Couma pou garde nou zèle
1 Sa zèle avek ki Apollos ti accompli so ministere-la kapav faire nou pense nou bann compagnon chrétien ki bien zelé dan predication zordi. (Actes 18:24-28) Mais nou tou, nou gagne sa l’encouragement-la: “Faire zot travail sans perdi le temps; contigne ena zèle grace a l’esprit saint.” (Rom. 12:11) Ki kapav aide nou pou ena zèle ek aussi pou garde nou zèle dan nou ministere?
2 La connaissance augmente nou zèle: Apré ki Jésus ti apparette avek deux so bann disciple ek “ti interprete tou bann kitsoz dan Parole sacré ki ti koz lor li” zot ti dire: “Eski nou leker pa ti pé brulé kan li ti pé koz avek nou lor chemin?” (Luc 24:27, 32) Eski nou aussi, nou pa content ek eski nou leker pa brulé kan nou comprend pli bien Parole Bondié? Oui, la connaissance augmente nou la-foi. Romains 10:17 expliké: “Seki nou tendé faire nou gagne la foi.” Si dan nou leker nou ena confiance dan bann promesse Jéhovah, nou pa pou kapav arrete koz lor bann kitsoz ki nou finn aprann!—Ps. 145:7; Actes 4:20.
3 Avek le temps nou finn gagne enn connaissance grace a seki nou finn etudié. Mais eski nou kapav fié zis lor sa connaissance-la, pou nou l’amour pou Bondié contigne reste fort ek ki nou zèle pou so service contigne augmenté? Non, nou bizin contigne ameliore fason ki nou comprend la verité ek augmente nou l’amour pou Jéhovah. Sinon, tigit-tigit nou service pou Jéhovah pou vinn enn routine. (Rév. 2:4) Parole Bondié encourage nou pou “contigne . . . progressé dan la connaissance exact Bondié.”—Col. 1:9, 10.
4 Fason ki nou etudié: Alors, li bon ki nou examine fason ki nou etudié. Par exemple, kitfois nou kapav souligne nou Tour de Garde ek donne bann bon reponse. Mais eski nou faire enn zeffort pou guette bann verset la Bible ki donné en reference ek pou reflechi lor maniere ki nou kapav applik sa dan nou la-vie? Eski nou faire enn zeffort, si nou situation permette nou, pou faire recherche dan lecture la Bible toulé-semaine, ek pou medite lor bann leson ki nou kapav tiré dan sa lecture-la? (Ps. 77:11, 12; Prov. 2:1-5) Li vrai-mem dan nou l’avantage pou medite lor Parole Bondié ek pou concentré nou l’esprit lor la! (1 Tim. 4:15, 16) Sa qualité l’etude la pou nourri nou leker ek pou pousse nou pou vinn “zelé pou bann bon action.”—Tite 2:14.