Nou pé renverse bann montagne
1 Depuis bien longtemps, Satan finn aveuglé l’esprit ek leker bann dimoune kan li finn servi bann fausse l’enseignement ek tromperie. Li finn fann bann doctrine couma trinité, nâme li immortel, ek l’enfer difé. Li faire bann dimoune gagne doute lor l’existence enn Createur ek faire zot pa croire ki c’est Bondié li-mem ki finn faire ecrire la Bible. Si enn dimoune raciste ou-soit nationaliste, sa aussi c’est bann barriere ki kapav empeche li accepté la verité. (2 Cor. 4:4) Couma nou kapav renverse sa bann montagne-la?—2 Cor. 10:4, 5.
2 Ena bann sentiment ki impliké: Souvent kan bann dimoune inn croire dan certain croyance religieux depuis longtemps, zot ena bann sentiment bien fort lor la. Certain finn reste attaché ar bann fausse croyance depuis zot l’enfance. Pou kapav aide sa bann dimoune-la, nou bizin koz dan enn fason ki montré ki nou respecté zot fason pensé.—1 Pierre 3:15.
3 Nou kapav montré respé pou sa bann dimoune-la kan nou laisse zot explik zot bann croyance ek kifer zot croire ladan. (Jacq. 1:19) Kitfois zot bien attaché avek croyance ki nâme li immortel parski zot finn perdi enn kikenn ki zot content dan la mort ek ki zot envie retrouve li encore. Ou-soit zot kapav celebré bann fête parski zot content l’occasion ki zot gagné pou passe le temps avek zot famille. Kan nou ecoute sa bann dimoune-la kozé, sa pou aide nou pou comprend zot bann sentiment ek pou reponn zot dan enn fason ki touche zot leker.—Prov. 16:23.
4 Imite Jésus: Jésus ti donne nou enn bon l’exemple dan fason ki li ti reponn bann question enn missié ki ti bien konn la Loi. Jésus pa ti dire li seki li ti bizin faire, seki missié-la kitfois ti pou rejeté, parski li ti bien content so bann prop croyance. Jésus ti plutot servi bann l’Ecriture, li ti invite missié-la pou exprime so l’opinion, ek li ti aide li pou raisonné par enn l’exemple.—Luc 10:25-37.
5 La verité ki ena dan Parole Bondié kapav faire bann dimoune arrete croire dan bann fausse croyance religieux. (Héb. 4:12) Si, avek patience, nou essaye touche leker bann dimoune par seki nou dire, nou kapav aide zot pou rejette bann kitsoz ki fausse ek accepté la verité ki kapav libere zot.—Jean 8:32.