Le mal—Eski pa kapav control li?

Enn ti garson curieux ramasse enn kitsoz lor enn terrain—li ramasse enn mine. Sa explosé ek ti garson-la vinn aveugle, li defiguré ek li handicapé pou la vie. Enn mama abandonne so ti-baba ki fek né; li cachiette li dan saleté ki’nn jetté dan bord chemin. Enn kikenn ki’nn perdi so travail retourne kot li ti pé travail, li touye tou dimoune ki li joinde avek enn fusil, ek apré li touye li-mem. Enn dimoune ki bien respecté abuse bann zenfant ki sans defense.

LI TRISTE pou dire ki zordi nou tann sa qualité kitsoz-la bien souvent. Li encore pli triste ki souvent sa bann qualité kitsoz-la parette banal comparé ar terrorisme ek bann la-guerre kot bann dimoune pé rod touye tou dimoune ki sorti dan enn certain race. Enn journal ki ti publié en 1995 ti dire ki “dan so bann moment pli pire, nou kapav appel sa dernier cent an-la, siecle Satan. Jamais avant sa, bann dimoune pa finn montré enn tendance ek enn soif coumsa pou touye bann million lezot dimoune a cause race, religion ek classe social.”

En mem temps, bann dimoune pé pollué l’air, pé contamine la terre, pé fini so bann ressource, ek pé tellement touye bann zanimo ki ena certain ki’nn preské disparette. Eski bann dimoune kapav trouve enn solution pou tou sa lé-mal-la ek faire la terre vinn enn pli bon place ki pli en securité? Ou-soit eski si zot rod faire sa, li pou coumadir zot pé rod devide la mer avek enn cuvette. Enn professeur l’université ki’nn ecrire beaucoup lor sujet le mal ti dire: “Mo ti bien envie faire bann grand changement dan sa lé-monde-la, ameliore li. Mais le monde pa parette pé amelioré.” Kitfois ou aussi ou ena bann mem sentiment.

Nou kapav compare fason ki le monde pé allé zordi couma enn bateau ki pé navigué lor enn la-mer ki pé vinn pli mauvais ek pli dangereux chaque jour ki passé. Mem si personne pa envie al dan sa direction-la, tou bann zeffort ki pé faire pou change direction bateau-la pé tombe dan de l’eau. Bateau-la pé zis contigne dirige-li direct dan enn cyclone ki kapav amenn la mort ek ki personne pa kapav arreté.

Dan enn certain sens, c’est parski bann dimoune zot imparfait ki sa situation-la pé vinn pli pire. (Romains 3:23) Mais kan nou guetté ki quantité le mal existé, ziska ki point sa inn arrivé ek ki sa pa’lé arreté, tousala trop beaucoup pou nou dire ki c’est zis bann dimoune ki responsable. Eski li possible ki ena enn la-force ki nou pa kapav trouvé mais ki puissant ek mauvais ki pé manipule bann dimoune? Si oui, ki sa la-force-la sa ek couma nou kapav protege-nou? Prochain lartik pou reponn sa bann question-la.

[Remerciement photo page 3]