Revision Lekol ministere theocratik

Nou pou examine bann question ki lor sa feuille-la dan Lekol ministere theocratik pendant semaine ki commence a partir le 30 août 2010. Surveillant lekol pou faire enn revision pendant 20 minute. Sa revision-la basé lor bann sujet ki ti faire a partir semaine 5 juillet ziska le 30 août 2010.

1. Couma kan nou medite lor la priere ki Salomon ti faire pou l’inauguration temple, sa faire nou apprecié pli bien personnalité Jéhovah? (1 Rois 8:22-53) [5 juillet, w05-CE 1/8 p. 30 § 3; it-2-⁠F p. 872 § 3] Dan so la priere, Salomon ti exprime so grand reconnaissance envers Jéhovah—enn Bondié ki manifesté l’amour fidele, ki realise so bann promesse, ek ki ecoute bann la priere. Li enn Bondié ki ena la justice, ki recompense enn dimoune juste ek ki puni seki mauvais mais ki pardonne enn kikenn ki’nn faire peché mais ki repenti ek retourne vers Li. Li pa zis enn Bondié pou enn nation, Bondié bann Hébreux, mais Li Bondié tou dimoune ki rod Li.

2. Kifer nou kapav dire ki malgré bann erreur ki li ti faire, David ti marche devant Jéhovah “avek l’integrité dan so leker”? (1 Rois 9:4) [12 juillet, w97-⁠F 1/5 p. 5 § 1-2] Mem si David ti faire bann erreur, li ti humble, ek li ti vrai-mem envie faire seki droite. Li ti touletan demandé ek accepté ki conseil-li ek corrige-li. Kan ti montré li ki li ti faire bann erreur bien grave, jamais li ti rod ­gagne raison pou so bann mauvais action. (2 Sam. 12:13) Seki pli important, jamais li ti eloigne-li ar vrai l’adoration.

3. Kifer la reine Sheba ti dire sa parole-la concernant Salomon: “To bann serviteur ki la zot heureux, zot ki pé deboute touletan devant toi ek ki ecoute to sagesse!”? (1 Rois 10:4-8) [12 juillet, it-2-⁠F p. 799] Si la reine Sheba ti dire ki bann serviteur Salomon heureux, c’est pa parski zot ti entouré avek la richesse—mem si sa ti vrai. Plutot, bann serviteur Salomon ti beni parski zot ti ena possibilité touletan pou ecoute sagesse ki Salomon ti recevoir ar Bondié. La reine aussi ti gagne possibilité pou ecoute sagesse Salomon. Pena okenn doute, la reine ti reconette ki c’est Jéhovah ki ti donne Salomon sagesse ek prosperité.

4. Ki conclusion nou kapav tiré kan nou trouvé ki Jéhovah ti donne l’ordre ki Abiya gagne enn l’enterrement ki digne? (1 Rois 14:13) [19 juillet, cl-⁠F p. 244 § 11] Jéhovah ti donne l’ordre pou touye famille le roi Yarobam, ki ti bann apostat. Pourtant Li ti donne l’ordre ki enn parmi bann garson le roi, Abiya, gagne enn l’enterrement ki digne parski ti trouve “enn kitsoz ki bon dan li envers Jéhovah.” (1 Rois 14:1, 10-13) Jéhovah, ti examine leker Abiya ek ti trouve “enn kitsoz ki bon,” mem si sa ti enn ti kitsoz ou-soit pa ti important. Li ti mem honore li, kan Li ti montré misericorde envers li, mem si li ti dan enn famille apostat. Nou kapav bien content ki Jéhovah examine nou pou trouve kitsoz ki bon dan nou!

5. Kifer premier fois ki Éliya ti vinn visite Ahab, sa ti tombe dan enn bon moment? (1 Rois 17:1) [26 juillet, w08-⁠F 1/4 p. 19, l’encadré] Saison la secheresse ti deja pli longue ek pli dur kan Éliya ti vinn dire Ahab ki pou ena la secheresse. Le peuple ti croire ki Baal ti “dirige bann nuage,” bondié ki ti pou amenn la pluie pou ki saison la secheresse fini. Kan saison la secheresse ti pli longue ki li ti habitué été, bann dimoune ti demandé: ‘Kot Baal été? Kan li pou amenn la pluie?’ Kan Éliya ti donne l’avertissement ki pa pou ena la rosée ni la pluie tant ki li pa donne l’ordre, sa ti enn coup terrible pou bann adorateur Baal.

