Ansegn to Zanfan pou ena Perseverans

To zanfan pe plore li dir “Mo pa kapav fer li!”. “Li tro difisil! Zame mo pa pou kapav aprann fer sa!” Li anvi aret enn kitsoz parski li trouv sa tro difisil pou li. To pa kontan kan to trouv to zanfan pe lite koumsa, me to anvi ed li pou ki li aprann kouma pou sirmont bann difikilte. Eski deswit to bizin al ed li? Eski to pou les li abandone koumsa mem? Ouswa eski to kapav ansegn to zanfan pou ena perseverans?

Seki to bizin kone

Perseverans li bien inportan. Kan bann paran ansegn zot bann zanfan pou travay dir pou ki zot kapav devlop zot bann kapasite, li pou pli fasil pou bann zanfan la travay bien dan lekol, pou pli ere, pou ena enn bon lasante, ek pou ena bann pli bon lamitie. Me selman kan bann paran-la pa les zot zanfan fer bann erer ek konn bann difikilte, li pou ena plis tandans pou deprime, pou santi ki li pena okenn kapasite, ek pou vinn enn adilt ki pa satisfe ar so lavi.

Kouma pou ena plis perseverans. Mem bann ti zanfan kapav ena kapasite pou fer enn kitsoz difisil ek trouv bann solision. Enn resers inn montre, ki bann ti baba 15 mwa pou esey fer enn kitsoz difisil, si li trouv enn gran dimounn fer bann gran zefor pou fer enn travay.

“Mo rapel kan mo ti pe montre mo bann tifi kouma pou atas zot lase. Se pa enn kitsoz ki to aprann dan enn zour. Sak fwa ki zot ti ena pou atas zot lase zot ti pran apepre 10-15 minit pou esey rapel kouma pou fer sa. Apre sa mo ti ed zot. Sa ti pran de-trwa mwa ek parfwa zot ti agase ek koumans plore me avek letan zot ti kone kouma pou fer li. Mo lavi ti pou pli fasil si mo ti aste bann soulie ki pena lase. Me parfwa antan ki paran nou bizin persevere, pou ansegn nou bann zanfan kouma pou ena perseverans.”​—Colleen.

Perseverans kapav diminie. San ki zot realize, sertin paran kapav fer kapasite ki zot zanfan ena pou persevere, diminie. Kouma? Parski zot anvi ki zot zanfan santi li bien, sertin paran pou degaze pou “ed” so zanfan pou ki li pa agase ouswa santi ki li’nn mal fer. Me kan paran la pe fer sa, sa kapav ena enn lefe negatif. Enn ekrivin ki apel Jessica Lahey dir: “Sak fwa ki nou galoupe pou al ed nou zanfan kan li pe gagn enn difikilte . . ., nou fer zot santi ki zot pena konpetans, kapasite, ek ki nou pa fer zot konfians.”a Akoz sa, kan zanfan-la pou gagn bann difikilte dan lavenir, li kapav abandone bien vit parski li panse ki ena enn adilt ki pou vinn ed li.

Seki to kapav fer

Ankouraz zot pou travay dir. Bann paran kapav ansegn zot zanfan pou ena perseverans, kan zot donn bann-la bann louvraz lakaz ki apropriye pou zot laz. Par exanp, bann ki dan maternel kapav separ bann linz ek ramas zot bann zouzou. Bann zanfan ki inpe pli gran kapav ede pou ramas bann komision, met latab ek netway latab, met poubel deor, ek netwaye kan ena bann ti dezord. Bann adolesan kapav fer bann kitsoz inpe pli difisil kouma par exanp netwaye, fer bann mintenans ek bann reparasion. Bann zanfan pa touletan kontan fer bann louvraz lakaz. Me kan depi zot tipti zot paran donn zot responsabilite dan lakaz, sa ed zot. Kouma? Zot aprann kouma pou travay dir ek gras-a sa, mem kan zot vinn gran sa pou ed zot pou pa abandone kan travay la vinn difisil.

