur Bondié. Sa bann demon ki ti’nn perdi zot position-la, ti contigne oppose kont Bondié ek kont bann ange fidel ki ti forme partie dan famille Bondié ki ti juste. Li parette ki depuis sa, Bondié ti defann sa bann mauvais l’esprit-la pou reprend enn lekor physik ek vinn lor la terre. (Jude 6) Zot finn reste kan-mem enn la-force puissant ki influence bann kitsoz ki deroulé lor la terre.

Sa kikenn ki mauvais-la demaské net

Premier Jean 5:19 faire nou koné ziska ki point Satan influence le monde. Li dire: “Le monde entier li dan pouvoir sa kikenn ki mauvais-la.” Satan pé manipule bann dimoune pou ki zot konn enn tralé malheur ki contigne augmenté. Avredir, li pli decidé ki jamais pou faire di-tort. Kifer? Parski apré ki Royaume Bondié inn etabli dan le ciel en 1914, Jésus inn tire li ek so bann demon dan le ciel. La Bible dire: “Malheur pou la terre . . . , parski Satan finn desann vers zot; li dan enn grand colere parski li koné ki li ena zis enn tigit lé-temps-mem.” (Révélation 12:7-12) Alors couma Satan influence bann dimoune zordi?

Satan faire sa surtout kan li encourage enn l’attitude ki dirige fason pensé ek fason agir bann dimoune. A cause sa-mem, Éphésiens 2:2 appel Satan “chef lor pouvoir ki l’air ena, sa l’esprit [ou-soit, l’attitude ki dominé] ki pé agir asterla dan bann garson desobeissance.” Au lieu li encourage bann dimoune pou ena la crainte pou Bondié ek pou faire seki bien, sa “l’air” ki sorti kot bann demon-la encourage zot pou rebelle kont Bondié ek kont so bann principe. Bann dimoune faire le mal, mais Satan ek so bann demon encourage sa lé-mal-la ek zot faire sa lé-mal-la vinn pli grave encore.

“Protege to leker”

Enn fason ki sa ‘l’air-la’ manifesté, c’est par pornographie ki faire bann dimoune developpe plus bann desir sexuel ki pa bon ek ki faire bann pratik anormal parette attirant. (1 Thessaloniciens 4:3-5) Parmi bann kitsoz ki pornographie mette en avant dan bann divertissement ena bann scene viol, violence sexuel, viol collectif, bestialité, ek bann scene kot abuse bann zenfant. Mem dan so bann forme ki moins dangereux, pornographie faire di-tort bann ki lire ou-soit guette sa bann kitsoz-la. Li faire zot vinn dependant lor la, ek li faire bann spectateur vinn bann “bhaye looké.”b Sa li enn mauvais kitsoz ki affecté relation ki enn dimoune ena avek lezot ek aussi so relation avek Bondié. Bann demon encourage pornographie ek sa li reflete mentalité bien immoral ki zot ena, zot ki bann rebelle ki ti ena bann desir sexuel kont nature depuis lepok Noé avant deluge.

Salomon ki ti sage ti ena raison pou donne sa conseil-la: “Plus ki tou kitsoz ki to bizin protegé, protege to leker, parski ladan-mem ki bann la-source la vie sorti.” (Proverbes 4:23) En pli simple, protege ou leker kont piege pornographie kapav vedir change chaine television ou-soit teigne ou computer si ena bann zimage malprop lor l’ecran. Li bien important ki ou agir dé-suite ek avek determination! Maziné ki ou enn soldat ki pé essaye evite enn fleche ki pé dirige droite lor ou leker. Satan vise ou leker symbolik—kot ena tou ou mobile ek ou bann desir—ek li rod faire ou leker vinn mauvais.

Ou bizin aussi protege ou leker pou ki ou pa content la violence parski Satan koné ki “[Jéhovah] ena vrai-mem la haine pou enn kikenn ki content la violence.” (Psaume 11:5) Li pa necessaire ki Satan faire ou vinn enn kikenn ki faire bann kitsoz violent pou faire ou vinn l’ennemi Bondié. Li zis bizin faire ou vinn enn kikenn ki content la violence dan ou leker. Li pa par hasard ki souvent partout lor television, radio, journal ek Internet, ena la violence ensam avek bann pratik spiritisme. Bann Nephilim inn mort, mais zot bann vilain defaut ek conduite encore là! Eski bann distraction ki ou choisir montré ki ou pé resisté kont seki Satan pé rod faire?—2 Corinthiens 2:11.

