Vive avek jour Jéhovah dan ou l’esprit
1 “Grand jour Jéhovah bien pré. Li bien pré, ek li pé vini vite-vite.” (Tseph. 1:14) Tsephania ek 11 lezot ti prophete—couma souvent appel zot—ti vive avek jour Jéhovah dan zot l’esprit. Kan nou pou examine seki zot finn ecrire par l’inspiration Bondié dan l’etude de livre, grace a livre Vivez en gardant à l’esprit le jour de Jéhovah, sa pou aide nou pou prepare-nou pou sa jour ki faire peur-la.—Tseph. 2:2, 3.
2 Bann caracteristik sa livre-la: Au lieu li mette l’accent lor signification symbolik ou-soit l’explication verset par verset sa 12 livre prophetik-la, livre Le jour de Jéhovah expliké couma sa bann recit-la applik ar bann situation réel ki nou joinde dan nou la vie toulé-jour. Li montré nou ki nou bizin garde dan nou l’esprit ki jour Jéhovah bien pré, ek ki sa bizin influence bann decision ki nou prend ek fason ki nou agir. Nou pou guetté couma seki sa bann prophete-la finn ecrire, appliké zordi dan bann domaine ki touche la vie famille, relation ki ena entre bann frere ek soeur chretien, choix nou bann divertissement, nou ministere, ek decision ki nou prend concernant nou travail.
3 Section 1 dan sa livre-la aide nou pou konn bien sa 12 ti prophete-la ek seki zot finn ecrire. Kisannla zot été? Ki situation ki nou pé gagné zordi ki pareil ar seki zot ti gagné dan zot lepok? Section 2 attire l’attention lor Jéhovah ek so bann qualité. Ki nou kapav aprann lor Jéhovah ek lor so personnalité grace a sa bann ti prophete-la? Section 3 koz lor nou conduite ek lor relation ki nou ena avek lezot. Couma dan bann fason pratik, nou kapav faire Jéhovah plaisir chaque jour? Section 4 expliké couma vive dan la joie pendant ki nou pé attann jour Jéhovah.
4 Prepare-ou depuis asterla-mem pou kapav tire profit: Faire tou seki necessaire pou ou bien profite l’etude dan livre Le jour de Jéhovah ki pou commencé semaine 4 août 2008! Fixé l’objectif pou ki ou kapav present dan l’etude de livre chaque semaine. Prepare bien chaque chapitre, rod bann verset pou guetté ki rapport zot ena avek seki’nn ecrire dan livre-la. Medite lor seki ou aprann kan ou pose ou-mem sa bann question-la: ‘Couma eski mo kapav applik sa bann renseignement-la dan mo lakaz, dan lekol, dan travail, dan mo ministere, ek dan mo relation avek mo bann frere ek soeur?’ Vinn l’etude de livre bien preparé pou faire bann commentaire, pou ki ena enn l’echange l’encouragement.—Rom. 1:12.
5 Nou souhaité ki nou l’etude dan livre Le jour de Jéhovah prepare nou asterla-mem, pou ki nou kapav “supporte” sa ‘jour ki grand ek ki faire bien peur-la.’ Vrai-mem, sa jour-la bien pré!—Yoël 2:11.