Kuma Laverite Liber Nu
1 Enn fwa, Zezi ti dir bann Zwif ki ti ena lafwa an li: “Zot pu konn laverite, ek laverite pu liber zot.” (Zan 8:32) Li ti pe koz lor enn liberte buku pli gran ki sinp liberte bann sitwayin. Tu dimunn, ki li ris uswa pov, ki li ena ledikasyon uswa non, kapav gayn sa liberte la. Zezi ti anseyn laverite ki ti pu liber bann dimunn ar lesklavaz pese ek lamor. Parey kuma Zezi ti explike, “enn kikenn ki fer pese, li enn esklav pese.” (Zan 8:34) Wi, nu pe atann avek buku pasyans lepok kot tu bann dimunn ki obeir Bondye “pu libere ar esklavaz pese ek zot pu gayn liberte extraordiner bann zanfan Bondye”!—Rom. 8:21.
2 Nu gayn sa liberte la grasa laverite konsernan Zezi ek rol ki li ena dan proze Bondye. Konesans lor sakrifis ki li finn fer pu nu, sa usi form parti dan sa laverite la. (Rom. 3:24) Si nu aksepte ek nu sumet ar laverite ki ena dan Labib avek tu nu leker, nu kapav asterla mem profit enn sertin liberte. Nu libere ar laper, dezespwar, ek tu sort move pratik.
3 Libere ar Laper ek Dezespwar: Fode pa nu dezespere kan nu truv bann kondisyon dan lemond zordi. Kifer? Parski nu kone pu ki rezon ena mesanste ek nu kone usi ki byinto Bondye pu tir tu sa mesanste la lor later. (Psom 37:10, 11; 2 Tim. 3:1; Rev. 12:12) Anplis, laverite liber nu ar bann fos lanseynman konsernan kondisyon bann dimunn mor. Nu kone ki bann dimunn mor pa kapav fer nu ditor, ek zot pa pe sufer dan enn lanfer dife. Nu kone usi ki Bondye pa pran lavi bann dimunn pu ki zot viv avek Li dan lesyel.—Ekl. 9:5; Akt 24:15.
4 Se sa laverite la ki finn sutenir enn papa ek enn mama kan zot finn perdi zot zanfan dan enn aksidan. Sa mama la dir: “Nu lavi vid. Nu pu kapav ranpli sa vid la zis kan nu pu retruv nu garson grasa rezireksyon. Me nu kone ki nu sagrin pa pu dir pu buku letan.”
5 Libere ar Bann Move Pratik: Laverite ki truv dan Labib kapav sanz panse ek personalite enn dimunn. Ek ed sa dimunn la pu libere ar bann problem ki li kapav evite. (Efe. 4:20-24) Nu kapav evit tom dan lamizer si nu montre nu onet ek nu travay dir. (Prov. 13:4) Kan nu pre pu sakrifye nu pu lezot parski nu kontan zot, sa amelyor bann relasyon avek lezot. (Kol. 3:13, 14) Respekte lotorite ki Bondye finn etabli dan lafami kapav ed enn kikenn pu evit bann problem familyal. (Efe. 3:33-6:1) Nu gayn enn bon lasante kan nu evit bwar ziska su, ena enn move kondwit sexyel, fim sigaret uswa pran ladrog.—Prov. 7:21-23; 23:29, 30; 2 Kor. 7:1.
6 Enn zennzan ti’nn pran ladrog pandan 9 an, ek li pa ti pe kapav arete. Enn zur li’nn zwenn enn proklamatris ki ti pe prese lor semin. Li finn aksepte piblikasyon ek proklamatris la finn fer bann laranzman pu vizit li kot li. Li finn kumans enn letid Labib. De mwa plitar, sa misye la finn aret pran ladrog net, ek apre wit mwa letid, li finn batize. Kan so frer ek so bel ser finn truve kuma li finn libere ar ladrog, zot finn kumans etidye Labib zot usi.
7 Ed Lezot pu Gayn Liberte: Bann ki pandan tutlong zot lavi finn esklav bann fos lanseynman, kapav truv sa difisil pu konpran liberte ki Parol Bondye done. Sa kikenn ki anseyn zot la bizin fer bann zefor extraodiner ek byin prepar li pu kapav tus zot leker. (2 Tim. 4:2, 5) Asterla, se pa ler pu ralanti nu travay “pu anons liberte bann esklav.” (Izai 61:1) Liberte ki nu ena antan ki Kretyin, li ena buku valer. Gayn sa liberte la vedir gayn lavi pu tuletan.—1 Tim. 4:16.