Annonce la gloire Jéhovah
1 Enn ecrivain Psaume ti dire: “Chante pou Jéhovah, zot tou, bann dimoune ki lor la terre. . . . Annonce so la-gloire parmi bann nation, parmi tou bann peuple faire konn bann kitsoz extraordinaire ki Li finn faire.” Kan nou reflechi lor seki Jéhovah finn faire, pé faire ek pou faire pou nou, nou leker pousse nou pou annonce so la-gloire!—Ps. 96:1, 3.
2 Dan nou ministere: Bann Témoins de Jéhovah ena enn grand privilege pou porte nom Bondié ek pou donne louange sa nom-la en publik partout lor la terre. (Mal. 1:11) Ala enn grand difference avek bann pretre la chrétienté ki finn ena toupé pou tire nom Bondié dan zot bann traduction la Bible! Sa travail pou faire konn nom Bondié-la li urgent, parski bann dimoune bizin invok sa nom-la pou ki zot kapav sauvé pendant la grande tribulation ki pé vini. (Rom. 10:13-15) En plus, la paix parmi bann dimoune lor la terre, ek mem dan l’univers, depann lor sanctification nom Bondié. Oui tou seki Bondié faire, ena enn lien avek so nom.
3 “Jéhovah Li grand ek nou bizin loué Li.” Mais pou ki bann dimoune kapav “donne Jéhovah la gloire ki so nom merité,” zot bizin konn la verité lor Li. (Ps. 96:4, 8) Seulement, ena dimoune ki pa’lé admette ki Bondié existé. (Ps. 14:1) Lezot dire bann fausseté lor Li: zot dire ki Li pena pouvoir, ou-bien ki Li pa interessé ar bann dimoune. Kan nou aide bann dimoune ki ena enn leker sincere pou gagne enn connaissance exact lor nou Createur, lor so bann projet, ek lor so personnalité attirant, nou glorifié Jéhovah.
4 Par nou conduite: Nou honore Jéhovah kan nou vive en accord avek so bann principe juste. Bann dimoune remark nou bon conduite. (1 Pierre 2:12) Par exemple, parski nou prop ek nou linge bien en ordre, sa kapav pousse bann dimoune pou faire bann bon commentaire lor nou. Ek sa donne nou l’occasion pou koz lor bann bienfait ki nou gagné kan nou vive dapré bann principe ki ena dan Parole Bondié. (1 Tim. 2:9, 10) Oui, nou vrai-mem heureux kan lezot ‘trouve nou bann bon action ek donne la gloire nou Papa ki dan le ciel’!—Mat. 5:16.
5 Par nou parole ek nou bann action, anou loué Bondié toulé-jour, ek lerla nou pou faire seki sa psaume-la dire: “Chante pou Jéhovah, beni so nom. Jéhovah pou apporte la delivrance; jour apré jour annonce sa bon nouvel-la.”—Ps. 96:2.