Pa Bliye Bann Ki dan Home
1. Kifer nou bizin fer zefor pou pres ar bann dimounn ki dan bann home?
1 Azordi, amezir ki boukou dimounn pe rant dan laz, zot pe bizin fer fas ar enn move lasante. (Eccl. 12:1-7) Sertin dimounn aze res dan bann home, akoz sa li pa touzour posib pou zwenn zot kan nou prese lakaz par lakaz. Nou trouv sa mem dan bann pei kot an zeneral bann paran ki’nn rant dan laz al res kot zot zanfan ouswa enn lot fami. Li vre ki sa bann gran dimounn-la, ouswa lezot ki res dan bann home zot pa tro kapav bouze, ouswa zot ena enn problem memwar. Malgre sa, zot touzour kapav aprann konn Jéhovah ek devlop enn lamour pou Li. Kouma nou kapav fer zot tann bon nouvel konsernan enn “lesperans ki donn boukou lazwa”?—Tite 2:13.
2. Kotsa nou kapav trouv enn lalis bann home ki nou kapav vizite?
2 Pou Koumanse: Nou kapav fer enn lalis bann home si nou rod dan lanier telefonn, dan kategori “Home,” ek “Nursing Services.” Sirveyan servis kapav pran bann dispozision pou avoy bann proklamater kalifie vizit sak home. Si nou kont lor Jéhovah ek nou fer enn bon planning, nou pou kapav koumans enn letid Labib an group dan sa bann home-la.—Prov. 21:5; 1 Jean 5: 14, 15.
3, 4. (a) Avan ki to propoz pou fer enn letid an group, kisannla to bizin al zwenn? (b) Kouma to pou prezant responsab-la sa letid-la?
3 Kisannla to bizin al gete pou etabli enn letid an group? Dan bann gran home kot ena boukou rezidan, ek boukou staff, li pli bon ki nou al get resepsionis ek demann pou koz avek responsab. Dan bann tipti home, kot pena boukou rezidan ek kot ena zis enn-de dimounn ki travay, li pli bon ki nou pran randevou pou koz direk ar proprieter home-la.
4 Dan toulede ka, explik zot ki to pe fer enn travay volonter pou ed bann dimounn ki kontan lir ek koz lor Labib. Demande si kikenn ki ti pou kontan partisip dan enn ti kozri an group pou apepre 30 minit sak semenn, kot sakenn kapav exprim seki li panse. To kapav servi diferan piblikasion. Me boukou finn trouve ki bann dimounn bien kontan Mo livre zistoire la Bible ek Le plus grand homme de tous les temps. To kapav montre responsab-la sa bann piblikasion-la. Zot kapav tom enn laranzman lor ler, zour, ek lanplasman kot pou fer sa, koumsa li kapav met sa lor program kot ekrir tou bann laktivite. Pa ezite pou dir ki to enn Temwin Jéhovah. Me, anmemtan, fer responsab-la konpran ki to pa’nn vinn la pou fer enn seremoni relizie, okontrer to pe zis ed bann dimounn pou konpran Labib.
5. Sit bann sigzesion pratik ki kapav rann sa letid-la interesan kot zot tou pou tir profi.
5 Kouma Letid Deroule: Fason ki to pou fer letid pou depann lor bann sirkonstans ek latmosfer ki ena dan home. Alor, li bon ki to montre twa soup ek to servi to bon zizman. Amenn plizir kopi piblikasion ki pou servi ek repran zot apre letid. Kitfwa to pou bizin fer bann gran fotokopi pou sertin. To kapav fer lir bann paragraf, poz bann kestion, ek bann dimounn kapav reponn, parey kouma nou abitie fer. Demann bann ki anvi ek ki kapav, pou lir bann paragraf ouswa bann verse Labib. Pandan letid, montre twa amikal, pozitif, ek rann letid-la interesan. Si responsab-la dakor, detanzantan to kapav fer zot get enn nou bann video ki pou fortifie zot lafwa. To kapav osi atir zot latansion lor bann leson ki zot kapav tire atraver enn zistwar Biblik. To kapav koumanse ek termine par enn ti lapriyer. Sertin proklamater finn mem propoz bann rezidan pou sant bann kantik.
6. Si enn kikenn soulev enn obzeksion ki to kapav fer?
6 Me ki nou pou fer si enn kikenn pa dakor avek enn kitsoz ki’nn lir ouswa ki’nn dir pandan letid? Servi to bon zizman kan to reponn li. (Col. 4:6) Kitfwa to kapav montre li enn verse Labib ki kadre avek lobzeksion ki li’nn souleve. Si to trouve ki li pa pratik pou fer sa, not seki li’nn dir ek propoz pou get sa avek li apre letid.
7. Ki to kapav fer si enn kikenn ena enn kestion ouswa montre lintere?
7 Parfwa, enn kikenn kapav poz enn kestion ouswa dir ki li anvi aprann plis. Get seki enn ser dir kan sa arive: “Sa se enn bon kestion. Me parski se enn kestion ki zis ou tousel pe demande, mo ti pou kontan nou atann lafin nou letid, lerla, nou kapav get sa ansam.” To kapav pran bann dispozision pou fer enn letid Labib personel avek bann ki interese dan enn lot ler ek dan enn lot plas.
