Kouma To Kapav Rann To Letid Labib Pli Efikas ek Agreab?

Zozwe pe lir Lalwa; bann miray Zeriko tonbe me lakaz Raab res intak; Zozwe pe lev so lame dan direksion lesiel pou fer enn lapriyer

ZOZWE ti bizin fer nasion Izrael rant dan Later Promiz. Sa ti pou enn responsabilite bien difisil. Me selman, Zeova ti fortifie ek ankouraz Zozwe kan Li ti dir li: “Pran kouraz ek res bien for.” Li ti dir Zozwe ki si li ti lir ek obeir Lalwa, li ti pou kapav pran bann bon desizion ek li ti pou reisi dan seki li fer.—Zozwe 1:7, 8.

Nou pe viv dan “bann moman difisil,” alor nou lavi osi li bien difisil. (2 Timote 3:1) Si nou anvi reisi parey kouma Zozwe, nou bizin swiv konsey ki Zeova ti donn li. Nou bizin lir Labib regilierman ek servi seki nou aprann pou pran bann bon desizion.

Me kitfwa sertin parmi nou pa kone kouma pou etidie, ouswa kitfwa nou pa kontan etidie. Selman, enn letid personel lor Labib li bien inportan. Kan to examinn lankadre “Esey Sa Bann Sigzesion-La,” to pou trouv bann lide ki pou ed twa tir profi ar to letid ek rann li pli agreab.

Enn ekrivin Psom ti sante: “Gard mwa dan lobeisans to bann instriksion parski zot donn mwa boukou boner.” (Psom 119:35) Twa osi to letid Labib kapav vinn agreab. To pou dekouver boukou zoli panse amezir ki to kontign etidie Labib.

Mem si to pa bizin diriz enn nasion parey kouma Zozwe, to ena to bann prop difikilte. Alor, parey kouma Zozwe, etidie ek obeir Parol Bondie. Si to fer sa, to pou pran bann bon desizion ek to pou reisi dan seki to fer.

ESEY SA BANN SIGZESION-LA

Priye avan ki to koumans etidie. Dan Labib ena bann panse Zeova, ek finn ekrir sa pou to profi. Alor kan to lir Labib, demann Zeova pou ed twa konpran seki to pe lir, pou rapel sa, ek pou servi sa pou pran bann bon desizion dan to lavi.—Esdras 7:10.
Poz tomem bann kestion amezir ki to lir Labib ouswa bann piblikasion ki baze lor Labib. Par exanp: ‘Ki sa pasaz-la aprann mwa lor Zeova? Ki lien sa ena avek tem Labib? Kouma mo kapav servi sa bann panse-la pou ed lezot?’
Medit lor seki to pe etidie. Arete pou enn ti moman, ek reflesi lor seki to fek lir. Demann tomem: ‘Ki lefe sa ena lor mwa ek kifer? Ki lien sa ena avek seki finn ariv mwa dan lepase, seki pe ariv mwa asterla, ouswa seki pou ariv mwa dan lavenir? Kouma mo kapav aplik sa bann prinsip Labib la ouswa sa konsey-la dan mo lavi?’ (Zob 23:5; Psom 49:3, NW.) Kan to medite, gete si to kapav explike kifer Zeova inn dir so pep pou evit sertin pratik. Ouswa, reflesi lor bann konsekans ki ti kapav ena si sa dimounn lor ki to’nn lir la ti fer bann kitsoz dan enn fason diferan.—Deteronom 32:28, 29.
Servi to limazinasion kan to pe lir. Par exanp, eski to kapav imazinn moman kot bann frer Zozef ti vann li ar bann Ishmaelit? (Zenez 37:18-28) Ki to pe trouve, tande, ek santi? Met twa dan lapo bann personaz-la. Ki zot ti pe panse ek resanti? Kan to servi to limazinasion, to letid pou vinn pli efikas.
Servi bann zouti ki lorganizasion finn donn nou. Sa kapav fer to bann resers vinn pli interesan. Aprann kouma pou servi bann zouti ki disponib dan to lang, ki li lor Internet ouswa lor papie. Pa ezite pou demann lezot pou explik twa kouma pou servi sa bann zouti-la dan enn fason efikas. Par exanp, l’Index des publications des Témoins de Jéhovah ouswa Liv Resers pou bann Temwin Zeova kapav ed twa trouv seki finn ekrir lor sertin size ek pou explik bann verse Labib. Servi brosir Enn Gid pou Pli Konpran Parol Bondie ki donn bann ransegnman itil lor zeografi, kronolozi, bann pwa, bann mezir ek lezot size.
Fer enn rezime bann pwin inportan. Sa pou ed twa rapel seki to’nn fek etidie. Me seki pli bon, se kan to koz avek lezot lor seki to finn aprann. Eski ena enn lide ki to kapav servi dan to minister? Kan to fer sa bann kitsoz-la, to pou rapel bann pwin inportan ek lezot osi pou tir profi ar to letid.