Ed Lezot pu Donn Zeova Laglwar
1 Partu lor later, pe anons sa mesaz inportan la: “Ena lakrint pu Bondye ek donn Li Laglwar, parski ler finn arive pu Li zize. Ador sa Kikenn ki’nn fer lesyel, later ek tu bann lasurs delo la.” (Rev. 14:6, 7) Li enn loner pu nu, si nu’si nu anons sa mesaz la. Ki bann dimunn bizin kone lor Zeova pu ki zot ena lakrint pu Li ek ador Li?
2 So Non: Bann dimunn bizin kapav fer diferans ant sel vre Bondye ek bann fos bondye ki dimunn adore zordi, par so non. (Det. 4:35; 1 Kor. 8:5, 6) An realite, bann ekrivin Labib servi non Zeova plis ki 7,000 fwa. Mem si nu bizin reflesi byin kan pu servi non Bondye, fode zame nu kasyet li uswa nu evit servi li. Avredir Bondye anvi ki tu dimunn konn so non.—Psom 83:18.
3 So Personalite: Pu ki bann dimunn donn Zeova laglwar, zot bizin kone ki kalite Bondye Li ete. Nu bizin fer zot konn so lamur extraordiner ek so gran sazes. Nu bizin fer zot kone ki Li ena enn lazistis total, Li tu-pwisan, Li konpran bann dimunn, Li ena lamur fidel, ek bann lezot gran-gran kalite ankor. (Egz. 34:6, 7) Zot bizin usi aprann pu ena enn lakrint pu Bondye, pu ador Li ek rekonet ki zot bizin gayn so faver pu Li donn zot lavi.—Psom 89:7.
4 Apros ar Bondye: Bann dimunn bizin ena lafwa an Zeova si zot anvi sape zur so zizman. (Rom. 10:13, 14; 2 Tes. 1:8) Sa vedir plis ki zis gayn enn konesans lor Bondye ek so bann kalite. Nu bizin ed bann dimunn pu devlop enn relasyon personel avek Zeova ek ena enn konfyans total an Li. (Pro. 3:5, 6) Si zot met an pratik seki zot aprann, si zot priye Li, ek truve ki vremem Li ed zot dan zot lavi, zot lafwa pu grandi. Sa pu ed zot pu apros plis ar Zeova.—Psom 34:8.
5 Anu fer tu seki nu kapav pu fer konn non Bondye, pu ed lezot pu ena enn konfyans total an Li, ek pu ena lakrint pu Li. Nu kapav ed ankor plis dimunn pu konn Zeova ek pu donn Li laglwar parski Limem ki kapav sap zot.—Psom 25:5.