8. Kouma nou bizin kont bann letid an group ek bann letid personel ki nou fer?
8 An zeneral, li pli bon ki se bann mem proklamater ki retourne sak fwa. Sakenn kapav kont so ler. Enn fwa ki letid inn bien etabli, proklamater ki fer letid-la kapav kont enn vizit sak fwa ki li fer sa letid an group-la, ek kont enn letid lafin dimwa. Si to koumans letid avek enn dimounn an partikilie ki kapav konpran ek aprann, to kapav kont li enn letid, parey kouma to abitie fer.
9, 10. Ki bann kalite, bann ki pres dan Home bizin ena? Explike.
9 Respekte sa Dispozision-la: Li bon to etabli enn zour ek enn ler presi pou fer sa letid-la. Bann rezidan ek bann staff pou atann ki to fer sa letid-la regilierman ek ki to koumanse ek termine atan. (Mat. 5:37) Alor, li bon ki to donn depenn, to serye, ek to organiz twa bien. Lexperyans finn montre ki li bon ki de proklamater bien kalifie travay ansam pou fer sa letid-la. (Eccl. 4:9, 10) Dan bann gran home, kitfwa pou bizin plis proklamater.
10 Li bien inportan ki to montre twa amikal, ek to interese ar bann dimounn-la. (Phil. 2:4) Pandan to premie vizit, pran letan pou fer konesans avek tou bann ki la. Ekrir ek fer zefor pou rapel zot nom avan prosin letid. Me rapel ki bann vie dimounn kapav santi zot ofanse si enn etranze apel zot par zot nom. Si to montre pasians ek konpasion, zot tou pou santi zot alez.
11. Kouma to kapav montre respe anver bann staff ek bann fami sa bann rezidan-la?
11 Li bien inportan osi ki to montre respe ek bonte anver bann staff ek fami bann rezidan. Enn fwa ki letid inn bien etabli, li bon ki to pa sanz ler ouswa fason ki to fer letid, avan ki to koz sa avek responsab-la. Detanzantan, demann responsab-la kouma li trouv letid. Si pandan letid bann manb lafami vinn rann vizit zot paran, pran linisiativ pou al zwenn zot. Explik zot lobzektif sa letid Labib-la. Rasir zot ki to bien apresie zot paran. Invit zot pou asize ek swiv letid.
12, 13. Rakont bann bon lexperyans ki bann Temwin finn gagne kan zot finn prese dan bann home.
12 Rezilta: Bann rapor ki bann sirveyan sirkonskripsion ek bann kongregasion avoye, montre ki nou finn gagn bann bon rezilta dan sa form predikasion-la. Dan enn home, preske 20 rezidan ti asiste premie letid. Avek letan, bann proklamater finn koumans sis letid Labib. Alafin, enn finn batize. Dan enn lot home, enn madam 85 an inn koumans etidie an group. Sa finn pous li pou asiste bann renion dan kongregasion, ek li’nn mem dir ki li anvi pran batem. Kan enn home ti deside pou diminie so bann aktivite, zot finn desid pou tir sa letid an group ki bann Temwin Jéhovah ti pe fer la. Me bann rezidan inn fer konplint ar responsab! Finalman, letid inn rekoumanse ek apre ti ena ant 25-30 dimounn ki ti pe asiste.
13 Lamour ki nou montre anver bann dimounn ki dan bann home les enn bon linpresion pa zis lor bann rezidan. Par exanp, li pa rar pou trouv bann staff asiste ek mem partisipe pandan letid. An realite, kan nou fer zefor pou montre lintere anver bann rezidan ki dan home, nou pe rann zot tou enn bon temwaniaz. (1 Pierre 2:12) Apre ki bann Temwin inn explik li lobzektif sa letid-la, enn responsab finn dir: “Sa fer lontan ki nou ti pe atann bann dimounn kouma zot? Kan zot kapav koumanse?” Enn lot responsab inn ekrir: “Avek tou mo leker, mo ti pou kontan rekomann sa letid an group-la tou bann home dan landrwa. Bann Temwin Jéhovah ofer sa servis gratis-la parski sa fer parti zot travay predikasion.” Enn home dan Hawaii inn donn bann Temwin Jéhovah enn sertifika pou felisit zot pou bon travay ki zot pe fer ek ki dekrir zot kouma “enn trezor ki ena enn gran valer.”
14. Kifer nou bizin ed bann dimounn ki dan home?
14 Jéhovah invit bann dimounn aze pou loue Li. (Ps. 148:12, 13) Sa linvitasion-la konsern osi bann ki dan home. Eski dan to teritwar ena bann home kot bann dimounn aze kapav tann bon nouvel? Avek led bann ansien dan to kongregasion ek soutien bann responsab, to kapav rann enn bon temwaniaz dan bann home. Kan nou pa bliye bann ki’nn rant dan laz, nou pe imit Jéhovah.—Ps. 71:9, 18.