Anou Kontign Ankouraz Lezot

1. Dapre 1 Tesalonisien 5:11, dan ki konstriksion nou tou nou bizin partisipe?

ESKI to ti partisip dan konstriksion ouswa renovasion to Lasal Renion? Si wi, sirman to rapel premie renion ki to ti asiste dan to nouvo lasal apre sa. Sirman to ti bien rekonesan anver Zeova! Sa zour-la, kitfwa to ti telman kontan, ki to ti plore ek to pa ti kapav sant premie kantik sa renion-la! Enn nouvo Lasal Renion donn laglwar Zeova. Me ena enn lot konstriksion ki donn Zeova plis laglwar. Sa konstriksion-la, se pa konstriksion enn batiman. Lapot Pol ti koz lor-la dan 1 Tesalonisien 5:11 (Lir), text tem sa lartik-la. Mo Grek ki li ti servi pou “ankouraze,” vedir osi “konstrir.” Alor, Pol ti anvi ki bann Kretien partisip dan enn lot kalite konstriksion, setadir ki zot ankouraz bann dimounn ki ador Zeova ansam avek zot.

2. Ki nou pou examine dan sa lartik-la?

² Lapot Pol ti konn ankouraz so bann frer ek ser. Li ti ena konpasion pou zot. Dan sa lartik-la, nou pou gete kouma li ti ed so bann frer ek ser (1) pou andir zot bann leprev, (2) pou favoriz lape ar lezot, ek (3) pou ranforsi zot lafwa an Zeova. Anou gete kouma nou kapav swiv so lexanp ek ankouraz nou bann frer ek ser.​—1 Kor. 11:1.

POL TI ED SO BANN FRER EK SER POU ANDIR ZOT BANN LEPREV

3. Kouma Pol ti montre ki li ti enn kikenn ki ti ekilibre?

³ Pol ti bien kontan so bann frer ek ser. Li ti konpran zot kan zot ti gagn bann difikilte, parski limem li ti gagn plizir difikilte dan so lavi. Anplis, li ti montre konpasion anver zot. Pandan enn moman, Pol ek so bann konpagnon pa ti ena larzan, ek Pol ti bizin travay pou soutenir zot. (Zist. 20:34) Pol ti enn fabrikan latant. Kan li ti ariv Korint, o-koumansman li ti travay ansam avek Akila ek Prisil, ki ti bann fabrikan latant zot osi. Me “sak saba,” li ti pres ar bann Zwif ek bann Grek. Kan Silas ek Timote ti vinn zwenn li, “Pol ti devoue tou so letan zis pou pres laparol.” (Zist. 18:2-5) Pol pa ti bliye so priorite, setadir servi Zeova. Pol ti travay bien dir ek li ti pas boukou letan pou prese. Li ti enn bon lexanp pou so bann frer ek ser, ek akoz sa, li ti kapav ankouraz zot. Li ti rapel zot ki, mem si zot ti ena bann difikilte ek ki zot ti bizin travay dir pou okip zot fami, zot ti bizin osi kontign fer “bann kitsoz ki pli inportan,” setadir kontign ador Zeova ek servi Li.​—Fil. 1:10, NW.

4. Kouma Pol ek Timote ti ed zot bann frer ek ser pou fer fas ar persekision?

⁴ Inpe apre ki lasanble Tesalonik ti forme, sa bann nouvo Kretien-la ti gagn enn gran persekision. Enn group dimounn ti pe rod Pol ek Silas, me zot pa ti trouv bann-la. Alor, zot ti pran sertin frer, zot ti “trenn zot devan mazistra lavil,” ek zot ti dir: “Zot pa pe swiv lalwa Sezar.” (Zist. 17:6, 7) Bann zom sa lavil-la ti bien ankoler ar bann Kretien, ek akoz sa, bann frer ek ser ti bien per. Sa lasanble-la ti fek forme, ek akoz sa persekision-la, sa bann nouvo Kretien-la ti kapav perdi zot lazwa pou servi Zeova. Me Pol pa ti anvi ki enn kitsoz koumsa arive. Mem si Pol ek Silas ti bizin kit Tesalonik, zot ti fer an sort ki enn kikenn okip sa lasanble-la. Pol ti dir bann Tesalonisien: “Nou finn avoy nou frer Timote . . . , pou ankouraz zot pou tini ferm dan zot lafwa pouki personn parmi zot pa les zot abat par bann eprev ki nou pe fer fas.” (1 Tes. 3:2, 3) Timote ti deza fer fas ar bann persekision dan List, lavil kot li ti grandi, ek li ti trouve kouma Pol ti ranforsi lafwa bann frer sa lavil-la. Timote ti trouve kouma Zeova ti ed zot. Alor, li ti kapav rasir bann frer ek ser dan Tesalonik ki tou ti pou pas bien pou zot.​—Zist. 14:8, 19-22; Ebre 12:2.

