“Pa peur pou koz parole Bondié”
1 Eski parfois ou hesité pou koz lor ou la-foi kan ou gagne l’occasion dan travail ou-soit dan lekol? Eski li difficile pou ou pou donne temoignage informel ar ou bann famille ek ou bann voisin ou-soit avek bann dimoune ki ou pa koné? Ki kapav aide nou tou pou profite chaque l’occasion ki ena pou “pa peur pou koz parole Bondié”?—Phil. 1:14.
2 Pa hesité: Si finn mette enn fausse accusation lor ou bon camarade ou-soit lor enn membre ou famille, eski ou ti pou hesité pou defann li? Pendant plusieurs siecle, bann dimoune finn dire beaucoup fausseté lor Jéhovah, nou Camarade ki pli proche ar nou. Nou ena grand privilege pou defann ek rann temoignage pou nou grand Bondié! (Is. 43:10-12) Si nou ena enn grand l’amour pou Jéhovah, sa kapav aide nou kan nou senti-nou mal a l’aise parski tou lizié lor nou, ou-soit kan nou gagne peur. Sa l’amour-la kapav pousse nou aussi pou kozé, ek pa hesité pou donne temoignage avek courage lor la verité.—Actes 4:26, 29, 31.
3 Nou bizin maziné ki nou message li enn bon nouvel. Bann dimoune ki prend sa compte pou gagne bann bienfait ki pou dure longtemps. Nou pou kapav preche avek plus courage si nou fixé nou l’esprit lor valeur ki travail predication ena, au lieu ki nou fixé nou l’esprit lor nou-mem ou-soit lor bann dimoune ki kont nou.
4 L’exemple ki lezot inn laissé: Nou kapav gagne la force kan nou considere la vie bann lezot serviteur fidel ki’nn koz parole Bondié avek courage. Par exemple, Hénok ti annonce jugement Jéhovah kont bann dimoune rebelle avek courage. (Jude 14, 15) Avek fidelité, Noé ti preche avek bann dimoune ki ti indifferent. (Mat. 24:37-39) Mem si bann chrétien dan premier siecle ti bann dimoune “ordinaire ki pa ti ena grand l’instruction,” zot ti contigne preché malgré grand l’opposition ki ti ena. (Actes 4:13, 18-20) La Tour de Garde ek Réveillez-vous ! souvent raconte la vie bann serviteur dan nou lepok ki grace a zot la-foi en Jéhovah, finn surmonte zot la-peur pou bann zom ek finn vinn bien zelé dan predication.
5 Nou kapav gagne courage kan nou examine la vie bann serviteur fidel dan le passé ki finn faire face ar bann situation bien difficile. (1 Rois 19:2, 3; Marc 14:66-71) Zot “finn prend courage grace a nou Bondié” ek pa finn peur pou kozé. Nou aussi nou kapav faire pareil!—1 Thess. 2:2.