Pa Panse ki To Tro Inportan

ESKI to’nn remarke ki boukou dimounn azordi panse ki lezot bizin tret zot dan enn fason spesial? Ena ki panse ki bizin tret zot pli bien ki lezot, ouswa ki zot bizin gagn sertin privilez. Ek mem si finn tret zot dan enn fason spesial, zot panse ki zot merite gagn plis ki sa. Bann dimounn ki pans koumsa, zot egois ek ingra. Labib ti predir ki bann dimounn ti pou koumsa dan bann dernie zour.—2 Tim. 3:2.

Li vre ki finn touletan ena bann dimounn ki egois. Par exanp, Adan ek Ev ti desid pou swazir par zotmem seki bon ek seki pa bon, ek nou tou nou soufer akoz move desizion ki zot inn pran. Plizir santenn lane apre, Lerwa Ozias ti panse ki li ti ena drwa bril lansan dan tanp, me an realite li pa ti ena drwa fer sa. (2 Kro. 26:18, 19) Bann Farizien ek bann Sadisein ti panse ki Bondie ti bizin tret zot pli bien ki lezot, parski zot ti bann desandan Abraam.—Mat. 3:9.

Azordi, nou antoure ar bann dimounn ki egois, ek si nou pa fer atansion, zot kapav inflians nou. (Gal. 5:26) Lerla, kitfwa nou pou koumans panse ki nou merite ki lezot tret nou dan enn fason spesial, ouswa ki nou merite gagn enn privilez. Kouma nou kapav rezet sa fason panse-la? Pou koumanse, anou gete seki Zeova panse lor la. Anou examinn de prinsip Labib ki kapav ed nou.

Se Zeova ki deside ki kitsoz nou merite gagne. Anou get de-trwa lexanp.

• Dan lafami, Zeova anvi ki enn mari santi ki so fam respekte li, ek enn fam bizin santi ki so mari kontan li. (Efe. 5:33) Kan enn zom ek enn fam marye, Zeova anvi ki sakenn montre lafeksion anver so konzwin, ek sa kalite lafeksion-la, fode pa ki zot donn sa enn lot dimounn. (1 Kor. 7:3) Zeova anvi ki bann zanfan obeir zot paran, ek bann paran bizin kontan ek pran swin zot zanfan.—2 Kor. 12:14; Efe. 6:2.

• Dan lasanble, bann ansien merite ki nou respekte zot parski zot travay bien dir pou nou. (1 Tes. 5:12) Selman, zot pena drwa kontrol zot bann frer ek ser.—1 Pier 5:2, 3.

• Zeova anvi ki nou pey nou tax ek ki nou respekte bann gouvernman.—Rom. 13:1, 6, 7.

Parski Zeova kontan nou, Li donn nou plis ki seki nou merite. An realite, akoz nou inparfe, nou merit zis lamor. (Rom. 6:23) Selman, Zeova donn nou boukou benediksion parski Li ena lamour fidel pou nou. (Ps. 103:10, 11) Sak benediksion ki Li donn nou, se pa parski nou merite, me se akoz so bonte extraordiner.—Rom. 12:6-8; Efe. 2:8.

KI KITSOZ KAPAV ED NOU POU KI NOU PA PANSE KI NOU PLI INPORTAN KI LEZOT?

Fer atansion ar fason panse lemond Satan. San ki nou rann nou kont, nou kapav koumans panse ki nou merite gagn plis ki lezot. Enn zour, Zezi ti rakont enn zistwar pou montre kouma bien vit sa kapav arive. Li ti explike kouma sertin travayer ti dakor pou travay enn zourne pou enn denie. Plitar sa zour-la, met-la ti pran ankor lezot travayer. So tanto, li ti pey tou travayer parey, mem bann ki ti travay zis enn ertan. Selman, bann travayer ki ti koumans travay boner gramatin ti panse ki met-la ti bizin pey zot plis ki lezot, parski zot inn travay enn zourne dan soley. (Mat. 20:1-16) Zezi ti servi sa lexanp-la pou montre so bann disip ki zot bizin satisfe ar seki Bondie donn zot.

Ena rekonesans, ek pa atann pou gagn kitsoz ar lezot. (1 Tes. 5:18) Swiv lexanp lapot Pol. Mem si li ti gagn drwa demann bann frer ek ser dan Korint bann kitsoz ki li ti bizin, li pa ti fer sa. (1 Kor. 9:11-14) Nou bizin ena rekonesans pou tou seki nou gagne, ek fode pa nou panse ki lezot oblize donn nou kitsoz.

Ena limilite. Kan enn kikenn krwar ki li tro inportan, li kapav koumans panse ki li merite gagn plis ki seki li ena. Selman, kan nou ena limilite, sa pou ed nou pou rezet sa move fason panse-la.

Profet Daniel ti ena limilite, ek li enn bon lexanp pou nou. Li ti sorti dan enn gran fami, li ti enn zoli garson, li ti intelizan, ek li ti ena boukou kapasite. Akoz sa, li ti kapav panse ki li merite ki lezot tret li dan enn fason spesial ek ki li merite gagn bann privilez ki li ti ena. (Dan. 1:3, 4, 19, 20) Selman, Daniel pa ti koumsa. Li ti kontign ena limilite, ek akoz sa, li ti ena boukou valer pou Zeova.—Dan. 2:30; 10:11, 12.

Mem si boukou dimounn azordi bien egois ek zot panse ki zot pli inportan ki lezot, anou kontign rezet sa fason panse-la. Okontrer, anou kontign apresie sak benediksion ki Zeova donn nou akoz so bonte ki extraordiner.