Pran Labitid pou Vinn Aler
1. Ki lexanp Jéhovah donn nou?
1 Jéhovah touletan aler. Par exanp, Li donn so bann serviter “led dan ler ki bizin.” (Héb. 4:16) Li donn nou osi ‘nouritir spiritiel dan ler ki bizin.’ (Mat. 24:45) Alor, nou kapav sir ki zour so koler “pa pou an-retar.” (Hab. 2:3) Lefe ki Jéhovah fer tou kitsoz aler, sa fer nou gagn boukou bienfe! (Ps. 70:5) Me pou nou, bann dimounn inparfe ki touletan bien okipe, li vremem enn defi pou nou aler. Kifer nou bizin pran labitid pou vinn aler?
2. Kifer sa rann glwar Jéhovah kan nou aler?
2 Azordi, dan sa bann dernie zour ki nou pe viv la, bien rar bann dimounn vinn aler. Kifer? Se parski boukou dimounn “kontan zotmem” ek zot pa “konn kontrol zot.” (2 Tim. 3:1-3) Alor, kan enn Kretien li aler dan travay, dan bann randevou, ek dan bann renion, bann dimounn remark sa ek sa rann glwar Jéhovah. (1 Pierre 2:12) Kan nou examinn noumem, eski nou rann nou kont ki bien souvan nou aler dan nou travay profann, alor ki pou bann levennman teokratik souvan nou an-retar? Kan nou ariv aler pou bann renion, mem pou kantik ek lapriyer, sa montre ki nou bien anvi imit nou Papa ki dan lesiel, ki kontan kan tou kitsoz an-ord.—1 Cor. 14:33, 40.
3. Kan nou aler, kouma sa montre ki nou ena konsiderasion pou lezot?
3 Kan nou aler, nou montre osi ki nou ena konsiderasion pou lezot. (Phil. 2:3, 4) Par exanp, si nou ariv aler dan renion ek mem dan bann renion predikasion, nou pa pou deranz nou bann konpagnon Kretien ki deza la. Me, si nou ena labitid pou vinn an-retar, sa pou donn lezot linpresion ki pou nou, se nou letan ki ena plis valer. Kan nou aler, sa montre ki nou enn dimounn ki kapav fer konfians, ki serye, ek ki responsab—bann kalite ki lezot apresie.
4. Ki nou kapav fer si souvan nou an-retar?
4 Si souvan to an-retar, reflesi kifer to an-retar. Organiz twa bien, setadir fer enn program realist ki pou permet twa fer bann kitsoz dan ler ki bizin. (Eccl. 3:1; Phil. 1:10) Demann Jéhovah so led. (1 Jean 5:14) Kan nou aler, se enn fason ki nou montre ki sa de komannman-la ena valer pou nou: (1) kontan Bondie ek (2) kontan nou prosin.—Mat. 22:37-39.