Montré enn l’interet sincere—Kan ou guette dimoune-la kan ou kozé
1 Kan nou pé preche avek enn kikenn en publik ou-soit de porte-en-porte, souvent nou guette figure dimoune-la avant nou kozé. Dan sa tigit lé-temps-la, nou kapav koné si dimoune-la content ou non ki nou pé koz avek li; nou kapav mem koné dan ki mood li été. Pareil, sa dimoune-la aussi kapav konn beaucoup kitsoz lor nou. Guette seki enn madame ti dire lor enn soeur ki ti passe kot li: “Seki mo rappel c’est sa calme ki ti ena lor so figure-la. Et sa ti faire moi envie konn plus.” Seki sa madame-la ti trouvé, ti pousse li pou ecoute la bonne nouvelle.
2 Enn fason efficace kot nou kapav commence enn conversation kan nou pé preché lor la rue ou-soit dan bann place publik c’est attann ki dimoune-la guette nou. Enn frere veille figure bann dimoune ki passé. Kan li trouve enn dimoune pé guette li, li faire enn sourire ek li presente li bann magazine. Li gagne bann bon conversation kan li servi sa method-la ek li place beaucoup publication.
3 Comprend seki lezot ressenti: Si nou guette bann dimoune kan nou kozé, li pou pli facile pou nou koné ki zot ressenti. Par exemple, si dimoune-la pa comprend seki nou pé dire, ou-soit si li pa d’accord avek enn kitsoz ki nou’nn dire, nou pou trouve sa lor so figure. Si li occupé ou-soit li pressé, sa aussi nou pou trouvé lor so figure. Dan sa bann cas-la, nou pou adapté-nou ek nou pou faire enn presentation pli courte. Kan nou prend compte seki lezot ressenti, nou montré ki nou ena enn l’interet sincere pou zot.
4 Kan ou sincere ek ou koz avek conviction: Dan beaucoup culture, si ou guette enn dimoune dan so figure sa montré ki ou sincere. Remarké ki Jésus ti faire kan so bann disciple ti demann li: “Kisannla vrai-mem kapav sapé?” La Bible dire: “Jésus ti guette zot dan zot figure, ek li ti dire zot: ‘Pou bann zom, li impossible, mais pou Bondié tou kitsoz possible.’” (Mat. 19:25, 26) Sans doute conviction ki Jésus ti ena lor so figure ti faire so bann parole ena plus poids. Pareil, si nou guette enn dimoune kan nou kozé, sa pou permette nou partage message lor Royaume Bondié avek sincerité ek conviction.—2 Cor. 2:17; 1 Thess. 1:5.