6. Ki Éliya ti pé rod dire par: “Hesité entre deux l’opinion different”? (1 Rois 18:21) [2 août, w08-⁠F 1/1 p. 19 § 3-4] Bann Israélite pa ti comprend ki zot ti bizin choisir entre adore Jéhovah ek adore Baal. Zot ti pensé ki zot ti kapav faire toulé-deux—calmé Baal pou ki li beni zot bann plantation ek calmé “Jéhovah, chef bann l’armée” pou ki li protege zot dan bann la guerre. (1 Sam. 17:45) Zot ti’nn blié ki Jéhovah demann ki nou reste attaché ar Li tousel, ek ki Li merite sa. (Ex. 20:5) Bann parole Éliya kapav aide nou pou ré-examine nou bann priorité ek fason ki nou adore Jéhovah.

7. Pareil couma cas Éliya montré, dan ki but Jéhovah servi so puissance en faveur so bann serviteur? (1 Rois 19:1-12) [2 août, cl-⁠F p. 42-43 § 15-16] Kan Éliya ti pé sauvé pou ki mauvais la reine Jézabel pa touye li, Jéhovah ti rassure li kan Li ti manifesté So puissance dan enn fason extraordinaire. Di-vent, tremblement de terre, ek difé ti montré ki sa Kikenn ki tout-puissant dan l’univers-la ti avek Éliya. Alors, nou aprann ki Jéhovah ena enn grand desir pou servi so puissance en faveur bann ki content Li.

8. Kifer Naboth ti refuse vann so plantation raisin ar Ahab, ek ki leson nou kapav aprann ar seki’nn passé? (1 Rois 21:3) [9 août, w97-⁠F 1/8 p. 13 § 18-20] La Loi mosaïk ti defann enn dimoune vann so la terre ki li’nn ­gagné couma enn heritage, pou ki sa reste dan l’heritage so famille. Naboth ti reste fidele mem si li ti koné ki Ahab ek Jézabel ti kapav touye li. Nou koné ki nou fidelité kapav coute nou beaucoup dan sa mauvais le monde-la. Nou bizin determiné pou pa laisse nanyin diminué nou fidelité pou Jéhovah ek so l’organisation.

9. Dan ki sens enn Shounammite ti ‘gagne tracas’ concernant Élisha? (2 Rois 4:13) [16 août, w97-⁠F 1/10 p. 30 § 6-8] Shou­nammite-la ti ‘gagne tracas’ dan sens ki li’nn gagne beaucoup difficulté pou donne prophete Élisha mangé ek enn logement regulierement. (2 Rois 4:8-13) Sa femme ki ti ena l’attachement pou Bondié-la, ti insisté ki Élisha reste kot li chaque fois ki li ti passé, parski pou li, travail ki Élisha ti faire pou nation Israël, ti ena enn grand valeur. Sa recit bien touchant-la rappel nou ki nou Papa ki dan le ciel remark bonté ki nou montré envers so bann serviteur. (Héb. 6:10)

10. Kifer Élisha pa ti accepté cadeau ki Naamân ti donne li? (2 Rois 5:15, 16) [23 août, w05-CE 1/10 p. 19 § 2] Élisha ti refuse sa cadeau-la parski li ti reconette ki c’est grace a la force Jéhovah ki Naamân ti gueri, pa par so prop la force. Jamais li ti pou pense pou tire profit ar sa travail ki Jéhovah ti donne li-la. Zordi, bann vrai adorateur reconette ki li dangereux ki nou rod tire enn profit personnel ar service ki nou offert Jéhovah ek ki c’est enn kitsoz ki nou bizin pa faire. Zot suive sa bann parole Jésus-la: “Zot finn gagne gratis, donne gratis.” (Mat. 10:8)