Couma ou kapav reussi
PAREIL couma bann parent prend soin zot zenfant ek envie ki zot reussi, nou Papa ki dan le ciel, Li aussi Li prend nou soin ek Li envie ki nou reussi dan nou la-vie. Pou montré nou ki Li prend nou soin avek tendresse, Li donne nou enn quantité renseignement lor seki reussi ou-soit pa reussi vedir. Avredir, kan la Bible koz lor enn dimoune ki prend compte seki Bondié dire, li donne nou sa l’assurance-la: “Tou seki li faire pou reussi.”—Psaume 1:3.
Si sa vrai, kifer beaucoup dimoune pa kapav reussi dan zot la-vie, trouve bonheur ek ena enn la-vie ki donne zot satisfaction? Si nou analyse seki sa psaume-la dire, nou pou gagne reponse pou sa question-la ek nou pou trouvé couma nou aussi nou kapav reussi dan la vie.
“Conseil bann mauvais dimoune”
Ecrivain Psaume averti nou kont danger pou marche dan “conseil bann mauvais dimoune.” (Psaume 1:1) Pli grand “kikenn ki mauvais,” c’est Satan le Diable. (Matthieu 6:13) La Bible dire nou ki li-mem ki “chef sa lé-monde-la” ek ki “le monde entier li dan pouvoir sa kikenn ki mauvais-la.” (Jean 16:11; 1 Jean 5:19) Alors li pa etonnant ki la plupart conseil ki nou gagné dan sa lé-monde-la, li reflete pensée Satan.
Ki qualité conseil bann dimoune mauvais donné? En general, bann mauvais dimoune “mank respé envers Bondié.” (Psaume 10:13) Nou entouré avek conseil bann mauvais dimoune ki pa prend compte Bondié ou-soit ki mank respé envers Li. Societé modern encourage “desir la chair, desir lizié,” li encourage dimoune pou “faire l’etalage ar seki so moyen permette li ena.” (1 Jean 2:16) Bann journal, radio, television ek Internet bombarde nou ar sa philosophie materialiste-la: “profite tou seki la vie kapav offert ou.” Dan le monde entier, bann compagnie depense plus ki 15 mille milliard roupie par an dan publicité pou convaink bann dimoune pou acheté zot bann produit—ki zot bizin sa ou-soit non. Sa bann publicité-la pa finn zis affecté seki bann dimoune acheté. Sa finn fausse fason ki le monde comprend seki sa mot reussi-la vedir.
Resultat: mem si zordi beaucoup dimoune ena bann kitsoz ki dé-trois l’année avant ti zis enn rêve pou zot, zot toujours envie gagne encore plus. Bann dimoune pensé ki tant ki zot pa gagne tou sa bann kitsoz-la, zot pa pou kapav heureux ou-soit zot pa pou kapav reussi dan zot la-vie. Sa fason pensé-la li pa vrai ek li “pa sorti kot nou Papa, mais sorti dan le monde.”—1 Jean 2:16.
Nou Createur koné seki pou faire nou vrai-mem reussi. So conseil pa pareil ar “conseil bann mauvais dimoune.” Alors, nou pa kapav rod faveur Jéhovah ek en mem temps faire couma le monde envie nou faire pou nou reussi. Si nou faire sa, li pou coumadir nou pé rod marche lor deux chemin different en mem temps. Sa li impossible. Ek c’est surement a cause sa ki la Bible donne sa l’avertissement-la: “Pa suive bann l’habitude le monde.”—Romains 12:2, Bible en français courant.
Pa laisse le monde influence ou
Le monde ki influencé par Satan, rod faire ou croire ki li interessé ar nou bien-etre. Mais nou bizin faire attention. Pa blié ki Satan ti trompe premier madame, Ève, pou servi so prop l’interet. Apré li ti servi li pou pousse Adam faire peché. Zordi aussi Satan servi bann dimoune pou fann so bann mauvais conseil.
Par exemple, David ki nou ti mentionné dan premier lartik, ti bizin faire overtime ek voyagé souvent pou so travail. Li ti dire: “Mo ti bizin allé boner lundi gramatin ek retourné jeudi soir.” Pou so bann bon camarade, bann membre so famille, so bann collegue travail, li ti necessaire ki li faire sa qualité sacrifice-la pou reussi dan le monde. Alors zot ti pousse li pou “faire sa pou to famille.” Zot ti dire li ki li ti ena pou faire sa zis pendant dé-trois l’année ziska ki li’nn bien etabli. David ti expliké: “Zot ti faire moi croire ki sa ti pou pli bon pou mo famille parski mo ti pou amenn pli beaucoup l’argent dan lakaz—mo ti pou reussi mo la-vie encore plus. Mo bann camarade ti faire moi croire ki en realité mo ti pé donne mo famille plus, mem si mo pa ti avek zot.” Beaucoup dimoune ki content zot famille pareil couma David pé travail dur pou donne zot famille tou seki zot pensé zot famille bizin. Mais eski suive sa qualité conseil-la pou faire enn dimoune reussi? Ki kitsoz enn famille bizin vrai-mem?
