Persekisyon Akoz Relizyon—Kifer?

ESKI u dakor ki persekit bann dimunn akoz zot relizyon? Sirman pa—antuka, tanki zot relizyon pa afekte drwa lezot dimunn. Purtan, persekisyon relizye inn egziste depi lontan ek li ankor tuzur egziste. Par egzanp, buku Temwin Zeova dan l’Europe ek dan diferan parti lemond, ti’nn suvan perdi drwa pu pratik zot relizyon. Pandan sa 50 dernye lane la, zot ti gayn bann tretman byin kriyel.

Dan sa peryod la, bann Temwin Zeova inn sufer akoz bann persekisyon kriyel ki ti organize kont zot. Pandan buku letan, tulede guvernman totaliter, setadir parti nasyonal-sosyalis ek parti kominis, ti’nn persekit zot dan l’Europe. Ki zot lexperyans montre nu lor persekisyon relizye? Ek ki nu kapav aprann lor fason ki zot inn reazir kan zot ti sufer?

“Pa Fer Parti dan Lemond”

Bann Temwin Zeova fer tu pu respekte lalwa, pu viv dan lape ek pu ena enn bon kondwit. Zot pa kont bann guvernman ni zot rod problem ar sa bann guvernman la. Zot pa anvi vinn bann martyr; donk, zot pa provok okenn sityasyon ki pu fer zot gayn persekisyon. Sa bann Kretyin la zot pa pran par pu okenn parti politik. Sa li an akor avek bann parol ki Zezi ti dir: “[Mo bann disip] pa fer parti dan lemond, parey kuma mwa mo pa fer parti dan lemond.” (Zan 17:16) Laplipar guvernman rekonet pozisyon bann Temwin Zeova konsernan politik. Me ena bann guvernman totaliter, setadir bann guvernman ki kontrol tu puvwar dan peyi ek ki obliz lepep pu sumet. Sa bann guvernman la pena okenn respe pu lord ki Labib donn bann Kretyin, setadir pu pa fer parti dan lemond.

Dan enn konferans ki ti fer dan Liniversite Heidelberg an Allemagne, an Novam 2000, ti explike kifer ena sa sityasyon la. Tem sa konferans la ti: “Repression and Self-Assertion: Jehovah’s Witnesses Under the National Socialist and Communist Dictatorships.” Dokter Clemens Vollnhals, ki travay dan Liniversite Hannah-Arendt-Institute for Research Into Totalitarianism (enn Liniversite ki fer bann resers lor bann guvernman totaliter), ti fer sa remark la: “Lotorite ki bann guvernman totaliter ena, pa konsern zis politik. Zot mem demann enn dimunn pu donn enn sumisyon total ar guvernman.”

Bann Kretyin pa kapav “donn enn sumisyon total” ar enn guvernman imin, parski zot inn angaz tu zot lavi pu res fidel ar zot Bondye Zeova tusel. Bann Temwin ki viv anba bann guvernman totaliter, inn truve ki suvan seki Guvernman demann zot fer, li kont zot lafwa. Ki zot inn fer dan sa bann sityasyon la? Suvan dan lepase, bann Temwin Zeova inn met an pratik sa prinsip ki bann disip Zezi ti dir la: “Nu bizin obeir Bondye kuma sef plito ki bann zom.”—Akt 5:29.

Plizir milye Temwin Zeova inn res fidel ar zot krwayans. Zot pa’nn pran par dan bann zafer politik mem si zot inn gayn enn persekisyon byin kriyel. Kuma zot ti kapav siport sa? Kot zot ti gayn lafors? Les zot reponn par zotmem. Ek les nu gete seki nu tu, ki nu enn Temwin uswa non, nu kapav aprann par zot lexperyans.

[Komanter lor paz 4]

Pandan lontan, bann Temwin Zeova an Allemagne finn sufer enn persekisyon byin kriyel anba tulede guvernman totaliter, ki ti egziste pandan Vintyem syek

[Komanter lor paz 4]

“Lotorite ki bann guvernman totaliter ena pa konsern zis politik. Me zot demann enn dimunn pu donn enn sumisyon total ar guvernman.”—Dr. Clemens Vollnhals

[Zimaz lor paz 4]

Fami Kusserow ti perdi zot liberte parski zot pa ti le abandonn zot lafwa pu fer seki guvernman ti dir

[Zimaz lor paz 4]

Johannes Harms finn truv lamor dan enn prizon Nazi, akoz so bann krwayans