Eski Bondie Existe?

Seki Labib dir

Wi, Labib donn bann prev konvinkan ki Bondie existe. Li ankouraz nou pou ena lafwa dan Bondie. Sa pa vedir ki nou pou krwar tou seki bann relizion ansegne, me nou bizin servi nou “kapasite pou rezone” ek nou “lintelizans.” (Romin 12:1; 1 Zan 5:20, NTKM) Anou examinn bann diferan rezonnman ki baze lor Labib.

• Ena enn liniver kot ena lavi ek ki an-ord, ek sa montre klerman ki ena enn Kreater. Labib dir: “Tou lakaz, li konstrir par kikenn, me Bondie limem konstrikter tou kiksoz.” (Ebre 3:4, NTKM) Mem si se enn rezonnman sinp ek lozik, boukou dimounn ki ena enn gran ledikasion trouve ki sa rezonnman-la ena boukou pwa.a

• Antan ki bann imin, nou’nn ne avek enn dezir pou konpran kifer nou existe. Ek, mem si nou ena seki nou bizin pou viv, nou pa pou satisfe tanki nou pa konpran ki sans nou lavi ena. Se lor lamem ki Labib koze kan li dir ki nou “bizin direksion Bondie,” savedir nou ena enn dezir pou konn Bondie ek ador Li. (Matie 5:3; Revelasion 4:11, NTKM) Parski nou bizin direksion Bondie se enn prev ki Li existe, me sa montre osi ki Li enn Kreater ki ena lamour ek ki anvi ki nou konn Li ek ador Li.​—Matie 4:4, NTKM.

• Dan Labib ena bann profesi bien detaye ki finn ekrir bann santenn lane an-avans ek zot finn realize exakteman kouma finn predir. Sa bann prediksion exakt ek detaye la montre dan enn fason kler ki zot vinn depi enn lasours ki bien pli pwisan ki bann imin.​—2 Pier 1:21, NTKM.

• 

  Bann ekrivin Labib ti ena bann konesans siantifik ki ti pli siperyer ki bann ki ti viv dan zot lepok. Par exanp, lontan, boukou dimounn ti krwar ki later ti tini lor ledo enn zanimo kouma enn elefan, enn koson maron, ouswa enn bef. Parkont, Labib dir ki Bondie pe “sispann later dan vid.” (Zob 26:7) Ek osi, kan Labib koz lor form later, li dir ki li dan form enn “serk.” (Izai 40:22) Kouma bann ekrivin Labib ti kapav ena sa bann kalite linformasion la dan zot lepok? Boukou dimounn dir ki li pli lozik pou panse ki se Bondie ki’nn donn zot sa bann linformasion-la.

• Labib reponn boukou kestion inportan, ek si enn dimounn pa gagn enn bon repons, sa kapav fer li aret krwar dan Bondie. Par exanp: Si Bondie ena lamour ek ki Li tou-pwisan, kifer ena otan soufrans ek move kitsoz dan lemond? Kifer bien souvan bann relizion ankouraz bann dimounn pou fer bann move kitsoz olie bann bon kitsoz?​—Tit 1:16, NTKM.