La Predikasyon Ansam Avek Nu Zanfan: Enn Gran Led pu Fer Zot Vinn Bann Disip

¹ Nu rekonet ki nu bann zenn bizin fer fas avek bann presyon sa lemond move-la. Nu bann zanfan ena buku valer pu nu. Akoz samem nu anvi ed zot pu fer fas avek sa bann presyon-la. Kan nu pran par regilyerman dan predikasyon, sa laktivite-la ed nu buku pu fortifye ek ogmant nu lafwa. Anplis, predikasyon li enn proteksyon. Li permet bann zenn pu vinn bann mamb aktif dan kongregasyon ek usi santi zot konserne par progre kongregasyon, olye ki zot zis asize ek get lezot travay. Paran, ansyin, asistan ministeryel, eski u konsyan rol inportan ki bann zenn ek bann zanfan kapav ena dan kongregasyon antan ki bann proklamater, ek usi led ki u kapav donn zot dan sa domenn-la?

² Bann Paran Ena enn Gran Rol pu Zwe: Depi ki u zanfan ankor tipti, met bann lobzektif spirityel devan zot, kuma par egzanp servi antan ki pyonye permanan uswa dan Betel. Ankuraz zot pu pran servis pyonye oxilyer kan zot an vakans. Buku paran ena lazwa pu ena enn uswa plizir zanfan ki pe servi dan enn form servis aplintan. Bann paran pu sertennman azir avek sazes si zot ankuraz zot zanfan pu swiv konsey Zezi ki dir nu met bann lintere Rwayom an premye dan nu lavi.—Mat. 6:33.

³ Si nu pa fer seki nu dir, nu bann parol pa pu ena enn lefe dirab dan lespri nu bann zanfan. Bann zanfan imit dabor zot bann paran. Si u anvi ankuraz zot pu met bann lintere Rwayom an premye, ek si u anvi ki zot vremem santi zot puse pu fer sa, u bizin donn zot legzanp. Si zot anvi fixe lobzektif servis pyonye pu zot bann zanfan, bann paran bizin akord predikasyon buku linportans. Zot bizin partisip maximem dan predikasyon ek fer pyonye oxilyer detanzantan. Nu pa kapav ena de kalite koze ni de kalite manyer fer, enn kan nu lasal ek enn kan nu lakaz.

⁴ U latitid pu ena enn gran linflyans lor u bann zanfan. Enn zenn ki ena 21 an dir: “Mo bann paran inn tuzur fer mwa konpran ki, pu zot, servis pyonye se meyer kitsoz ki kapav fer dan lavi.” Enn lot zenn dir: “Pena enn zur ki mo bann paran pa’nn koz servis pyonye ar nu.”

⁵ Eski u kone ki enn de meyer mwayin pu fer sir ki u zanfan fer progre lor plan spirityel, se pu amenn zot avek u dan predikasyon? U pu gayn enn bon lokazyon pu kapav ena enn konversasyon avek zot. U pu ekut zot koz avek bann dimunn ek reponn bann kestyon. Sa pu permet u konn pli byin ki kantite u bann zanfan konpran ek apresye la verite.

⁶ Kitfwa u zanfan konsider predikasyon inpe kuma Zeremi ki ti dir: “Ayo Suverin Senyer Zeova! Gete, mo pa mem konn koze, parski mo ankor enn garson.” Alor li inportan ki u form zot dusma-dusma.—Zer. 1:6,7.

⁷ Bann Sigzesyon Pratik pu Bann Ki Pli Zenn: Okumansman, bann zenn zanfan kapav zis donn enn fey linvitasyon uswa enn trak. Apre, amezir ki u montre zot, zot kapav aprann propoz bann peryodik, ek fer enn prezantasyon dapre zot kapasite. Finalman zot pu kapav kondir enn letid. Kuma pu fer sa? Nu Minister DiRwayom Zanvye 1979, paz 4, paragraf 4 ek 5, donn bann sigzesyon ki’nn fer zot prev.

⁸ Eski u ed u zanfan dan predikasyon? Kan u bann zanfan uswa lezot zanfan akonpayn u dan predikasyon, eski u fer zot partisipe? Nu ankuraz u pu fer sa, parski zot usi zot bizin “fer deklarasyon piblik pu zot sove.” (Rom. 10:10) Li ti pu extra si plitar, parey kuma sa ekrivin psom-la, zot dir: “O Bondye, to finn anseyn mwa depi mo zenes, ek ziska asterla mo pe kontiyn anons to bann travay extraordiner.” (Psom 71:17) Li vremem enn plezir pu bann paran kan zot truv zot bann zanfan aksepte sa formasyon-la! Tanka bann zanfan, kan zot aksepte sa formasyon-la, zot montre ki zot lafwa pe vinn deplizanpli solid. Ki kitsoz kapav fer bann paran plis plezir ki sa?

⁹ Bann paran konsyan ki bann bon labitid ki zot donn bann zenn ek bann zanfan depi asterla mem, pu ed zot vinn bann adilt responsab. Kan u ed bann zanfan pu vinn bann proklamater regilye, sa pu fer zot vinn bann Kretyin mir lor plan spirityel ki pu reysi zot lavi. Sa pu donn la glwar non Zeova. Si u anvi konn pli byin u zanfan, seki zot panse ek zot bann santiman ek si u anvi fer zot vinn bann disip ki kontan Zeova, alor prevwar letan pu u sorti dan predikasyon avek zot. U pu truve, sa vo vreman lapenn!