5. Kouma enn ansien ti ed Bryant?

⁵ Dan ki fason ankor Pol ti ankouraz so bann frer ek ser? Kan zot ti retourn dan List, Ikoniem, ek Antios, Pol ek Barnabe ti nomm “bann ansien dan sak legliz.” (Zist. 14:21-23) Nou kapav sir ki sa bann ansien-la ti ankouraz zot bann frer ek ser, parey kouma nou bann ansien fer azordi. Enn frer, ki apel Bryant, dir: “Kan mo ti ena 15 an, mo papa ti abandonn nou ek mo mama ti exkli. Sa ti vremem dekouraz mwa, ek mo ti santi mwa tousel.” Ki kitsoz ti ed Bryant pou andir sa sitiasion difisil-la? Li dir: “Enn ansien, ki apel Tony, ti koz avek mwa dan renion ek dan bann lezot moman osi. Li ti explik mwa ki, mem si boukou frer ek ser ti pe fer fas ar bann difikilte, zot ti ere. Li ti montre mwa Psom 27:10, ek souvan li ti koz lor Ezekias, ki ti servi Zeova avek fidelite, mem si so papa pa ti donn li enn bon lexanp.” Kouma sa bann konversasion-la ti ed Bryant? Li dir: “Gras-a bann lankourazman ki Tony ti donn mwa, avek letan, mo ti koumans servi Zeova aplintan.” Parey kouma Tony, bann ansien bizin fer zefor pou trouve kan zot bann frer ek ser bizin led, pou ki zot kapav dir bann-la “enn bon parol” ki pou ankouraz zot.​—Prov. 12:25.

6. Kouma Pol ti servi lexanp bann fidel serviter Zeova dan lepase pou ankouraz so bann frer ek ser?

⁶ Pol ti rapel so bann frer ek ser ki ena “enn lafoul temwin” ki pe reisi andir zot bann difikilte gras-a Zeova. (Ebre 12:1) Pol ti kone ki lexanp bann fidel serviter Zeova dan lepase, ki ti andir tout sort kalite difikilte, ti kapav donn bann frer ek ser kouraz, ek ed zot pou res konsantre lor “lavil Bondie vivan.” (Ebre 12:22) Li parey pou nou osi azordi. Sirman sa finn bien ankouraz nou kan nou’nn lir kouma Zeova ti ed Zedeon, Barak, David, Samiel, ek boukou lezot ankor! (Ebre 11:32-35) Li parey pou bann lexanp modern osi. Souvan, bann frer ek ser avoy bann let biro mondial, pou dir ki kantite sa finn ogmant zot lafwa kan zot finn lir biografi bann serviter Zeova dan nou lepok.

POL TI MONTRE SO BANN FRER EK SER KOUMA POU FAVORIZ LAPE AR LEZOT

7. Ki leson nou kapav aprann dan Romin 14:19-21?

⁷ Nou ankouraz nou bann frer ek ser kan nou fer zefor pou ki ena lape dan lasanble. Mem si nou ena diferan lopinion, nou pa pou les sa kree divizion ant nou. Ek dan bann sitiasion kot pena okenn prinsip Labib ki inplike, nou pa pou insiste ar lezot pou ki zot fer kouma nou nou anvi. Anou get enn lexanp. Dan lavil Rom, ti ena bann Kretien Zwif ek bann Kretien Non-Zwif. Kan Lalwa Moiz ti aboli, bann serviter Zeova ti kapav manz bann manze ki zot pa ti gagn drwa manze anba Lalwa Moiz. (Mark 7:19) Lerla, sertin Kretien Zwif ti manz tou kalite manze. Me lezot Kretien Zwif pa ti fer sa, ek sa ti kree divizion dan lasanble. Pou ki ena lape dan lasanble, lapot Pol ti dir: “Li meyer ki evit manz laviann oubien bwar divin ou fer ninport ki kiksoz ki pou fer enn frer ou enn ser tonbe.” (Lir Romin 14:19-21.) Kan Pol ti dir sa bann parol-la, li ti ed so bann frer ek ser pou konpran ki bann diskision koumsa ti pe kree divizion. Pol ti mem sanz so bann labitid pou li pa sok so bann frer ek ser. (1 Kor. 9:19-22) Dan mem fason, nou pou ankouraz nou bann frer ek ser, ek nou pou favoriz lape dan lasanble, kan nou pa insiste lor nou bann lopinion personel.

