Ou kapav vive pou toujours

La plupart dimoune ki croire dan n’importe ki religion, garde l’espoir pou gagne la vie eternel, dan enn fason ou-soit enn lot. Kitfois chaque religion croire dan so fason, mais au fond zot tou ena mem l’esperance—vive dan bonheur dan bann bon condition sans ki la mort menace zot. Eski c’est sa pa ki ou envie kitfois ou aussi? Kifer tou sa dimoune-la croire dan la vie eternel? Eski enn jour nou pou kapav vive pou toujours?

La Bible montré ki nou Createur inn mette sa desir pou vive pou toujours-la dan l’esprit bann dimoune depuis commencement-mem, kan Li ti crée premier couple humain. Li dire: “[Bondié] finn mette l’eternité dan zot leker.”—Ecclésiaste 3:11.

Mais, pou ki zot vive pou toujours couma zot ti envie, sa premier couple-la ti bizin accepté droit ki Bondié ena pou decidé seki bon ek seki mauvais. Si zot ti faire sa, Jéhovah ti pou trouvé ki zot merité pou vive “pou touletan” dan jardin Éden, l’endroit ki Li ti’nn preparé pou zot.—Genèse 2:8; 3:22.

Couma bann dimoune inn perdi la vie eternel

La Bible montré couma Bondié ti plante “pié connaissance bon ek mauvais” dan sa jardin-la, ek Li ti defann Adam et Ève mange fruit sa pié-la, sinon zot ti pou mort. (Genèse 2:9, 17) Adam et Ève ti pou montré Bondié ki zot ti reconette so l’autorité si zot pa ti mange sa fruit-la. Parkont si zot ti mange fruit-la, zot ti pou montré ki zot ti rejette l’autorité Bondié. Zot ti desobeir bann instruction Jéhovah ek zot ti al dan coté Satan, enn creature spirituel ki ti’nn rebelle kont l’autorité Bondié. Resultat: Bondié ti decidé ki Adam et Ève pa ti merite vive pou toujours.—Genèse 3:1-6.

Bondié ti donne zot enn choix: la vie ou-soit la mort—soit zot existé, ou-soit zot pa existé. Resultat zot desobeissance ti la mort, la fin zot l’existence. Li pa ti possible ki Adam et Ève ou-soit enn zot bann descendant contigne vive grace a enn potion magik ou-soit grace a enn nâme immortel.a

Tou bann descendant Adam inn souffert a cause so rebellion. L’apotre Paul ti explik bann consequence sa rebellion-la. Li ti ecrire: “Par enn sel zom, peché finn rente dan le monde ek peché finn amenn la mort, ek coumsa tou dimoune passe par la mort parski zot tou ti’nn faire peché.”—Romains 5:12.

Regagne la vie eternel

L’apotre Paul ti compare condition bann descendant Adam ar condition bann esclave dan premier siecle. A cause peché ki zot herité, bann zenfant Adam et Ève ti né couma bann “esclave peché,” ek zot pa ti pou kapav evite la mort. (Romains 5:12; 6:16, 17) Zot pa ti pou kapav evite sa, si Jéhovah pa ti servi enn moyen legal pou kapav acheté liberté sa bann esclave peché-la. Paul expliké: “Pareil couma par enn sel faute, (faute Adam) resultat ki tou sorte qualité dimoune finn gagné, c’est condamnation, pareil aussi par enn sel action justification, resultat ki tou sorte qualité dimoune gagné, c’est ki declare zot juste pou gagne la vie.” Sa ‘action justification-la’ inn amenn ziska sacrifice la vie parfait Jésus en tant ki enn humain couma “enn ranson ki corresponn, pou sauve tou dimoune.” Jéhovah ti reconette pouvoir legal ki ranson ti ena pou libere bann dimoune ar sa ‘jugement condamnation-la.’—Romains 5:16, 18, 19; 1 Timothée 2:5, 6.

A cause sa-mem, jamais bann scientifik pa pou trouve secret la vie eternel dan nou bann gène. Secret-la pa trouve dan nou. Dapré la Bible, raison pou kifer bann dimoune mort, li enn question moral ek legal, li pa trouve dan nou gène. Alors moyen pou regagne la vie eternel—la vie Jésus ki li’nn donné en sacrifice couma enn ranson—li aussi li enn kitsoz legal. La ranson, li montré aussi ki Bondié ena la justice ek l’amour fidel. Alors kisannla pou profite ranson ek gagne la vie eternel?

