Nu Kapav Fer Seki Jéhovah Demann Nu
1. Ki nu resanti parfwa, ek kifer?
1 Viv an akor avek bann lalwa ek prinsip Jéhovah, sa mem meyer fason viv ki kapav ena. Sa permet nu zet enn bon baz pu nu lavenir eternel. (Ps. 19:7-11; 1 Tim. 6:19) Me selman, lemond Satan met buku presyon lor nu, san konte ki nu linperfeksyon rann nu lavi pli difisil ankor. Donk, alor ki nu pe fer zefor pu asim nu bann responsabilite Kretyin, li posib ki defwa nu santi ki nu nepli kapav. (Ps. 40:12; 55:1-8) Kitfwa, nu pe kestyonn numem si vremem nu pu kapav fer tu seki Jéhovah demann nu. Dan bann moman parey, ki kapav permet nu gard nu lekilib lor plan spirityel?
2. Kuma Jéhovah Li rezonab dan seki Li demann nu?
2 Komannman Jéhovah Pa enn Pwa pu Nu: Jéhovah zame demann nu enn kitsoz ki nu pa kapav. So bann komannman pa enn pwa nu, okontrer zot fer nu dibyin. (Deut. 10:12, 13; 1 Jean 5:3) Jéhovah rekonet ki antan ki imin, nu ena bann febles, ek ‘Li pa bliye ki nu finn fer ar lapusyer.’ (Ps. 103:13, 14) Malgre ki defwa nu sityasyon pa permet nu fer buku, Jéhovah aksepte ninport ki gro zefor nu fer pu servi Li. (Lév. 5:7, 11; Marc 14:8) Li invit nu pu zet nu fardo lor Li, ek Li promet ki li pu ed nu pu res fidel.—Ps. 55:22; 1 Cor. 10:13.
3. Kuma Jéhovah donn nu lafors pu andire?
3 Nu Bizin Landirans: Kan nu egzaminn resi Biblik bann fidel serviter kuma Éliya, Jérémie ek Paul, nu aprann ki nu bizin ena landirans. (Héb. 10:36) Jéhovah ti sutenir zot kan zot ti konn lopozisyon ek dekurazman. (1 Rois 19:14-18; Jér. 20:7-11; 2 Cor. 1:8-11) Legzanp fidelite ki nu bann frer pe lese zordi, sa usi motiv nu. (1 Pierre 5:9) Kan nu medit lor sa bann legzanp-la, sa kapav anpes nu dekuraze.
4. Kifer li inportan ki nu fixe nu lespri ek nu leker lor promes Bondye?
4 Nu lespwar dan promes Bondye tini nu for parey kuma ‘lank enn bato.’ (Héb. 6:19) Par egzanp, se zot lespwar dan promes Bondye ki ti pus Abraham ek Sara pu kit zot lavil ek pu al ‘res kuma etranze dan peyi ki Bondye ti promet zot.’ Pareyman, se so lespwar ki ti donn Moïse kuraz pu tini ferm dan so ladorasyon pu Bondye. Ek se sa ki finn ed Jésus usi pu andire lor enn poteau de supplice. (Héb. 11:8-10, 13, 24-26; 12:2, 3) Nu’si parey, si promes Bondye an rapor avek lemond nuvo, li vivan dan nu leker, sa pu ed nu pu tini ferm.—2 Pierre 3:11-13.
5. Kifer kan nu pans seki nu’nn akonpli dan lepase, sa kapav ankuraz nu?
5 Enn lot kitsoz ki kapav fortifye nu dan nu servis, se kan nu repans fidelite, lespri sakrifis ek kuraz ki nu’nn manifeste dan lepase. (Héb. 10:32-34) Sa fer nu rapel lazwa ki nu gayne kan nu donn Jéhovah seki Li demann nu, setadir kan nu servi Li avek tu nu nam.—Mat. 22:37.