Sezi Tou Lokazion To Gagne pou Pres Mesaz lor Rwayom Bondie!
1. Ki nou aprann ar lexanp David?
1 Lerwa David ti enn kikenn ki pa ti bes lebra devan bann sitiasion ki ti arive dan so lavi. Par exanp, li ti anvi ranz enn lakaz pou Jéhovah. Kan Jéhovah ti dir li ki se pa li ki pou ranz sa lakaz-la, David ti reget so bann lobzektif ek ti prepar tou pou ki Salomon kapav ranz tanp Jéhovah. (1 Rois 8:17-19; 1 Chron. 29:3-9) Olie ki David ti konsantre lor seki li pa ti kapav fer, li ti konsantre lor seki li ti kapav fer. Kouma nou kapav imit lexanp David kan nou pe rod bann mwayin pou pres mesaz lor Rwayom Bondie?
2. Kouma to kapav examinn tomem?
2 Fer Seki To Kapav: Boukou finn sinplifie zot lavi pou zot kapav fer pionie tanporer ouswa permanan. (Mat. 6:22) Eski to’si to kapav fer parey? Kitfwa kan to pou examinn to sitiasion ek priye, to pou trouve ki ena “enn gran laport pou laktivite” ki ouver devan twa. Si to kapav fer plis, alor sezi sa lokazion-la!—1 Cor. 16:8, 9.
3. Ki bann lokazion to kapav sezi pou rann temwaniaz, mem si to sitiasion pa permet twa fer pionie?
3 Me, ki to kapav fer si to sitiasion pa permet twa fer pionie? Pa negliz bann lezot lokazion ki ena devan twa! Par exanp, si to travay fer twa rant an kontak avek bann dimounn dan lemond, eski to kapav sezi sa lokazion-la pou pres avek zot? Ouswa si to ena bann problem lasante, eski to kapav sezi lokazion pou pres avek dokter ek bann ki pe okip twa? Pa bliye ki ena enn dispozision pou bann ki pa kapav fer boukou dan zot minister. Zot kapav met mem 15 minit lor zot rapor. Kan to pe ranpli to rapor, pa bliye met letan ki to’nn pase pou rann temwaniaz informel ek osi bann piblikasion ki to’nn plase, kouma par exanp bann trak, linvitasion Memoryal, ek linvitasion lasanble. Kan to’nn azout tou sa bann ti letan to’nn pase pou rann temwaniaz-la, kitfwa tomem to pou etone pou trouve ki kantite lertan to’nn gagne!
4. Ki to determine pou fer?
4 Ninport ki nou sitiasion, anou sezi tou lokazion pou pres mesaz lor Rwayom Bondie. Sa pou fer nou gagn enn gran satisfaksion, parski nou pou kone ki nou pe fer tou seki nou kapav pou Rwayom Bondie.—Marc 14:8; Luc 21:2-4.