Respekte Nu Langazman pu Servi Zeova
1 Ki u fek batize uswa depi lontan, sirman u rapel sa evennman inportan la dan u lavi. Nu batem li pa enn lafin me, plito, kumansman enn langazman ki nu’nn pran dan nu lavi pu servi Zeova pu tuletan. (1 Zan 2:17) Ki vedir respekte sa langazman la?
2 Swiv Legzanp Kris: Zis apre so batem Zezi ti “kumans so travay,” setadir, anons “labonn nuvel lor rwayom Bondye.” (Lik 3:23; 4:43) Pareyman, apre ki nu’nn batize pu montre ki nu’nn angaz nu ar Zeova, nu finn vinn enn minis kalifye par Bondye pu pres labonn nuvel. Alor ki nu fer buku zefor ek pas laplipar nu letan pu gayn seki nu bizin pu viv, nu travay prinsipal, se nu minister Kretyin. (Mat. 6:33) Olye ki bann ki’nn angaz zot ar Bondye fer zefor pu vinn ris uswa pu vinn bann dimunn inportan, zot plito rod ‘donn loner zot servis pu Bondye,’ parey kuma lapot Pol ti fer. (Rom. 11:13) Eski u apresye privilez spesyal ki u ena pu servi Zeova? Eski u fer tu u posib pu donn valer u servis pu Li?
3 Parey kuma Zezi, nu bizin “reziste kont Dyab.” (Zak 4:7) Satan ti tant Zezi zis apre So batem, ek zordi usi li fer parey, li pe atak bann serviter Bondye ki’nn angaz zot ar Zeova. (Lik 4:1-13) Pwiski nu anture ar lemond Satan, nu bizin disiplinn numem, evit tu kitsoz ki kapav kontaminn nu lespri uswa gat nu leker. (Pro. 4:23; Mat. 5:29, 30) Labib konsey bann Kretyin, ki zot “pa kapav asiz lor ‘latab Zeova’ ek lor latab bann demon an mem tan.” (1 Kor. 10:21) Sa vedir ki nu bizin evit bann divertisman ki pabon, bann move frekantasyon, ek bann danze ki ena lor Internet. Sa vedir usi ki nu evit tu kitsoz ki sorti ar bann aposta. Si nu fer atansyon ar sa bann kitsoz la ek lezot pyez Satan, sa pu ed nu pu respekte nu langazman pu servi Zeova.
4 Servi Bann Dispozisyon Ki Bondye Finn Pran: Pu ed nu reysi respekte nu langazman, Zeova finn donn nu so Parol ek kongregasyon Kretyin. Pran labitid tulezur pu lir Labib ek priye Zeova. (Zoz. 1:8; 1 Tes. 5:17) Apresye bann reynion kongregasyon. (Psom 122:1) Rasanble avek bann ki ena lakrint pu Zeova ek bann ki obeir so bann lord.—Psom 119:63.
5 Avek led Zeova, u kapav respekte langazman ki u’nn pran pu servi Li. U kapav truv usi lazwa kan u servi Li pu tuletan.—Psom 22:26, 27; Fil. 4:13.