Eski Mari Li Mama Bondie?

Seki Labib dir

Non, Labib pa dir ki Mari li mama Bondie, ni ki bann Kretien bizin ador li ouswa ena enn gran ladmirasion pou li.a Reflesi lor la:

• Zame Mari ti dir ki li mama Bondie. Labib dir ki li ti donn nesans “Garson Bondie” pa Bondie Limem.​—Mark 1:1, NW; Lik 1:32, NW.

• Zezi zame ti dir ki Mari ti mama Bondie ek ki li ti merit enn ladorasion. Enn fwa Zezi ti mem koriz enn madam ki ti donn Mari enn latansion spesial akoz Mari ti so mama. Zezi ti dir li: “Non, me plito: Ere bann dimounn ki tann parol Bondie ek ki obeir li!”​—Lik 11:27, 28, NW.

• Nou pa trouv bann expresion “Mère de Dieu” ek “Théotokos” (setadir ki donn nesans Bondie) dan Labib.

• Dan Labib, tit “Reine du ciel” pa aplik ar Mari me ar enn fos dees ki bann Izraelit aposta ti pe adore. (Zeremi 44:15-19) Li posib ki sa tit “Reine du ciel” la ti aplik ar Ishtar (ouswa Astarte), enn dees Babilonien.

• Zame bann premie Kretien ti ador Mari, ni ti donn li enn loner spesial. Dapre enn istorien, bann premie Kretien pa ti pou aksepte bann fos ladorasion. Zot ti per ki si zot ti donn Mari enn tro gran linportans, bann dimounn ti kapav asosie Mari ar sa fos dees la.”​—In Quest of the Jewish Mary.

• Labib dir ki Bondie finn touletan existe. (Psom 90:1, 2, NW; Izai 40:28) Alor, si Bondie zame finn ena enn koumansman, kouma li kapav ena enn mama? Anplis, Mari pa ti pou kapav sarye Bondie dan so vant parski Labib dir klerman ki mem lesiel pa ase gran pou Bondie.​—1 Lerwa 8:27.

Mari​—Mama Zezi pa “Mama Bondie”

Mari ti enn Zwif depi so nesans ek li ti enn desandan direk Lerwa David. (Lik 3:23-31, NW) Li ti ena enn gran faver devan Bondie akoz so lafwa ek so latasman pou Bondie. (Lik 1:28, NW) Bondie ti swazir li pou vinn mama Zezi. (Lik 1:31, 35, NW) Li ek so misie Zozef ti ena lezot zanfan.​—Mark 6:3, NW.

Mem si Labib montre ki Mari ti vinn enn disip Zezi, Labib pa donn lezot detay lor li.​—Zistwar Bann Apot 1:14, NW.