Alors ki li ti en voyage pou so travail, David ti decouvert seki so famille ti bizin vrai-mem. Li ti dire: “Mo ti lor telephone avek mo tifi Angelica, ki ti dire moi: ‘Papa, kifer to pa reste lakaz avek nou?’ ” David ajouté: “Sa ti faire moi gagne enn choque.” Seki so tifi ti dire, ti faire li envie donne so demission encore plus. David ti decidé pou donne so famille seki zot ti vrai-mem bizin—so presence, so lé-temps ek so l’attention.
Kan nou mette conseil Bondié en pratik, nou reussi
Couma ou kapav lutte kont sa bann fausse l’idée ki pé circulé partout dan lé-monde ek ki kapav trompe ou-la? Ecrivain Psaume dire nou ki enn dimoune reussi ek li heureux kan li trouve ‘so plaisir dan la loi Jéhovah, ek kan li lire doucement dan So la-loi la-nuit li-jour.’—Psaume 1:2.
Kan Bondié ti choisir Josué pou dirige nation Israël, Li ti dire li: “To bizin lire sa [Parole Bondié] doucement la-nuit li-jour.” Oui, li ti important ki Josué lire ek medite lor Parole Bondié, mais Josué ti bizin aussi “faire attention pou faire dapré tou seki [ti] finn ecrire ladan.” Bien-sur, zis lire la Bible pa pou faire ou reussi par magik. Ou bizin mette en pratik seki ou lire. Bondié ti dire Josué: “Lerla to pou reussi dan seki to faire ek to pou agir avek sagesse.”—Josué 1:8.
Mazinn enn zenfant ki pé assizé lor so papa ou-soit lor so mama ek ki pé faire enn sourire pendant ki zot toulé-deux pé lire enn so bann zistoire preferé. Mem comié fois zot finn lire sa avant, zot bien content sa bann moment ki zot passé ensam-la ek sa ena beaucoup valeur pou zot. Li pareil pou enn dimoune ki content Bondié, lecture la Bible toulé-jour, sa li enn kitsoz ki li bien content faire—enn bon moment ki li passé avek so Papa ki dan le ciel. Kan sa dimoune-la suive conseil ek direction ki Jéhovah donné, li vinn “pareil couma enn pié ki’nn planté dan bord bann canal de l’eau, ek ki rapporte fruit dan so saison. So feuillage pa fletri, ek tou seki li faire pou reussi.”—Psaume 1:3.
Pié ki sa ecrivain Psaume-la pé decrire, li pa zis grandi coumsa par hasard. Sa dimoune ki’nn plante sa pied-la inn prend la peine pou mette li kot ena de l’eau ek li’nn prend li bien soin. Nou Papa ki dan le ciel faire pareil avek nou. Li redresse ek Li corrige nou fason pensé par bann conseil ki ena dan la Bible. Resultat: nou prosperé ek nou produire bann fruit ki en accord avek conseil ki Bondié donne nou.
Mais, “bann mauvais dimoune, zot pa coumsa.” Li vrai ki zot parette pé prosperé pou enn lé-temps, mais sa pou mal fini pou zot. Zot “pa pou tini deboute kan pou ena jugement.” Plutot, “chemin ki bann mauvais dimoune prend pou disparette.”—Psaume 1:4-6.
Alors pa laisse le monde influence ou bann l’objectif ek ou bann principe. Kitfois ou ena capacité ek ou kapav reussi dan sa lé-monde-la. Mais faire attention couma ou servi ou bann talent ou-soit couma ou laisse le monde servi ou bann talent. Kan enn dimoune galope derriere bann kitsoz materiel ki dan vide, sa kapav faire li “fletri.” Parkont, kan li ena bon relation avek Bondié, sa pou faire li vrai-mem reussi ek trouve bonheur.