Don l’immortalité

Jéhovah existé “depuis touletan ek pou touletan.” Li immortel. (Psaume 90:2) Jésus Christ, li-mem premier ki’nn gagne don l’immortalité ar Jéhovah. L’apotre Paul dire: “Asterla ki li’nn relevé parmi bann mort, Christ nepli pou mort encore; la mort nepli ena okenn pouvoir lor li.” (Romains 6:9) Oui, kan Paul faire ressorti difference ki ena entre Jésus apré so resurrection ek bann dirigeant lor la terre, li dire ki Jésus tousel ena l’immortalité. Jésus pou reste “vivant pou toujours.” “Pa kapav detruire” so la-vie.—Hébreux 7:15-17, 23-25; 1 Timothée 6:15, 16.

Pa Jésus tousel ki gagne sa don-la. Bann chrétien ki’nn choisir pou regné dan le ciel, zot gagne enn resurrection pareil couma Jésus. (Romains 6:5) L’apotre Jean montré ki ena 144,000 dimoune ki gagne sa privilege-la. (Révélation 14:1) Zot aussi, zot gagne l’immortalité. Concernant zot resurrection, Paul dire: “La chair ek di-sang pa kapav herite royaume Bondié . . . Trompette pou sonné, ek bann mort pou relevé avek enn lekor ki pa kapav pourri, ek nou pou changé. Parski sa lekor ki pourri-la bizin mette enn ki pa kapav pourri lor li, ek sa lekor ki mortel-la bizin mette l’immortalité lor li.” La mort pena okenn pouvoir lor bann ki gagne sa resurrection-la.—1 Corinthiens 15:50-53; Révélation 20:6.

Sa kitsoz ki Bondié inn faire nou koné-la, li vrai-mem extraordinaire. Mem si bann ange zot bann l’esprit, Bondié pa finn crée zot immortel. Nou dire sa parski bann creature spirituel ki’nn suive Satan dan so rebellion, pou detruire. (Matthieu 25:41) Parkont, bann ki pou règne ensam avek Jésus, zot gagne don l’immortalité, ek sa li enn preuve ki Jéhovah ena enn confiance total dan zot fidelité.

Eski sa vedir ki zis 144,000 dimoune pou vive pou toujours, seki bien tigit comparé ar sa bann milliard dimoune ki finn vive lor la terre-la? Non. Anou guetté kifer.

La vie eternel dan enn paradi lor la terre

Livre Révélation dan la Bible presente enn joli scene kot ena enn la-foule ki nou pa kapav compté ki gagne la vie eternel dan enn paradi lor la terre. Ensam avek zot ena bann ki’nn mort mais ki’nn ressuscité ek ki’nn regagne la santé ek la force ki bann jeune ena. (Révélation 7:9; 20:12, 13; 21:3, 4) Finn amenn zot kot “enn la-riviere de l’eau la vie ki clair couma cristal, ek ki sorti dan trone Bondié.” Toute longue sa la-riviere-la ena “bann pié la vie . . . ek feuille sa bann pié-la ti pou guerison bann nation.” Jéhovah lance enn l’invitation: “Laisse n’importe kisannla ki soif vini, laisse n’importe kisannla ki envie, prend de l’eau la vie sans payé.”—Révélation 22:1, 2, 17.

Dan le passé, ti ena bann dimoune ki ti faire recherche pou decouvert enn potion magik ki ti pou permette zot vive pou touletan. Ti ena aussi bann explorateur ki ti rod enn la-fontaine kot zot ti croire zot ti pou gagne de l’eau ki ti pou faire ré-vinn jeune. Bann pié ek de l’eau ki mentionné dan livre Révélation, zot pena okenn rapport avek sa bann kitsoz ki bannla ti pé rodé-la. Zot represente plutot bann disposition ki Bondié inn prend par moyen Jésus Christ pou ki bann dimoune regagne bann condition parfait ki ti existé au commencement.

Bondié ti envie donne bann dimoune obeissant la vie eternel lor la terre. So projet pa finn changé; sa pou accompli, parski Jéhovah fidel. Psaume 37:29 dire: “Bann dimoune juste pou possede la terre, ek zot pou reste lor là pou touletan.” Sa promesse-la pousse nou pou dire ensam avek bann ki gagne l’immortalité dan le ciel: “Bondié Jéhovah, Tout-Puissant, seki to faire grand ek extraordinaire. Le Roi l’eternité, to bann chemin droite ek vrai. Kisannla pa pou ena vrai-mem la crainte pou toi, Jéhovah, ek kisannla pa pou glorifié to nom, parski to tousel, to fidel?”—Révélation 15:3, 4.

Eski ou envie gagne la vie eternel ki enn don ki ena grand valeur? Si oui, ou bizin montré ki ou fidel ek ki ou obeir “le Roi l’eternité.” Ou bizin aprann konn Jéhovah ek Jésus Christ, grace a ki la vie eternel inn vinn possible. Tou bann ki disposé pou accepté bann principe Bondié concernant seki bon ek seki mauvais, pou gagne don “la vie eternel.”—Jean 17:3.

[Note]