Couma resisté kont mauvais l’influence Satan

Li kapav parette bien difficile pou faire face ar bann la-force le mal. La Bible faire ressorti ki bann ki pé faire tou zot possible pou faire Bondié plaisir “bizin lutté . . . kont bann mauvais l’esprit,” en plus ki zot pé lutté kont zot prop l’imperfection. Pou gagne sa la-lutte-la ek aussi faveur Bondié, nou bizin profite tou bann disposition ki Bondié prend.—Éphésiens 6:12; Romains 7:21-25.

Parmi sa bann disposition-la ena l’esprit saint, la force ki pli puissant dan l’univers. L’apotre Paul ti dire bann premier chrétien: “Nou pa finn recevoir l’esprit le monde, mais l’esprit ki sorti kot Bondié.” (1 Corinthiens 2:12) Bann ki dirigé par l’esprit Bondié aprann content seki Bondié content ek ena la haine pou seki Bondié pa content. (Amos 5:15) Couma enn kikenn kapav recevoir l’esprit saint? Surtout par la priere, par l’etude la Bible ki’nn ecrire grace a l’esprit saint, ek par bon frequentation ki nou ena avek bann ki vrai-mem content Bondié.—Luc 11:13; 2 Timothée 3:16; Hébreux 10:24, 25.

Kan ou profite bann disposition ki Bondié prend, ou commence mette “l’equipement complet ki Bondié donné,” sel protection sur kont bann “manigance Satan le Diable.” (Éphésiens 6:11-18) Jamais li pa’nn aussi urgent ki sa pou profite sa bann disposition-la autant ki possible. Couma pou faire sa?

Ena so jour kot le mal pou disparette

Enn ecrivain Psaume ti dire: “Kan bann mauvais dimoune germé couma bann plante, ek tou bann ki pratik seki pa bon fleuri, c’est pou ki kapav detruire zot pou touletan.” (Psaume 92:7) Oui, zordi le mal pé augmenté pareil couma dan lepok Noé. Sa li enn preuve ki jugement Bondié pa pou tardé pou arrivé. Sa jugement-la, li pa zis kont bann dimoune ki mauvais, mais aussi kont Satan ek so bann demon. Avant ki Satan ek so bann demon detruire, pou jette zot dan enn grand trou symbolik kot zot pa pou kapav faire nanyin. (2 Timothée 3:1-5; Révélation 20:1-3, 7-10) Kisannla ki pou amenn sa jugement-la lor zot? Pena personne a part Jésus Christ, lor ki la Bible dire: “C’est pou sa raison-la ki Garson Bondié finn manifesté, pou detruire seki Satan finn faire.”—1 Jean 3:8.

Eski ou pé attann avek impatience ki le mal disparette? Si oui, prend courage dan bann promesse ki ena dan la Bible. Pena okenn lot livre ki demaské source le mal, Satan, ek pena okenn lot livre ki montré couma li ek tou so bann mauvais action pou detruire. Nou encourage ou pou gagne connaissance exact lor la Bible pou ou kapav protege-ou kont bann mauvais l’influence Satan depuis asterla-mem ek pou ou gagne l’assurance ki ou pou kapav vive dan enn lé-monde kot le mal nepli pou existé.—Psaume 37:9, 10.

[Note]

[L’encadré, page 6]

Bann zistoire ki basé en partie lor enn kitsoz ki vrai

Bann demi-dieu, bann geant ek enn deluge ki ti detruire partout—c’est seki mentionné dan bann zistoire longtemps ki raconté partout dan le monde. Par exemple, enn poem longtemps ki raconte la vie Gilgamesh, enn Akkadien, mentionne enn deluge, enn bateau ek bann dimoune ki ti sapé dan sa deluge-la. Sa recit-la decrire Gilgamesh couma enn demi-dieu (enn partie bondié, enn partie dimoune) ki immoral ek violent. Zistoire bann Aztèque koz lor enn lé-monde ki ti existé bien longtemps ek kot ti ena bann geant ek li mentionne enn grand deluge. Enn zistoire longtemps dan Scandinavie koz lor enn race geant ek enn zom sage ki ti appel Bergelmir ki ti construire enn grand bateau pou li sap so la-vie ek la vie so madame. Kan nou joinde tou sa bann temoignage-la ensam, sa confirme seki la Bible dire, setadir ki tou bann dimoune, zot descendant bann ki ti sapé dan enn deluge ki ti detruire enn lé-monde mauvais ki ti existé bien longtemps.

[Zimage]

Tablette kot inn ecrire zistoire Gilgamesh

[Remerciement photo]

The University Museum, University of Pennsylvania (neg. # 22065)

[Zimage, page 5]

Zordi bann dimoune ena mem vilain defaut ki bann Nephilim

[Zimage, page 7]

Connaissance exact donne nou la force pou resisté kont bann mauvais l’influence