8. Kan ti ena enn dezakor dan lasanble akoz sirkonsizion, kouma Pol ti reazir?

⁸ Pol inn montre nou kouma nou kapav favoriz lape ar lezot, kan nou pa dakor lor bann size inportan. Par exanp, dan premie siek, sertin Kretien ti anvi ki bann Kretien Non-Zwif sirkonsi. Kifer? Parski kitfwa zot pa ti anvi ki bann Zwif kritik zot. (Gal. 6:12) Pol pa ti dakor ar sa. Me olie ki li ti insiste pou ki lezot swiv so fason panse, avek limilite li ti rod konsey ar bann zapot ek bann ansien dan Zerizalem. (Zist. 15:1, 2) Kan li ti fer sa, Pol ti ede pou ki ena lazwa ek lape dan lasanble.​—Zist. 15:30, 31.

9. Kouma nou kapav swiv lexanp Pol?

⁹ Kan nou gagn enn dezakor avek enn kikenn dan lasanble, nou montre ki nou favoriz lape kan nou rod led avek bann dimounn ki Zeova inn etabli pou okip lasanble. Nou gagn osi bann konsey dan nou bann piblikasion, ek bann instriksion ar nou lorganizasion. Si nou swiv sa bann instriksion-la, olie ki nou fer kouma nou nou anvi, nou pou ede pou ki ena lape dan lasanble.

10. Ki kitsoz ankor Pol ti fer pou favoriz lape dan lasanble?

¹⁰ Pol ti favoriz lape kan li ti koz lor bann zoli kalite ki so bann frer ek ser ena, pa lor zot bann defo. Par exanp, dan so let ki li ti ekrir bann Romin, dan bann dernie verse, Pol mansionn nom plizir frer ek ser, ek li dir bann kitsoz pozitif lor zot. Nou swiv lexanp lapot Pol kan nou koz lor bann zoli kalite ki nou bann frer ek ser ena. Kan nou fer sa, nou vinn pli pros ar nou bann frer ek ser, ek nou ede pou ki ena plis lamour dan lasanble.

11. Kouma nou kapav favoriz lape dan lasanble kan nou gagn bann dezakor?

¹¹ Parfwa, mem bann Kretien ki ena lexperyans kapav gagn bann dezakor ant zot. Se seki ti ariv Pol ek so bon kamarad, Barnabe. Kan zot ti pe al fer enn vwayaz misioner, sa de zom-la ti gagn enn dezakor akoz Mark. Ti ena “enn gran diskision” ant zot, ek sakenn ti al so kote. (Zist. 15:37-39) Me apre, Pol, Barnabe, ek Mark ti fer lape ar zot kamarad. Sa montre ki lape ek linite ti bien inportan pou zot. Apre sa sitiasion-la, Pol ti koz an bien lor Barnabe ek Mark. (1 Kor. 9:6; Kol. 4:10) Dan mem fason, nou osi nou bizin fer lape ar lezot dan lasanble ek konsantre nou lor bann zoli kalite ki zot ena. Kan nou fer sa, nou favoriz lape ek linite dan lasanble.​—Efe. 4:3.

POL TI RANFORSI LAFWA SO BANN FRER EK SER

12. Ki difikilte sertin frer ek ser gagne azordi?

¹² Nou ankouraz nou bann frer ek ser kan nou ed zot pou ena plis lafwa an Zeova. Sertin Kretien gagn lopozision ar zot fami, ar zot bann koleg travay, ouswa ar zot bann kamarad lekol. Ena lezot ki ena bann gro problem lasante fizik ouswa emosionel. Ena osi nou bann frer ek ser ki lontan dan laverite, ek ki pe atann depi bien lontan ki lafin vini. Sa bann sitiasion-la kapav diminie lafwa nou bann frer ek ser. Bann Kretien dan premie siek osi ti fer fas ar bann sitiasion koumsa. Ki kitsoz Pol ti fer pou ranforsi zot lafwa?

13. Kouma Pol ti ed bann Kretien ki ti bizin explik zot krwayans?

¹³ Pol ti servi bann Lekritir pou ranforsi lafwa so bann frer ek ser. Par exanp, sertin Kretien Zwif kitfwa ti gagn difikilte pou explik zot krwayans ar zot fami ki pa ti Kretien. Sa bann fami-la ti pretann ki larelizion Zwif ti pli siperyer ki larelizion bann Kretien. Alor, nou kapav sir ki let ki lapot Pol ti ekrir bann Ebre, ti ranforsi lafwa sa bann Kretien-la. (Ebre 1:5, 6; 2:2, 3; 9:24, 25) Zot ti kapav servi bann rezonnman lozik ki lapot Pol ti servi, pou explik zot krwayans ar zot fami. Azordi, nou kapav ed nou bann frer ek ser pou servi bann piblikasion pou zot explik zot krwayans. Ek si sertin dimounn boufonn nou bann zenn parski zot krwar dan kreasion, nou kapav ed zot pou servi brosir La vie a-t-elle été créée ? ek brosir Cinq questions à se poser sur l’origine de la vie ? pou zot montre sa bann dimounn-la kifer zot krwar dan kreasion.

