Ki Nou Kapav Fer pou Nou Kontign Res Fidel ar Zeova Malgre Bann Difikilte?

1-2. Ki ti arive kan Zezi ti ansegn bann dimounn dan Kafarnaom?

ENN zour, kan Zezi ti pe ansegn enn group dimounn dan Kafarnaom, li ti dir zot: “Si zot pa manz lekor Garson limanite ek zot pa bwar so disan, zot pena lavi dan zotmem.” Li ti osi dir zot: “Seki manz mo lekor ek bwar mo disan pou gagn lavi pou touletan, ek mo pou resisit li dan dernie zour.” (Zan 6:53, 54) Boukou parmi so bann disip pa ti kontan seki li ti dir. Alor, zot ti dir: “Sa bann parol-la sokan; kisann-la kapav ekout sa?”—Zan 6:60.

² Akoz sa, boukou disip ti aret swiv Zezi. Eski savedir ki zot pa ti ena lafwa dan Zezi? Avredir, enn tigit avan, kan zot ti trouve seki Zezi ti fer ek ti dir, zot ti telman inpresione ki zot ti dir: “Se limem sa Profet ki ti bizin vinn dan lemond la.” (Zan 6:14) Sa montre ki sa bann disip-la ti ena lafwa dan Zezi. Selman, kan Zezi ti dir enn kitsoz ki zot pa ti konpran, zot ti nepli res fidel ar li.

3. Kouma bann zapot ti reazir ar seki Zezi ti dir, ek kifer? (Get zimaz osi.)

³ Parkont, bann zapot ti res fidel ar Zezi. Kan Zezi ti demann zot si zot ti anvi ale zot osi, Pier ti dir: “Segner, kisann-la nou pou swiv? To ena bann parol lavi eternel. Nou’nn krwar ek nou’nn kone ki tomem sa Kikenn ki Sin ki Bondie inn avoye la.” (Zan 6:68, 69) Kan Zezi ti dir ki zot ti pou bizin manz so laser ek bwar so disan, kitfwa Pier ek bann lezot zapot pa ti vremem konpran seki li ti pe dir. Me kanmem sa, zot ti swazir pou res fidel ar li. Kifer? Parski zot ti sir ki Zezi li “Lekris ki Bondie inn avoye.”—Lik 9:20, 35.

4. Ki kitsoz kapav teste nou fidelite ar Zeova?

⁴ Azordi osi, ena plizir kitsoz ki kapav teste nou fidelite anver Zeova. Par exanp, kouma eski nou reazir kan lorganizasion donn nou enn nouvo explikasion lor enn verse, ouswa kan ena enn sanzman dan fason ki nou prese? Ouswa, kouma nou reazir kan nou pa konpran kifer Zeova pe permet ki nou pas dan enn sitiasion ki fer nou soufer? Enn lot kitsoz ki kapav teste nou fidelite ar Zeova, se kan enn bon kamarad bles nou, ouswa kan enn kikenn ki nou kontan tret nou dan enn move fason.

5. Servi enn lexanp pou explike kifer nou bizin fer nou lafwa vinn pli for. (Kolosien 1:23)

⁵ Pou ki nou res fidel ar Zeova dan bann sitiasion difisil, nou lafwa dan Zeova bizin for. Par exanp, enn batiman bizin ena enn bon fondasion pou ki li kapav tini kan ena enn tranbleman-de-ter ouswa enn siklonn. Dan mem fason, kan nou gagn bann difikilte ki’nn mansione dan paragraf avan, nou bizin ena enn lafwa bien for pou ki nou kapav kontign res fidel ar Zeova. Alor, si nou kontign fer nou lafwa vinn pli for, sa pou ed nou pou res “ferm” ek fidel, mem kan nou gagn bann difikilte.—1 Kor. 15:58; lir Kolosien 1:23.

6. Ki kitsoz ti ed bann zapot pou res fidel ar Zezi?

⁶ Ki kitsoz ti ed bann zapot pou res fidel ar Zezi mem si lezot ti abandonn li? Bann zapot ti sir ki (1) zot ti bizin ador zis Zeova parski Limem Kreater, (2) Zezi li Garson Bondie ek li “ena bann parol lavi eternel,” ek (3) tou seki Zezi ti pe fer, ti fer Zeova plezir. Nou osi, nou’nn aprann plizir kitsoz lor Zeova ki kapav ed nou pou res fidel ar Li dan bann moman difisil. Dan sa lartik-la, nou pou get trwa parmi sa bann kitsoz-la: (1) Zeova Li nou Kreater, (2) Labib se Parol Bondie, ek (3) Zeova pe soutenir so bann serviter azordi. Si nou pena okenn dout lor sa trwa kitsoz-la, nou pou kapav res fidel ar Zeova dan ninport ki sitiasion.

