Suive l’exemple ki Jésus inn laissé
1. Ki l’exemple Jésus finn laissé?
1 Kan nou participe dan l’activité pou faire bann disciple, nou bizin pa blié ki nou l’exemple kapav ena enn grand l’effet lor bann dimoune ki pé observe nou. Jésus ti enseigné par parole ek par action. Bann ki ti observe li ti kapav trouve so zèle, so l’amour pou bann dimoune, so grand desir pou sanctifié nom so Papa, ek so determination pou faire volonté so Papa.—1 Pierre 2:21.
2. Dan ki fason nou l’exemple ena enn l’effet lor bann ki travail avek nou dan ministere?
2 Kan nou preché porte-en-porte: Pareil couma Jésus, nou l’exemple ena enn l’influence lor bann ki travail ensam avek nou. Kan bann nouveau ek bann proclamateur ki pena enn grand l’experience trouve nou zèle dan predication, sa pou faire zot reflechi lor qualité zot service dan predication. Kan zot observe nou la-joie ek nou l’interet sincere pou lezot, sa pou faire zot rappel l’importance pou manifesté sa bann mem qualité-la dan zot ministere. Kan zot trouve nou zèle pou servi la Bible, pou faire visite, ek pou conduire bann l’etude la Bible, zot pou motivé pou faire pareil.
3. Couma nou l’exemple kapav enseigne bann etudiant, ek ki zot pou kapav aprann?
3 Kan nou conduire enn l’etude la Bible: Nou bann etudiant pou surtout observe nou conduite. Par exemple, mem si nou explik zot l’importance pou prepare zot l’etude, rod bann verset, ek souligne bann point important, zot pou remarké si nou, nou finn preparé. (Rom. 2:21) Si nou arrive a l’heure pou faire l’etude, zot pa pou trop envie laisse bann lezot l’activité tombe dan mem l’heure ki zot l’etude. Pena doute ki zot pou remark aussi nou desir pou manifesté l’esprit sacrifice dan nou ministere ek nou grand la-foi. Li pa etonnant ki bann ki etudié avek bann ki suive l’exemple Jésus bien pré, souvent vinn bann proclamateur zelé ki gagne bann bon resultat dan zot ministere.
4. Kan nou assisté bann reunion dan congregation, ki nou enseigne lezot par nou l’exemple?
4 Kan nou assisté bann reunion congregation: Tou bann ki forme parti dan congregation ena enn role pou enseigne lezot dan bann reunion par zot l’exemple. Bann dimoune interessé ki commence vinn reunion, tire profit ar bann bon l’exemple ki zot trouvé dan congregation. Zot pou remark l’amour ek l’unité ki ena parmi bann frere ek soeur, ek fason ki zot habillé ek coiffé avek modestie. (Ps. 133:1) Lezot pou remark aussi bon l’exemple ki nou donné kan nou assisté bann reunion regulierement ek kan nou faire declaration publik nou la foi. Enn dimoune ki ti vinn assisté enn nou bann reunion ti remarké couma enn tipti tifi ti reussi rod dan so la-Bible enn verset ki ti cité, ek couma li ti suive bien kan ti pé lire text-la. So l’exemple ti pousse sa missié-la pou demann enn l’etude la Bible.
5. Kifer fodé jamais nou croire ki nou l’exemple pena enn grand l’importance?
5 La Bible encourage nou pou imite bon l’exemple ki sakenn parmi nou donné. (Phil. 3:17; Héb. 13:7) Alors, nou bizin rappel ki si nou suive bien l’exemple ki Jésus inn laissé, lezot pou remark sa ek sa kapav influence zot dan enn fason positif. Avek sa pensée-la dan nou l’esprit, anou prend compte bann parole ki trouve dan 1 Timothée 4:16: “Contigne veille bien lor to-mem ek lor to l’enseignement.”