14. Mem si Pol ti bien okipe pou prese ek ansegn bann dimounn, ki kitsoz osi li ti fer?

¹⁴ Pol ti ankouraz so bann frer ek ser pou montre lamour kan zot fer lezot dibien. (Ebre 10:24) Li ti ed so bann frer ek ser, pa zis par so bann parol, me osi par so bann aksion. Par exanp, kan ti ena enn lafaminn dan Zide, Pol ti donn enn koudme pou soutenir so bann frer ek ser. (Zist. 11:27-30) An realite, mem si Pol ti bien okipe pou prese ek ansegn bann dimounn, li ti touletan rod bann fason pou ed lezot lor plan materyel. (Gal. 2:10) Kan li ti fer sa, li ti ed so bann frer ek ser pou ena plis konfians ki Zeova ti pou pran zot swin. Azordi, kan ena enn katastrof, nou kapav donn nou letan ek fer zefor pou ed nou bann frer ek ser. Kan nou fer sa, nou ranforsi zot lafwa. Nou kapav ede osi kan regilierman nou fer bann kontribision pou travay predikasion. Kan nou fer bann kitsoz koumsa, nou ed nou bann frer ek ser pou ena plis konfians ki Zeova zame pa pou abandonn zot.

15-16. Kan enn kikenn so lafwa feb, kouma nou bizin reazir anver li?

¹⁵ Pol ti kontign ankouraz bann ki ti ena enn lafwa feb. Li ti montre konpasion anver zot, ek li ti koz dan enn fason ankourazan avek zot. (Ebre 6:9; 10:39) Par exanp, dan let ki li ti ekrir bann Ebre, souvan Pol servi mo “nou.” Kan li’nn fer sa, li’nn montre ki li osi li bizin met an pratik bann konsey ki li pe done. (Ebre 2:1, 3) Parey kouma Pol, nou bizin kontign ankouraz bann ki ena enn lafwa feb. Nou fer sa kan nou montre zot ki nou vremem interese ar zot. Se koumsa ki nou montre zot ki nou kontan zot. Fason ki nou koz ar zot osi bien inportan, parski sa osi kapav ankouraz zot.

¹⁶ Pol ti ed so bann frer ek ser pou konpran ki Zeova konn tou bann bon kitsoz ki zot inn fer. (Ebre 10:32-34) Nou osi nou kapav fer parey avek enn kikenn ki so lafwa feb. Nou kapav demann li pou rakont nou kouma li’nn konn laverite, ouswa ankouraz li pou reflesi lor bann moman kot li’nn trouv lame Zeova dan so lavi. Nou kapav explik li osi ki Zeova konn tou bann bon kitsoz ki li’nn fer dan lepase, ek dir li ki Zeova zame pa pou abandonn li. (Ebre 6:10, NW; 13:6) Bann konversasion koumsa kapav ankouraz sa bann frer ek ser-la pou kontign servi Zeova.

KONTIGN ANKOURAZ LEZOT

17. Dan ki domenn nou bizin kontign vinn pli efikas?

¹⁷ Parey kouma enn zouvriye vinn pli efikas avek letan, nou osi nou kapav vinn pli efikas pou ankouraz nou bann frer ek ser. Nou kapav ed zot pou andir zot bann leprev, kan nou fer zot reflesi lor lexanp bann fidel serviter Zeova dan lepase. Nou kapav favoriz lape kan nou koz lor bann zoli kalite ki lezot ena. Kan ena bann dezakor, nou kapav ede pou ki ena lape. Nou kapav osi ranforsi lafwa nou bann frer ek ser kan nou ed zot pou explik zot krwayans, nou ed zot lor plan materyel ek emosionel, ek nou kontign ankouraz bann ki ena enn lafwa feb.

18. Ki kitsoz nou bien deside pou fer?

¹⁸ Bann frer ek ser ki travay lor konstriksion bann Lasal Renion ouswa bann Lasal Lasanble, zot bien ere. Nou osi nou pou ere kan nou “konstrir” bann frer ek ser nou lasanble, setadir kan nou ankouraz zot. Avek letan, enn batiman vinn vie ek li kas-kase. Parkont, kan sakenn ede pou “konstrir” so kamarad, nou tou nou gagn bann bienfe ki pou dire pou touletan. Alor, anou bien deside pou kontign ankouraz ek fortifie sakenn nou kamarad.​—1 Tes. 5:11.