Dimoune pé faire bann recherche pou gagne la vie eternel
Depuis touletan, bann dimoune inn revé pou vive pou toujours. Pourtant, sa rêve-la jamais pa’nn realisé parski personne pa finn trouve enn moyen pou combatte la mort. Mais, bann nouveau recherche medical finn redonne l’espoir ki kapav permette dimoune vive bien pli longtemps. Anou guette bann different domaine kot bann scientifik pé faire bann l’etude lor sa sujet-la.
Bann biologiste pé faire bann l’experience lor enn enzyme, ki appel télomérase. Zot koné ki, sa quantité fois ki nou bann cellule kapav multiplié-la, li limité. Mais par sa l’experience-la zot pé essaye augmente sa. Zot koné aussi ki bann vié cellule li degradé avek le-temps, ek zot disparette. Lerla bann nouveau cellule vinn remplace zot. En realité, la plupart cellule dan nou lekor li renouvelé plusieurs fois pendant nou la-vie. Alors, dapré bann scientifik, si ti kapav contigne produire bann nouveau cellule, “nou lekor ti pou renouvelé pendant bien-bien longtemps, kitfois-mem pou touletan.”
Enn lot domaine kot bann scientifik pé faire bann recherche ek lor ki certain ena bann doute, c’est clonage. En theorie, sa method-la pou permette enn dimoune ki bizin faire enn transplantation lé-foie, lé-rein ou-soit leker, pou gagne enn nouveau l’organe ki so lekor pa pou rejeté ek ki exactement pareil ar seki li ena. Bann scientifik pense pou servi prop cellule patient-la pou produire sa bann nouveau l’organe-la.
Bann scientifik dan nanotechnologie (enn domaine kot zot faire bann l’appareil microscopik), finn prevoir ki enn jour zot pou mette enn robot, grosseur enn cellule, dan circulation di-sang enn dimoune pou rod bann cellule cancer ek bann microbe ki dangereux ek pou detruire zot. Certain croire ki sa recherche-la ensam avek bann traitement ki zot faire ar bann gène, pou kapav aide nou lekor fonctionné pou touletan.
Enn lot domaine c’est cryogénisation, setadir congele lekor bann dimoune mort. Zot faire sa pou conserve sa bann lekor-la ziska ki bann progré medical permette bann docteur pou gueri bann maladie, tire bann mauvais l’effet la vieillesse, ek redonne zot la-vie ek la santé. Enn magazine medical (American Journal of Geriatric Psychiatry) dire ki sa, “li enn method modern ki pareil couma seki zot ti pé faire avek bann momie longtemps dan l’Egypte.”
Bann dimoune inn touletan rod l’immortalité. Sa montré ki zot trouve sa difficile pou accepté ki enn jour zot pou mort. Eski enn jour bann dimoune pou kapav vive pou touletan? Ki la Bible dire lor la? Prochain lartik pou donne nou bann reponse.