Predication par telephone: enn moyen pou ‘dire la bonne nouvelle’
1. Ki l’utilité temoignage par telephone?
1 Nou bizin mazinn tou fason pou kapav amenn la bonne nouvelle avek maximum dimoune possible, mais en mem temps nou bizin faire bien attention couma nou pou faire sa. (Actes 10:42) Sa vedir ki nou bizin analyse nou territoire, pou ki nou kapav reussi touche bann dimoune ki difficile pou joinde, ek aussi pa perdi le temps. Alors, kifer nou pa essaye rann temoignage par telephone?
2. Dan ki situation, temoignage par telephone kapav specialement approprié?
2 Predication par telephone, li kapav enn moyen pou joinde dimoune ki reste dan bann l’endroit ki protegé par different system securité, bann lakaz kot li pa possible pou al tape la porte, ou-soit bann l’endroit kot pa kapav rentré. Li aussi permette nou pou contacté bann dimoune ki reste dan bann l’endroit eloigné, ek ki bien difficile pou al visite zot.
3. Ki nou kapav faire pou nou qualifié pou preche par telephone?
3 Kitfois, nou kapav senti ki nou pena assez courage ou-soit ki nou pa assez a l’aise pou rann temoignage par telephone. L’apotre Paul ‘finn prend courage grace a nou Bondié pou dire la bonne nouvelle.’ (1 Thess. 2:2) Kifer ou pa demann Jéhovah dan la priere, pou aide ou pareil couma Li’nn aide Paul? Prend aussi bann disposition pratik. Par exemple, demande enn proclamateur ki faire bien dan sa domaine-la pou aide ou. Guetté couma li faire ek aprann avek li. Apré prend courage ek essaye faire pareil ou aussi.—Guette Juges 7:17.
4. Cite bann l’exemple kot bann proclamateur inn gagne bann bon resultat kan zot inn preche par telephone.
4 Bann proclamateur ti pé preché dan enn quartier residentiel, ek zot pa ti pé preské joinde dimoune. Alors, zot finn pensé ki zot pou gagne pli bon resultat si zot rod nom tou sa bann dimoune-la dan l’annuaire telephone ek appel zot sa-mem soir-la. Enn madame ti demande sa proclamatrice ki ti telephone li-la pou passe kot li pou montré li couma faire sa l’etude la Bible ki li ti’nn propose li-la. Enn soeur ki pa ti trop koné couma pou faire, ti’nn invite bann dimoune ki li ti telephoné pou vinn reunion lendemain. Enn madame ti vinn reunion ek ti accepté enn l’etude. Enn lot soeur ki bien timide ti remarké ki bann dimoune ena pli bon maniere kan preche ar zot par telephone ki kan preche ar zot face-a-face.
5. Ki nou bizin determiné pou faire?
5 Lor plan personnel, eski nou laisse Jéhovah, nou Grand Potier forme nou ar so la-main? Mem si zot ti inpé peur dan commencement, bann ki’nn laisse Jéhovah forme zot, inn gagne beaucoup benediction. Anou determiné pou adapté-nou, pou ki nou “rann enn temoignage complet lor la bonne nouvelle” dan nou territoire.—Actes 20:21, 24.