ZEOVA LI NOU KREATER

7. Ki kitsoz Revelasion 4:11 rapel nou lor Zeova, ek kouma sa kapav ed nou kan nou gagn bann difikilte?

⁷ Lir Revelasion 4:11. Sa verse-la rapel nou ki se Zeova ki’nn kree tou kitsoz. Sa li enn rezon bien inportan kifer nou bizin ador Li. Kan nou reflesi lor so pwisans, nou pena okenn dout ki Li kapav ed nou dan ninport ki difikilte. Selman, Satan inn fann bann foste pou fer bann dimounn krwar ki Bondie pa existe. Ena mem bann siantis ki dir ki lavi inn aparet par limem ek ki pena okenn Kreater. Alor, si nou pa sir ki Zeova Li nou Kreater ek ki Li kontan nou, kitfwa nou kapav koumans ena bann dout ki Li existe ek ki Li kapav ed nou kan nou gagn bann difikilte.—Ebre 11:6.

8-9. Si to koumans ena bann dout ki Zeova Li nou Kreater, ki to bizin fer? (Get zimaz osi.)

⁸ Si to koumans ena bann dout ki Zeova Li nou Kreater, ki to bizin fer? Pa tarde pou fer bann resers dan nou bann piblikasion pou ki to gagn bann prev ki Zeova inn kree tou kitsoz. Dan brosir La vie a-t-elle été créée ? ek brosir Cinq questions à se poser sur l’origine de la vie, to kapav trouv boukou kitsoz ki kapav fer to lafwa vinn pli for. To kapav gagn bann lezot prev osi dan seri lartik ek video “Eski Inn Kree Sa Ouswa Non?” lor jw.org. Jessica, enn zenn ser ki res Letazini, dir: “Kan mo ti lir brosir Cinq questions à se poser sur l’origine de la vie, mo ti gagn bann prev ki ena enn Kikenn ki bien intelizan ki’nn kree tou kitsoz. Mo ti deza konn sa. Me apre ki mo’nn etidie sa brosir-la, mo ti nepli ena okenn dout.” Ena boukou ki’nn gagn bann bienfe kan zot inn lir liv Y a-t-il un Créateur qui se soucie de vous, ouswa leson 6 ek 7 dan liv “Viv Ere pou Touletan! Kitfwa to’nn deza lir sa bann piblikasion-la. Eski to kapav relir zot?

⁹ Pou to prosin letid personel, to kapav etidie lor bann prev ki montre ki Bondie existe. To bann resers pa pou zis konvink twa ki Zeova Li vremem existe, me sa pou osi ed twa pou aprann konn Li pli bien. (Rom. 1:20) Anplis, to pou kapav servi seki to’nn aprann pou ed bann dimounn ki pa sir ki Bondie vremem existe. Alor, pwin prinsipal ki nou bizin rapel se: Zeova inn donn nou boukou prev ki se Limem nou Kreater.

Nebula: IAC/RGO/David Malin Images; enn pwason ek enn loto: Mercedes-Benz USA; enn avion: Kristen Bartlett/University of Florida

LABIB SE PAROL BONDIE

10. Kifer Labib li bien inportan pou nou? (2 Timote 3:16, 17)

¹⁰ Lir 2 Timote 3:16, 17. Labib se enn mesaz ki Zeova inn fer ekrir pou bann dimounn. Li reponn bann kestion inportan, kouma par exanp, kouma lavi inn koumanse, kifer nou existe, ek ki ete volonte Zeova. Labib se liv pli inportan pou nou parski nou kone ki se Parol Bondie. Akoz sa, nou anvi konpran seki nou lir dan Labib ek nou anvi fer nou best pou met li an pratik.

11. Kifer to sir ki se Zeova ki’nn fer ekrir Labib?

¹¹ Kifer nou sir ki se Zeova ki’nn fer ekrir Labib? Ena boukou rezon. Par exanp, kan Labib koz lor bann levennman ki’nn arive dan lepase, li exakt. (Lik 3:1, 2) Li exakt osi kan li koz lor lasians. (Zob 26:7) Labib li enn liv bien spesial parski mem si Satan inn fer boukou zefor pou esey detrir li, azordi se sel liv ki ena pli boukou kopi ek ki’nn pibliye dan pli boukou lang. Se anviron 40 zom ki’nn ekrir bann liv ki ena dan Labib, ek zot inn fer sa lor enn peryod 1,600 an. Me kanmem sa, okenn parti dan Labib pa kontredir limem. Mem si sa fer bien lontan ki’nn ekrir sa liv-la, so bann konsey ankor pe ed bann milyon dimounn azordi. (Prov. 13:20; 15:21; Mat. 7:12) Anplis, ena boukou profesi dan Labib ki’nn realize dan enn fason exakt. Sa se enn lot rezon kifer nou kapav fer Labib konfians. (Zozwe 23:14) Vremem, nou pena okenn dout ki se Zeova ki’nn fer ekrir Labib!