Couma ou kapav reussi
Kifer eski kan enn dimoune suive conseil Bondié, li reussi dan tou seki li faire? Ecrivain Psaume pa ti pé koz lor enn dimoune ki reussi dan sa lé-monde-la. Enn dimoune ki attaché ar Bondié ek ki envie reussi, bizin prend compte volonté Bondié—ek volonté Bondié li touletan reussi. Anou guetté couma ou kapav reussi kan ou mette en pratik bann principe la Bible.
La famille: La Bible encourage bann mari pou “content zot femme pareil couma zot prop lekor,” ek enn femme chrétien gagne l’ordre pou “ena enn profond respé pou so mari.” (Éphésiens 5:28, 33) La Bible encourage bann parent pou passe le temps avek zot zenfant, pou riye avek zot, ek pou enseigne zot bann kitsoz ki important dan la vie. (Deutéronome 6:6, 7; Ecclésiaste 3:4) Parole Bondié donne aussi sa conseil-la bann parent: “Pa enerve zot zenfant.” Kan bann parent mette sa conseil-la en pratik, li pli facile pou bann zenfant “obeir zot parent” ek “honore [zot] papa ek [zot] mama.” (Éphésiens 6:1-4) Kan bann famille suive sa bann conseil-la, zot reussi dan zot la-vie famille.
Bann camarade: La plupart dimoune envie ena camarade. Nou ena capacité mental ek affectif pou donne l’amour ek pou accepté l’amour ki lezot donne nou. Jésus ti dire so bann disciple ki zot bizin “content zot camarade.” (Jean 13:34, 35) Parmi bann disciple Jésus, nou trouve bann camarade ki nou kapav content ek ki nou kapav faire confiance—bann camarade avek ki Mnou kapav mem confié nou bann pensée ek bann sentiment pli profond. (Proverbes 18:24) Mais avant tou, kan nou mette en pratik bann principe la Bible, nou kapav “vinn proche ar Bondié” ek nou kapav mem vinn “camarade Jéhovah” pareil couma Abraham.—Jacques 2:23; 4:8.
Enn but dan la vie: Bann ki vrai-mem reussi dan zot la-vie, pa amenn enn la-vie sans okenn but, mais zot ena enn la-vie ki ena enn sens. Zot la-vie pa basé lor bann condition ki ena dan sa lé-monde-la ek ki pa stable. Zot bann l’objectif faire zot gagne enn vrai satisfaction ki duré, parski sa bann objectif-la fixé lor but la vie li-mem. Ki kitsoz ki donne enn dimoune enn but dan la vie? “Ena la crainte pou vrai Bondié ek garde so bann commandement. Sa-mem tou l’obligation ki enn dimoune ena.”—Ecclésiaste 12:13.
L’esperance: Kan Bondié Li nou Camarade, sa aussi donne nou enn l’esperance pou l’avenir. L’apotre Paul ti encourage bann chrétien “pou pa mette zot l’espoir dan bann richesse ki pena okenn garanti, mais dan Bondié.” Coumsa, zot ti pou “garde couma enn tresor pou zot-mem, enn bon fondation pou l’avenir, pou ki zot kapav bien saisi vrai la-vie.” (1 Timothée 6:17-19) Nou pou gagne sa vrai la-vie-la bientot kan Royaume Bondié pou faire la terre vinn enn paradi.—Luc 23:43.
Kan ou mette bann principe la Bible en pratik, sa pa vedir ki ou pou arrete gagne problem. Mais ou pou kapav evite beaucoup la-peine ek chagrin ki bann mauvais dimoune rodé zot-mem. David ki nou ti mentionné avant ek bann million dimoune couma li finn aprann l’importance pou mette en pratik bann principe la Bible dan zot la-vie. Apré ki li’nn gagne enn travail ki ena bann l’heure ki raisonnable, David ti dire: “Mo reconnaissant pou relation ki mo ena avek mo madame ek mo bann zenfant ek aussi pou privilege ki mo ena pou servi Jéhovah en tant ki ancien dan la congregation.” Li pa etonnant ki Psaume dire concernant sa dimoune ki prend compte conseil Bondié-la: “Tou seki li faire pou reussi”!
[L’encadré, page 6]
CINQ KITSOZ POU REUSSI
1 Lutté pou ki bann principe sa lé-monde-la pa influence ou.
Psaume 1:1; Romains 12:2
2 Lire ek medite lor Parole Bondié toulé-jour.
Psaume 1:2, 3
3 Mette bann conseil la Bible en pratik dan ou la-vie.
Josué 1:7-9
4 Faire Bondié vinn ou camarade.
5 Ena la crainte pou vrai Bondié ek garde so bann commandement.
[Zimage, page 6]
Eski ou pé faire sa bann kitsoz-la?