Question Ki’nn Soulevé

◼ Eski li bon ki enn Témoin de Jéhovah faire traitement ou-soit gagne bann soin dan enn l’hopital ou-soit enn home ki dirigé par enn l’organisation religieux?

Plusieurs l’organisation religieux dirige bann l’hopital ou-soit bann home ek dan sa bann l’endroit-la bann dimoune agé kapav gagne bann traitement medical ou-soit bann longue soin. En general, sa bann l’hopital-la zot pa existé pou faire avance bann l’interet Babylone la Grande. (Rév. 18:2, 4) Kitfois au depart, zot ti permette enn l’organisation religieux gagne kass. Zordi, certain l’hopital ena zis enn nom religieux, alors ki lezot, encore ena certain ministre religieux ki travail ladan.

Si enn Témoin de Jéhovah bizin al l’hopital ou-soit bizin gagne bann soin dan enn home, li bizin prend so prop decision si li pou al dan enn l’endroit ki kitfois ena enn lien avek enn l’organisation religieux. Conscience enn Témoin kapav permette li pou faire sa, alors ki conscience enn lot kapav empeche li pou faire sa. (1 Tim. 1:5) Ena certain kitsoz ki kapav influence decision enn dimoune, alors li bon nou considere sa.

Par exemple, li possible ki sa l’hopital ou sa home ki ena enn nom religieux-la, c’est sel l’hopital ki ena dan l’endroit. Ou-soit mem si ena enn lot ki pa loin, kitfois l’hopital ki kapav ena enn lien avek la religion-la ena reputation pou donne bann pli bon soin. Sa l’hopital avek enn nom religieux-la kapav sel l’hopital ki equipé pou donne enn traitement specifik ki nou bizin, ou-soit c’est sel l’hopital kot sa docteur ki traite nou-la ou-soit sa docteur ki pou faire nou l’operation-la kapav travail. Ek aussi, parfois sa bann l’hopital ki ena enn lien avek enn religion-la kapav disposé pou respecté ou decision concernant di-sang, alors ki lezot l’hopital publik ou privé kapav refusé. Alors sa c’est certain kitsoz ki ou kapav consideré kan ou decidé ki l’hopital ou pou choisir.

Si ou decide pou al dan enn l’hopital ou-soit dan enn home ki ena enn lien avek enn l’organisation religieux, ou kapav considere l’argent ki ou pé donne zot couma enn paiement pou enn service. Pou ou, li pareil couma enn l’organisation religieux ki pé dirige enn business. Kan ou paye pou service ki sa business-la pé offert ou, ou pa pé donne enn contribution directement pou soutenir enn fausse religion. Ou pé zis payé pou enn produit ou-soit enn service.

Bien sur, en tant ki chretien, dan sa qualité circonstance-la, ou bizin assure-ou ki ou pa participe dan okenn pratik fausse l’adoration. Ou pa pou servi aussi bann titre religieux couma “Mon pere” ou “Ma soeur” avek bann dimoune ki travail la-bas ou-soit ki vinn visite l’hopital-la. (Mat. 23:9) Ou bizin faire sur ki sa li reste zis enn business, kot ou pé gagne enn traitement ek enn service, pa plus ki sa.

Kan ou admette l’hopital, ou kapav dire ki ou enn Témoin de Jéhovah ek ki ou ti pou content gagne visite bann ancien ou congregation. Coumsa ou pou sur ki ou pou gagne enn bon soutien spirituel pendant ou sejour.—1 Thess. 5:14.

Bann membre la famille ki dan la verité, bann ancien, ek lezot dan congregation bizin prend bien soin besoin spirituel bann frere ek soeur agé ki vive dan bann home, surtout kan sa bann l’endroit-la dirigé par enn organisation religieux. Si nou faire sa regulierement sa kapav enn grand l’encouragement pou sa bann frere ek soeur agé-la. Sa kapav aussi empeche zot pou participe, par erreur, dan bann ceremonie ou-soit fête religieux, ou-soit dan n’importe ki lezot l’activité ki faire dan sa l’endroit-la.

Avek sa bann point-la dan nou l’esprit, sakenn parmi nou pou considere tou bann kitsoz ki impliké ek apré decidé dan ki l’hopital ou-soit home li pou allé.—Gal. 6:5.