Crée bann l’occasion pou preché
1 Tou bann dimoune ki faire partie dan congregation, pa dan mem situation. Pourtant, nou uni parski nou tou determiné pou loué Jéhovah. (Ps. 79:13) Si nou pa kapav faire beaucoup dan predication a cause bann problem la santé ou-soit lezot situation difficile, couma eski nou kapav crée bann l’occasion pou preché?
2 Dan bann activité toulé-jour: Jésus ti touletan profite bann l’occasion kot li ti joinde bann dimoune pou donne temoignage. Li ti koz avek Matthieu kan li ti pé passe devant bureau taxe, avek Zachée kan li ti pé sorti dan enn l’endroit pou al dan enn lot, ek avek enn femme samaritaine kan li ti pé reposé. (Mat. 9:9; Luc 19:1-5; Jean 4:6-10) Dan nou bann activité toulé-jour, nou aussi nou kapav donne temoignage avek n’importe ki dimoune ar ki nou kozé. Si nou ena la Bible, bann tract ou-soit bann brochure touletan avek nou, nou pou paré pou koz lor nou l’esperance.—1 Pierre 3:15.
3 Eski ou la-santé pa permette ou marché pou al devant la porte dimoune? Veille tou l’occasion ki ou gagné pou donne temoignage bann personnel medical ki kapav visite ou ek aussi tou lezot dimoune ki ou joinde. (Actes 28:30, 31) Si ou situation souvent oblige ou pou reste lakaz, eski ou’nn essaye donne temoignage par telephone ou-soit par lettre? Enn soeur ecrire regulierement bann membre so famille ki pa Témoin. Dan so lettre, li mette bann pensée encourageant ki sorti dan la Bible ek li raconte bann l’experience ki li’nn gagné letan li’nn donne temoignage.
4 Dan travail ou-soit dan lekol: Si nou envie loué Jéhovah, sa pou aussi pousse nou pou crée bann l’occasion pou sème bann la-grain la verité dan travail ou-soit dan lekol. Bann zenfant inn servi bann l’artik dan Réveillez-vous ! pou prepare zot devoir ki zot ti bizin presenté dan classe. Dan sa fason-la zot finn gagne l’occasion pou attire l’attention lor valeur nou bann periodik. Dan travail si nou garde enn livre Ki la Bible enseigné? dan enn place kot lezot kapav trouve sa, zot kapav pose nou question ek sa pou donne nou l’occasion pou donne temoignage.
5 Eski ou kapav pense bann fason pou crée l’occasion pou preché dan ou bann activité toulé-jour? Anou faire tou seki nou kapav pou “offert Bondié enn sacrifice louange,” kan nou profite tou l’occasion ki nou gagné pou preché.—Héb. 13:15.