12. Si nou pa sir ki se Zeova ki’nn fer ekrir Labib, ki nou bizin fer?

¹² Si nou pa sir ki se Zeova ki’nn fer ekrir Labib, ki nou bizin fer? Nou bizin priye Li, nou dir Li seki nou resanti, nou demann Li so led, ek apre nou fer bann resers. Jordan, enn zenn frer ki’nn grandi dan laverite, dir: “Mo pa krwar tou kitsoz ki lezot dir mwa. Mo kontan verifie bann kitsoz par momem pou mo sir si zot vre. Avredir, ena fwa mo ena bann dout. Me kan sa arive, mo fer bann resers dan nou bann piblikasion pou gagn repons mo bann kestion.” Kan nou fer zefor pou rapel bann rezon kifer nou sir ki se Zeova ki’nn fer ekrir Labib, sa fer nou lafwa vinn pli for.—1 Kor. 3:12, 13.

ZEOVA PE SOUTENIR SO BANN SERVITER AZORDI

13. Si nou pa sir ki bann Temwin Zeova se lorganizasion ki Bondie pe servi azordi, ki nou bizin fer?

¹³ Si nou pa sir ki bann Temwin Zeova se lorganizasion ki Bondie pe servi azordi, nou bizin azir vit. Par exanp, nou kapav poz nou-mem bann kestion kouma: ‘Azordi, kisann-la pe fer zot maximum pou viv dapre bann prinsip Labib? Ki lorganizasion azordi ki baz zot krwayans lor Labib?’ (2 Tim. 4:3, 4) ‘Kisann-la pe fer volonte Zeova azordi?’—Mat. 7:20, 21.

14. Kouma bann Temwin Zeova pe realiz profesi ki trouv dan Matie 24:14?

¹⁴ Bondie anvi ki bann dimounn dan lemond antie tann bon nouvel avan ki lafin vini. Alor, nou kapav demann nou-mem: ‘Kisann-la pe pres sa bon nouvel-la azordi?’ (Mat. 24:14) Li kler ki Zeova pe servi so pep pou fer sa. Se zis bann Temwin Zeova ki pe pres bon nouvel lor Rwayom Bondie dan plis ki 240 pei. Anplis, nou pe fer sa travay-la depi plis ki 100 an. Wi, travay predikasion se travay pli inportan pou pep Bondie.—Mat. 28:19, 20.

15. Kouma bann Temwin Zeova donn loner nom Bondie? (Matie 6:9; Izai 43:10)

¹⁵ Lir Matie 6:9 ek Izai 43:10. Se enn gran loner pou nou ki nou port nom Temwin Zeova! Laplipar dimounn dan lemond pa kone ki nom Bondie se Zeova. Selman, dan text orizinal Labib, sa nom-la ti aparet plis ki 7, 000 fwa. Akoz sa, pep Bondie inn fer boukou zefor pou remet nom Zeova dan bann plas kot li ti ete dan Labib, parey kouma dan so text orizinal.

16. Kifer nou kapav dir ki bann Temwin Zeova pe obeir lord ki ena dan Zan 13:34, 35? (Get zimaz osi.)

¹⁶ Lir Zan 13:34, 35. Azordi dan lemond, ena boukou divizion ek bann dimounn ena laenn pou zot kamarad. Me bann serviter Zeova zot pa koumsa. Zot vremem kontan zot kamarad ek ena linite parmi zot. Mem si nou sorti dan diferan pei ek kiltir, nou fer zefor pou ki ena lape ek lamour parmi nou. Eski to’nn deza vizit enn lasanble ki dan enn lot pei? Si wi, sirman to’nn remarke kouma bann frer ek ser, ninport kotsa zot ete, zot kontan zot kamarad ek zot viv dan linite. Sa montre ki Zeova pe vremem servi so pep pou fer so volonte azordi. Kan nou rapel ki Zeova Li avek so pep, sa pou ed nou pou res fidel malgre bann difikilte.

ZAME PA KIT ZEOVA

17-18. Ki bann sitiasion difisil nou kapav gagne, me ki kitsoz nou kapav sir?

¹⁷ Akoz nou pe viv “dan bann dernie zour,” nou tou nou pou gagn bann difikilte. (2 Tim. 3:1, 13) Ek kitfwa ena bann lezot kitsoz osi ki kapav fer nou bien trakase. Par exanp, lorganizasion kapav pran bann desizion ki nou gagn difikilte pou konpran. Li kapav arive osi ki enn frer ouswa enn ser ofans nou. Ouswa, kitfwa nou pa kone kouma pou regle enn problem ki nou pe gagne, ouswa nou pa konpran kifer nou pe pas par enn difikilte.

¹⁸ Selman, mem si nou santi nou tris ouswa nou trakase akoz seki pe ariv nou, nou kapav kontign res fidel ar Zeova. Kifer? Parski nou sir ki Zeova Li nou Kreater, ki Labib se Parol Bondie, ek ki bann Temwin Zeova zot bann serviter Bondie. Lerla, parey kouma Pier ti dir Zezi, nou osi nou kapav dir Zeova: “Kisann-la nou pou swiv? To ena bann parol lavi eternel.”