Reussi—Ki sa vedir pou ou?

POU certain, Jesse Livermore ti businessman Wall Street ki ti’nn pli reussi ki n’importe kisannla. Li ti acheté ek li ti vann bann action ek bann dimoune ti konn li couma enn kikenn ki prend bann bon decision dan sa domaine-la. Resultat: li ti vinn bien riche. Li ti mette bann costume pli bon qualité, li ti reste dan enn bel lakaz 29 la-chambre, li ti roule dan enn l’auto Rolls-Royce noir ek li ti ena so prop chauffeur.

Davida ti envie reussi, li aussi. Li ti vice-president ek directeur general dan enn grand firme art ki ti pou so compagnie, ek li ti pré pou vinn enn parmi bann president sa compagnie-la. David ti attiré par la richesse ek par sa grand position-la. Mais li ti prend enn decision ki ti faire li donne so demission. Li ti dire: “Mo koné ki jamais mo pa pou regagne enn travail coumsa encore.” Eski ou pensé ki David ti mal faire?

Pou beaucoup dimoune, reussi dan la vie vedir vinn riche, vinn populaire ou-soit vinn enn grand dimoune. Mais bann ki riche kitfois encore toujours senti enn vide dan zot la-vie ek zot toujours ena sentiment ki zot la-vie pena enn sens. M. Livermore ti dan sa cas-la. Mem si li ti riche, so la-vie ti rempli ar bann grand chagrin, bann malheur, ek la tristesse. Li finn passe par depression, li finn divorcé plusieurs fois, ek li pa finn ena bann bon relation avek so bann garson. Finalement apré ki li ti perdi enn bon partie so richesse, enn jour li ti assize dan bar enn grand l’hotel ek li ti plore lor tou seki li ti’nn perdi. Li ti demann enn drink, li ti tire so carnet en cuir ek li ti ecrire so madame enn note pou dire li adieu. Apré ki li’nn fini so verre, li’nn rente dan enn place kot ti garde bann manteau ek ki pa ti bien eclairé, ek li’nn touye li-mem par enn coup-de-balle.

Bann dimoune suicide-zot pou enn quantité raison. Mais sa l’experience-la montré nou ki sa bann parole ki ena dan la Bible-la, zot vrai: “Bann ki bien decidé pou vinn riche . . . finn pique-zot partout ar beaucoup douleur.”—1 Timothée 6:9, 10.

Pou beaucoup dimoune, reussi vedir la richesse, bel position, ou-soit grandeur. Eski li possible ki zot jugement faussé? Eski ou pensé ki ou, ou’nn reussi? Kifer? Ki kitsoz ki faire ou koné ki ou’nn reussi? Ki kitsoz ki influence ou jugement lor sa sujet-la? Prochain lartik pou examine bann conseil efficace ki’nn aide bann million dimoune pou reussi. Anou guetté couma ou aussi ou kapav reussi.

[Note]