Prinsip Labib: “Kan enn dimounn fer ninport ki travay dir, sa pou dan so lavantaz.”​—Proverb 14:23.

“Pa perdi to letan pou donn to zanfan enn travay zis pou okip li. Personn pa kontan sa, pa mem enn zanfan. Donn li enn kitsoz itil pou fer. Si to zanfan tipti fer li swiy bann meb kot li gagn oter. Si to pe lav to loto fer li lav bann plas ki anba, kot twa to pa gagn porte. Apre sa rekonet travay dir ki to zanfan inn fer.”​—Chris.

Gid to zanfan kan li pe fer bann kitsoz difilsil. Parfwa vit-vit bann zanfan bes lebra parski zot pa kone kouma pou fini enn travay. Alor kan to pe montre to zanfan enn nouvo kitsoz, esey sa metod la. An premie, les zanfan la get twa kan to pe fer kitsoz la. Apre sa fer li ansam avek li. Ek apre get to zanfan kan li pe fer kitsoz la, ek donn li bann sizesion ki pou ed li. Finalman, les zanfan la fer kitsoz la par limem.

Prinsip Labib: “Parski mo’nn donn zot lexanp, pou ki parey kouma mo’nn fer avek zot, zot osi zot fer parey”​—Zan 13:15.

“Dapre mo lexperyans, antan ki paran nou bizin donn enn bon lexanp si nou anvi ki nou zanfan devlop perseverans. Noumem nou bizin montre kalite ki nou anvi zot devlope.”​—Doug.

Ed to zanfan pou aksepte ki tou dimounn gagn bann difikilte ek fer bann erer. Rakont to zanfan bann sitiasion kot to’nn gagn bann difikilte me akoz to pa’nn abandone, to finn gagn bann bienfe. Explik to zanfan ki li normal ki li gagn bann difikilte kan li esey fer bann nouvo kitsoz ek ki kan li fer bann erer sa kapav ed li pou tir bann leson. Rasir to zanfan ki mem si li pa’nn reisi fer enn kitsoz, sa pa diminie to lamour pou li. Parey kouma enn misk devlope kan nou servi li, to zanfan osi pou ena plis perseverans si to les li fer fas ar bann difikilte. Alor kan to zanfan fer fas ar bann difikilte, les li kontign eseye mem si li santi li agase. Liv How Children Succeed dir “meyer fason pou ki enn zenn vinn for ek gagn matirite, se kan li esey fer enn kitsoz mem si ena enn posibilite ki li pa reisi fer li.”

Prinsip Labib: “Li bon ki enn zom for sarye zoug dan so zenes.”​—Lamantasion 3:27.

“Mem si bann zanfan kone ki zot paran pou ed zot, bann zanfan-la gagn bann bienfe kan zot paran permet zot gagn bann difikilte pandan enn sertin letan. Apre enn sertin letan, difikilte la pou ale ek bann zanfan la pou trouve ki li vo lapenn persevere parski zot pou devlop enn kapasite ek konfians dan zotmem.”​—Jordan.

Felisit so bann zefor, pa so lintelizans. Par exanp olie ki to dir, “Felisitasion to’nn pase! To bien malin,” to kapav dir “mo bien kontan bann zefor ki to’nn fer pou revize.” Kifer li pli inportan pou felisit so zefor olie ki so lintelizans? Dr. Carol Dweck dir: “kan to felisit lintelizans enn zanfan sa fer zanfan-la dout limem kan enn kitsoz difisil ouswa kan enn kitsoz inn mal pase,” Apre li dir: “si bann paran anvi fer bann bon kitsoz pou zot bann zanfan, meyer kitsoz ki zot kapav fer se ansegn zot zanfan pou kontan bann defi, pou aprann ar zot bann erer, pou kontan travay dir ek esey trouv bann nouvo fason pou fer bann kitsoz. Kan zot fer sa, zot zanfan pa pou kontrole par dezir pou gagn bann konpliman.”b

Prinsip Labib: “Felisitasion ki enn kikenn gagne montre ki kalite dimounn li ete.”​—Proverb 27:21.